Pandemiya dövrünün ilk səyahəti - Sofiya

Deyəsən Azərbaycandan başqa heç yerdə karantin yoxdur. Pandemiya dövründəki ilk səyahətim haqqında yazıb qrupdakılara bir az acıq verim. (təxmin edirəm ki, ilkdir)Gecə saat 3-də (29 iyun) Italiyadan Sofia hava limanına endik. (terminal 1, Wizzairlə 20 euro) Təyyarədən çıxan kimi havadakı qoxu sanki SSSR - yə xoş gəlmisiniz deyirdi. Pasport yoxlanışında oturan 3 maniken kimi qız elə gözəllikləri qədər ciddi baxışları ilə də bizi buraxmamağa çalışırdılar. Nəysə, birtəhər yoxlanışı keçdikdən sonra qarşımıza bir həkim çıxdı. Həkim nə həkim əminliklə deyə bilərəm ki, əynindəki xalatı karantin başlayan gündən bugünədək əynindən çıxartmayıb (heç nə yoxlamadılar, self declaration doldurub yolumuza davam etdik) T1-in vəziyyəti həqiqətən də pis gündə idi, Sofiya haqqında çox pis fikirlər formalaşmağa başlayırdı. İlk gördüyüm mənzərə soyuq insanlar, əldən düşmüş, sınıq-sökük hava limanı.Axır ki, gəlib Bolqarıstanın paytaxtı və əsas şəhəri Sofiyaya çatdıq. Gecə saat 3 olduğundan gecəni barda keçirib, səhər şəhərə yollanmağı fikirləşdik. Ətrafdan öyrəndik ki, bu saatda ancaq bir kafe açıq ola bilər. Kafe deyirəm e sizə 1 manatlıq çayxanalarımız onun yanında toya getməli idi.Girdik kafeyə və mən "traditional" nəyiniz var ?- deyə soruşdum (suala bax e) Nə istədiyimi soruşdu, dedim "ət" .(uğursuz bir zarafat idi) Nəysə, bu güclü zarafatdan sonra bildiyimiz kartof və toyuğu "traditional" adı ilə məcbur yedik. Səhərə yaxın saat 5-6 arası xəritədən baxdıq ki, bir azdan avtobuslar hərəkətə başlayacaq. Bundan sonra Sofiya barədə formalaşan mənfi fikirlər müsbətə doğru dəyişməyə başladı. Dayanacaqda gözləsək də biletimiz yox idi. (Bilet satışı 7-8 arası başlayır) Avtobus gəlsə də koronaya görə terminal 2-yə gedib ordan da qatarla mərkəzə getməli olduğumuzu dedilər. Ən rahat yol bu imiş. (ooo terminal 2-də varmış) Xəritədə baxdıq ki, piyada T1 ilə T2 arasında 30 dəqiqəlik yol var. ilk dəfədir ki, eyni havalimanının terminalları arasında bu qədər məsafə olduğunu görürəm. Tam ümidlərimiz öləndə avtobusun sürücüsü bizi T2-yə qədər aparacağını dedi))) Qayıtdım ki, "naçalnik" bəs biletimiz yoxdur. Dedi : chill up man)) Avtobusa minib getdik və mən T2-nin gözəlliyinə vuruldum, ya rəbb. Terminal o qədər gözəl idi ( bir gediş üçün 1.6 BL =0.8 sent, ancaq 4 BL = 2 euroya bir günlük limitsiz metro gedişi almağınız daha yaxşıdır. Bunun avtobusa uyğun olub-olmadığını bilmirəm. Çünki hər istifadə üçün barkodu kioska daxil edib aktiv etməlisiniz). Nəysə, artıq şəhərə çatdıq.Şəhər bir sözlə belissimo, perfetto. Bugünə qədər olduğum heç bir şəhər təmizlik və gözəllikdə Sofiyaya çatmaz. (Ələxsus Sicilyada yaşayan biri üçün). Şəhər sanki meşənin içərisində qurulub, hər yer park və ağaclıqdır. Lakin şəhərin əsas problemi qidalanmanın çox zəif olmasıdır. (barmaqla sayılacaq qədər yemək yeyə biləcəyiniz kafelər, restoranlar var.Onlar da bulvar adlanan ərazidə) Di gəl ki, söhbət içkiyə gəldikdə 2 metrdən bir barlar, kafelər doludur. (sırf içki üçün) Səhər 11-dən boş yer tapmaq olmurdu. Hamı oturub içir eləcə)) "Hər gün son günmüş kimi için"- devizi ilə yaşayırlar deyəsən. Bərbad başlayan səyahət gözəl sonluqla bitdi. Sofiyanı tam gəzməyə bir gününüz bəs edər. Bizim də onsuzda 1 gün vaxtımız vardı, bol-bol gəzdik (sözün əsl mənasında gəzdik, internetdən girib məşhur yerlərinə baxıram, hamısında olmuşuq) və oradan da İstanbula keçdik.(yeriniz məlum) Daha Türkiyə haqqında məlumat vermirəm, bu qədər kafidir.P. S ümid edirəm ki, sizi yetəri qədər qıcıqlandıra bildim))Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Sadiqov Nicat

171 dəfə oxunub

Fironlar diyarı - Misir bələdçisi (II hissə)

Misirlə bağlı birinci hissədə getdiyim yerlər haqqında yazmışdım. Bu yazıda isə Misirin məndə oyatdığı təəssurat, insaları və yeməkləri haqqında yazacam.Məndən əvvəl Misirə bir dostum getmişdi və gəlib danışdıqları isə o qədər də yaxşı şeylər deyildi. Kasıb ölkədir, dəlixanadar, iyrənc gündədir və s. Düzdü bu bir az əhvalımı pozsa da, getmək fikrində qəti idim.Birinci yazıda da qeyd etdiyim kimi, ilk mədəniyyət şoku - yolda heç bir qaydalar işləmir və siqnal səsindən ilk gün başım ağrıdı. Orada Azərbaycan sürücülərinin nə qədər mədəni olduğunun fərqinə vardım.Misir insanlarının çoxu fürsətçildi. Bu bəlkə də ölkənin kasıb durumundan irəli gəlir. Məsələn siz küçədə yeriyən zaman birdə hiss edirsiniz ki, arxanızca kimsə düşüb. İlk dəfə bu insanda qorxu yaradır ki, görəsən niyə arxamca düşüb? Nə edəcək mənə?Burda qormağa ehtiyac yoxdur :) Adamlar sizə diqqətlə qulaq asır və görəndə ki, xarici dildə danışırsan sizə kömək təklif edir. Bu kömək isə sizi hər hansı tur agentliyinə aparmaqdan ibarətdir. Çünki həmin bu şəxslər tur agentliyi ilə faizə işləyirlər.İkinçi şok – hamı sizdən Tips (çaypulu gözləyir)Tualetə gedən qapıda bir qadın bir kişi dayanır əllərində rulon salfetka. Siz içəri girəndə salfetka cırıb verir az qalır sənlə kabnetə qədər girsin unitacın qapağını qaldırsın. Təbii ki, sizin qara gözünüzə, qara qaşınıza aşıq olub etmirlər. Tualetdən çıxanda tips istəyirlər. Kuçədən kimdənsə söz soruşursan və həmin dəqiqə sənə kömək edirlər canlabaşla. Amma sonda deyirlər kömək etdim tips ver)) Yəni bunu bilin ki, hər yerdə tips istəyirlər. Həm də sırtıq formada.Amma bunlara baxmayaraq ölmədən öncə görüləcək yerlərdən biridir Misir. Bütün mənfilikləri ilə birlikdə belə bu torpaqlar tarixdir. Orda tarixi görəndə hər şeyi unudursan. Min illər öncə yaradılan şeyləri görəndə insan heyrətə gəlir. İnsan beyni qəbul etmək istəmir ki, bütün bunlar minilliklər öncə necə yaradılıb? Hansı beyinin məhsulu olub? Həmin o tarixə toxunduqca insan özünü o dövürdə hiss edir. Bir sözlə bütün mənfiliklərə rəğmən Misirə getməyimə heç də peşman deyil, yenə də olsaydı təkrar gedərdim:)Keçək əsas məsələrdən biri Yeməyə!Yeməklərdən sizə 1-ci olaraq Koşarı (Koshary) məsləhət görərdim. Demək tərkibi noxud, yaşıl mərcimək, makaron, qızardılmış soğan və xüsusi pomidor sousu. Zövqə görə acı da əlavə edə bilərsiniz. Səhər mərkəzində küçədə bunu iki nəfər və cola daxil 32 pounda (2$) yeyə bilərsiniz.Alexandria şəhərinə getsəniz mütləq dəniz yeməklərini dadın. Burda da düyü ilə şifariş verə bilərsiz. Dəniz məhsulları isə çox dadlıdır.Hamam Mashi – Ən çox məsləhət görülən yeməklərdəndir. Bu yemək içi düyü ilə doldurulmuş çöl quşu, və yanında tərəvəz və düyü ilə təqdim olunur. Dadını soruşsanız o qədər də əla bir şey deyil. Məsələn Gərəf ləvəngisinin əlinə su tökməz :)Fəttah (Fattah) bu yemək də təbii ki düyü ilə təqdim olunur ???? Bildiyiniz düyü və mal əti ilə təqdim olunur. Mal ətinin suda az qaynadılmış versiyası. Ət bərk olur və qədər də dadlı deyil. Sevmədim yəni. Bir adam üçün qiymət 5$-dir.Misir simiti – bir sözlə ifadə edim Türk simiti ürəkdir :)Şakaşuka (Shakshuka) bizim pomidoryumurtanın ərəb versiyası. Məndən məsləhət səhər yeməyin yoxsa mədəniz şakşuk qaynayacaq. Çox acılı olur, ona görə də səhər yeməyin.Humuz (Hummus) – atışdırmalıq. Pis deyildi.Künəfə (Konafa) – Türk künəfəsi ürəkdir.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Asim Celilov

350 dəfə oxunub

Dağətəyinin cənnəti - limon qoxulu şəhərə gəzəyən turu

Limon qoxuları, limonçellosu, çiçəkləri, dar yolları, incəsənət qalereyaları, keramika mağazaları ilə məşhur olan sevimli və rəngli Pozitano Kampaniya(İtaliya) vilayətinin Saleno əyalətinə məxsus kiçik icmaya malik Amalfi sahillərinin ən gözəl qəsəbəsi sayılır. Başlanğıcı kiçik balıqçı sahil qəsəbəsi olan Pozitano turist axınından sonra yaraşıqlı və bərli-bəzəkli villalar, mehmanxanalar hesabına cazibəli bir şəhərə çevrilmişdir.Norman Jewison’un ‘Only you’ filminə baxdıqdan sonra bu şirin qəsəbəyə heyran olub ora getmək istəməyən çox az adam tapılar məncə. Sofi Lorenə məxsus villanı da məhz burada görə bilərsiniz.Dik bir yamac üzərində qurulan Pozitano, ağ, sarı, çəhrayı damlı Aralıq dənizi evləri, çınqıl daşlı çimərlikləri və masmavi dənizi ilə özünüzü sanki bir italyan filminin baş qəhrəmanı kimi hiss edəcəyiniz sahil qəsəbəsidir.Pozitanoya necə getmək olar?Pozitanoya gedib çıxmaq üçün ən yaxın hava limanı Neapol Beynəlxalq Hava limanıdır. Bu hava limanı Neapolun cəmi 7km cənubunda yerləşir. Maşınla hava limanından Pozitanoya çatmaq 1saat 15 dəqiqə çəkir. Hava limanından Neapol mərkəzinə ən ucuz getmək vasitəsi avtobusdur. EasyJet, Meridiana, Air Berlin, Vueling, Wizz Air kimi aşağı büdcəli hava yolları ilə Avropanın digər şəhərlərindən Neapola gədə bilərsiniz. Hava limanında günü 7 avro ödəməklə əşyalarınızı əmanət ofisində saxlaya bilərsiniz. Buradan şəhər mərkəzinə gəlmək üçün 2 növ avtobus fəaliyyət göstərir. Unicocampania şirkətinin avtobusu (Unico Alibus) hər 20-30 dəqiqədən bir hava limanından hərəkət edərək Garibaldi Meydanında(15-20 dəqiqəyə) və Municipo meydanında(30-35 dəqiqə) dayanır. Qiyməti 3 avrodur və 06:30-23:30 aralığında işləyir. Biletləri avtobusdan əldə edə bilərsiniz. Bu biletlə 90 dəqiqə ərzində ictimai nəqliyyatın digər növlərindən də istifadə edib otelinizə çata bilərsiniz. Bundan başqa ANM-3S avtobusu da həmçinin hava limanından Garibaldi Meydanına hər 15 dəqiqədən bir gediş-dönüş səfərləri həyata keçirir. Qiyməti 1,10 avro olan bu avtobus ilkinə nisbətən daha çox dayanacaqda dayanır və ucuz olduğu üçün daha çox sərnişini olur.İndi isə gələk əsas məsələyə, bəs Neapoldan Pozitanoya necə gedək?Neapoldan Pozitanoya gedib çatmaq üçün ilk öncə Sorrentoya getmək lazımdır. Neapolda yerləşən Corso Garibaldi mərkəzi dəmiryolu vağzalından Sorrentoya hər 20 dəqiqədən bir ''Circumvesuviana '' qatarı var (5avro) və səfər təqribən 1saat 10 dəqiqə çəkir. Sorrentodan Pozitanoya necə gedək?Sorrentoya çatanda dəmiryolu vağzalının çölündə SITA avtobuslarını görəcəksiniz. Ödənişi 1,5 avrodur. Bu avtobuslar hər saat başı Pozitanoya gedir. Burada biz yaz yağışının altında uzun sıra gözləməli olmuşduq. Buradan Amalfi və Pozitanoya gedə bilərsiniz.20km davam edən bu yolda ən möhtəşəm mənzərəni görmək üçün avtobusun sağ tərəfində oturun. Yarım saat və ya tıxac olarsa maskimum 45 dəqiqəyə Pozitanoya çatacaqsınız. Pozitanoda yemək-içmək bələdçisiDənizi, sahilləri qədər mətbəxi ilə də gözəl olan Pozitanoda harda yemək olar?Pozitano Cafe- mübahisəsiz otura biləcəyiniz ən gözəl yerlərindən biri buranın terrasıdır. Bu məkanda möhtəşəm bir kofe içərək mənzərədən həzz ala bilərsiniz.Paradiso Cafe- Eyvanında tiramisu ya da limonlu şirniyyat yeməyinizi mütləq tovsiyyə edirəm.Bunlardan əlavə Ristorante La Cambusa'nın mənzərəli bölümündə yer tapa bilsəniz çox şanslısınız. Çünki bura çox möhtəşəm mənzərəyə ev sahibliyi edir.Amalfi sahilləri ''limon diyarı'' olaraq adlandırılmasını qalın qabıqlı, bol sulu, bol şəkərli və mango böyüklüyündə ətirli böyük limonlarına borcludur. Bu da Pozitanoda başınızı çevirdiyiniz hər yerdə limon ağacı görməyiniz, makarondan torta, risottadan dondurmaya qədər hər təamın limonlusunu yeməyiniz, ancaq ən çox da limonçello içməyiniz deməkdir. Bu içki spirtliliyi 35% olan limon likörüdür. Makaron və pizzadan əlavə (bu arada ən dadlı pizza Capricci adlanan pizza restoranında olur) donuz əti yeməklə probleminiz yoxdursa prosciutto-nu tövsiyyə edərdim.Pozitano bahalıdır ya ucuz sualının cavabına gələndə isə şəhər çox bahalıdır deyərdim. Pozitano Amalfi sahillərinin ən bahalı qəsəbəsidir. Hətta yerli xalq ilə biraz səmimi olsanız, onlar sizə növbəti səfərinizi Sorrentoda keçirməyinizi məsləhət verər.Pozitanoda harda qalmaq olar?Bir günlük gəzməyə gedirsinizsə, Neapolda qalıb bu şəhəri də gəzib Pozitanoya baş çəkə bilərsiniz. Ancaq sırf Portofino, Pozitano, Amalfi sahillərində bir neçə günlük tətilə gəlmisinizsə, burada gecəsi 2 nəfər üçün 100 avrodan 3200 avroya qədər dəyişən qiymətlərlə qonaq ola bilərsiniz. Bronu mütləq bir neçə ay əvvəl edin. Bunlardan ən yaxşıları Appartamento Mare A, Villa Eos, Villa Eden, mərkəzə daha yaxın qalmaq istəsəz Positano Villa Sleeps 13 Air con Wifi, Villa Punto del Sole, daha ucuz isə Your nest on the Path, Casa Fortunata kimi yerlərdir. Bir də kiçik bir qeyd edim ki, dünyanın ən gözəl otellərindən biri olan Le Sirenuse da burada yerləşir.Pozitanoya nə vaxt getmək olar?Səyahət edərkən yağış sizi narahat etmirsə bahar və payız ayları bura getmək üçün seçilən vaxtlardandır. Dəniz tətilini burda keçirmək istəyənlər yayda ən yüksək istiliyin 32 dərəcə olduğunu yadda saxlasınlar. Həm gündüzlər isti sizi yormur, həm də gecələri sərin keçir. Məncə ən yaxşı vaxt turistlərin hələ çox axın etmədiyi, havaların da daha yeni isinməyə başladığı-aprel ayının əvvəlidir.Pozitanonun yerli xalqı haqqında Pozitanoda yerli xalqın həyat səviyyəsi yüksək və cənublu olduqlarına görə daha rahat, daha gülərüz və yardımsevər insanlardır. Bura həm də İtaliyanın digər bölgələrinə nisbətən daha təhlükəsizdir.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Ulkar Ismayilzada

249 dəfə oxunub

Avropanın ən məşhur şəhərləri (II hissə)

"Səyahət etmək əvvəl səni lal edir, sonra səni daha yaxşı hekayəçi halına gətirir" - İbn BattutaNömrə 3- TürkiyəMarmarisBu şəhərdə olduğunuz zaman elə bil Türkiyə istirahət zonasında deyil, Palma de Malyorka kimi yerdəsiz- yəni elə bil İspaniyanın gözəl istirahət zonasındasınız. Egey dənizi sahilində yerləşən bu şəhər əsasən avropalıların istirahət etdiyi şəhərdir. Digər kurort zonalarında olduğu kimi burada əksinə postsovet ölkəsindən az adam görmək olar.İzmirTürkiyənin avropa paytaxtı bu şəhərə desək heç yanılmarıq. Burada insanlar, yaşayış tərzi çox avropasayağıdır. Egey dənizi sahilində olan şəhərin çox gözəl mənzərələri, dəniz gəzintiləri və baxılacaq yerləri var. Assansör adlanan məşhur yerdən şəhəri hündürdən görmək imkanınız var və bir az aralı getsəz Efes kilsələrini görə bilərsiz.İstanbul/Bodrumİstanbul Türkiyənin ən böyük şəhəridir. İqtisadi böyüklüyünə görə dünyada 34-cü, əhalisinə görə Avropada birinci, dünyada isə Laqos şəhərindən sonra altıncı sırada yer alır. Sultanəhməd rayonunda eyni adlı məbəd turistlərin ən diqqətini çəkən yerlərdəndir. Turistlər həm də bu ərazini Mavi məsçid kimi tanıyırlar.Bodrum klassik istirahət mərkəzidir, 7/24 limitsiz yeyib-içmək və dəniz qırağında günəş vannası almaq istəyirsizsə, Bodrum tam sizin üçündür  Amma nəzərə almaq lazımdır ki dəniz suyu çox duzludur, əksər insanlar belə dənizdə çimmək əvəzinə, gözəl hotellərdə olan hovuzlara üstünlük verir.Nömrə 4- PortuqaliyaLissabon - Portuqaliyanın paytaxtı olan Lissabon şəhəri avropanın ən ucuz və ən gözəl şəhərlərindəndir. Hətta havası belə ideal sərin keçən Avropa şəhərlər arasında ən mülayim hava klimatına malik şəhərlər arasında öndədir. Burada yay 6 ay və hətta arada daha da çox müddət olur. Pena Palas adında təbiətdə yerləşən saray turistlər üçün ideal yerdir. Burada gözəl kafelər, təbiət qoynunda istirahət yerləri və qalaların önündə keçirilən tamaşalar ilə turistlərin könlünü oxşayır.Almada Teju çayı sahillərində yerləşən gözəl şəhərin mənzərəsi nəyə istəyirsizsə deyər. Ən baxılacaq və turistləri cəlb edəcək yerlərdən biri İsa Məsihin abidəsi olan yerdir. Braziliyada Rio de Jenairo-da olan eyni abidənin bir az kiçik versiyasıdır. Əlavə ödəniş etməklə həmin abidəyə daha yaxın qalxa bilərsiz, mütləq qalxıb bu zəhmi hiss edin.Nömrə 5- AlmaniyaHamburq şəhəri mənə bir az boz gəldi və buna da səbəblər var. Şəhərdə daim yağış yağır. Axşam 5-6-dan sonra həyat demək olar dayanır, küçədə çox az insan olur, gecə heyatı demək olar yoxdur və əksər obyektlər bağlanır, hətta restoranların əksəriyyəti. Mənim şəxsi fikrim budur ki, şəhər daha çox yaşlı nəsil üçün nəzərdə tutulub. Amma şəhəri gözəl edən körpüləridir. Ən çox körpü sayına sahib şəhər Venesiya deyil, məhz Hamburq şəhəridir. İnsanlar burada Almaniyanın digər şəhərlərindən fərqli olaraq daha gülərüz və yardım sevəndilər.Taksi şoferlərinin hər ikincisi türkiyəlidir. Şəhərdə bankomat qıtlığı var və özünüzlə daima nağd pul gəzdirməlisiz. Əks halda, əsasən də restoranlarda kart qəbul edilməyəndə ( belələri az deyil ) pis vəziyyətdə qalacaqsız.Nömrə 6- MisirŞarm El Şeyx istirahət, qədimlik, dəbdəbəli otellər, əsrarəngiz səhralığı özündə birləşdirən şəhərdir. Burda olduğunuz zaman mütləq meyvələrin dadına baxın, əsasən də mango yeməyi unutmayın. Bu şəhərdəki kimi dadlı mango əminəm daha heç yanda yeməyəcəksiz. Qırmızı dənizin sahillərində yerləşən bu şəhərdə həmişə demək olar yaydır və yağıntıların minimum olan yeridir. Köhnə bazar adında turistik olan yerə getmək məsləhətdir. Ən azından ordan xüsusi ətirlər və xanımlar üçün dəvə kremi almağa dəyər. Səhra zonasında xüsusi maşınları sürmək isə ayrıca bir həzz verəcək. Hətta gəzinti zamanı dəvə üzərində şəkil çəkmək belə daxildir. Özünüzü Ərəb şeyxi və ya qulduru hiss etmək üçün gözəl məkan.Nömrə 7- İngiltərə/BƏƏ/RusiyaLondon İngiltərənin paytaxtı olan bu şəhər öz alicənabları ilə seçilir. Köhnə krallıq adətlərin saxlanılması və buna misal çay mərasimi, kraliçanın olması və böyük işlər görmüş insanları “SER” adı ilə təltif olunması buna bariz nümunədir. Şəhər daima duman içindədir. Boşuna buranı Dumanlı Albion adlandırmırlar. Londonda yağıntı çox olduğundan pessimist olmaq təəccüblü deyil. Temza çayının sahil boyunda çox maraqlı və baxmalı yerlər var. Bunlara misal Big Ben saatı, London Eye karuseli, Madam Tüsso muzeyi və sairə..Dubaya Ərəb Əmirliyinin Monakosu desək, yanılmarıq. Yəni dəbdəbə də, bahalı maşınlar və eksklüziv mağazalara görə Monakodan geri qalmayan şəhər. Bircə fərq burada çox istidir. İlin əksər hissəsini bayırda keçirmək mümkün deyil, ancaq mall və restoranlarda rahat nəfəs almaq olur. Mütləq dünyada ən hündür bina olan 163 mərtəbəli Burj Al Khalifa-ya qalxın. Musiqili fəvvarəni da izləməyi unutmayın, belə bir fəvvarə əmin olun görməmisiz. Son olaraq da milyonçular məhləsi olan JBR -i (Jumeirah Beach Residence) ziyarət edin və Fransız xalqı necə kef etdiyini canlı görün Rusiyanın paytaxtı olan Moskva şəhəri isə hamımıza tanış olan Qırmızı meydan, Lenin mavzoleyi, Kreml və kilsələri ilə göz oxşayır. Moskva çayı ətrafında yerləşən bu şəhərdə demək olar hər millət, təriqət və inanca rast gələ bilərsiz. Son olaraq Tbilisi və Sofiya bir az köhnə sovet tipli şəhərlər olduğundan (mənim fikrimə görə) daha geniş yazmayacam.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Asif ibrahimov

193 dəfə oxunub

Azadlığın şəhəri - Amsterdam

Keçən dəfə sizə Amsterdam yaxınlığındakı qəsəbələrdən danışmışdım. Dedim, ayıb olar, Amsterdamın üstündən keçməyim ????Azadlığın şəhəri Amsterdam…Üçbucaq damlı, qırmızı kərpicli evlər, ağ pəncərələr, evlərin arası ilə gedən tramvay yolları, yol kənarlarındakı kanallar, körpülər… Bir sözlə, gözəllikBaxırsan ki, şəhərdə həm çoxlu insan var, həm də dəhşət sakitlikdir. Tələsən insanlar küçədə bir-birlərinə dəyib, üzr istəyirlər. Yəni, o qədər basabasdı. Həm kalabalık, həm sakitlik… İkisi birlikdə mümkün deyil əslində. Bax, belə qeyri-adi şəhərdir Amsterdam.Dünyanın ən çox turist cəlb edən şəhərlərindəndir. Başdan-ayağa yaşıllıqdır. Kanallarla əhatələnib. Elə kanallar şəhəri də deyirlər arada. 1500-dən çox körpüsü var. Bəzi səyyahların qeydlərində “ikinci Venesiya” kimi keçir adı…Hərənin bir ad qoyduğu şəhərBütün gözəllikləri yaraşdırıblar Amsterdama. Ancaq adı həm də narkotik satışının, eynicinslilərin evliliyinin, fahişəliyin leqal olduğu bir ölkənin paytaxtı kimi çıxıb.Bəzən ürəkli “mən Amsterdama gedəcəm”, – deyə bilmirsən. Düzdür, səni topa tutmurlar. Ancaq dodaqlarının altında gülüş peyda olur. Ardından “ehtiyatlı ol, adı üstündə, Amsterdam. Özündən muğayat ol” – kimi yersiz məsləhətlər verirlər. Qayıdanda da həmin məsləhətləri “küçələrdə oğlanlar öpüşürdü”, “narkotikin dadına baxdın”, “yəqin çoxlu lezbiyan gördün”, “bəs, Qırmızı Fənərlər Küçəsində oldun?” – kimi suallar əvəz edir.Qırmızı Fənərlər Küçəsi – həyatın digər üzü…Bəli, Qırmızı Fənərlər Küçəsində (Red Light District) oldum. Başqa küçələrindən fərqlənmir heç. Eyni gözəllikdədir. İş yerlərinin, ləziz restoranların, yaşayış evlərinin olduğu küçə axşamlar çoxlu sayda insanın gəzib-dolaşdığı Qırmızı Fənərlər Küçəsinə çevrilir.Qırmızı Fənərlər Küçəsindəki kiçik otaqlarda müştərilərinə xidmət göstərən qadınlar haqqında bu yaxınlarda bir kitabda da oxudum. Müəllif onları ”darıxan pişik”lərə bənzədirdi. Necə də yerində bənzətmədir. Bu ifadə niyə mənim ağlıma gəlməyib?Ən maraqlısı da küçələrdə insanların ailəsi, övladları ilə dolaşmasıdır. Yəni, heç də insanların yolu düşsə belə yolunu dəyişib, uzaq durduğu bir məkan deyil. Əksinə, hollandiyalılar ailələri ilə rahat dolaşa bildikləri bu küçənin həyatın digər üzü olduğunu deyirlər. Gələn turistlər kiçik şüşəli qapıların arxasındakı qadınları seyr edir, kimi suvenir mağazalarından hədiyyələr alır, eyni zamanda, ikinci mərtəbədə bir uşaq ağlayır. Anası onu sakitləşdirmək üçün su uzadır. Başqa bir evin pəncərəsinə televizorun mavi işığı düşür… “Qırmızı Fənərlər küçəsi”ndə həyat davam edir…Niyə azadlığın şəhəri?Tarixdən balıqçı şəhəri kimi qurulduğu deyilir. Əsrlər boyu bir xeyli olaylara səhnə olub. Amsterdama dünya müharibələrinin təsiri böyük olub. Deyilənlərə görə sonralar müxtəlif ölkələrdən gələn insanların hesabına yenidən toparlanıb. Bu gün dünyanın ən yaşanılacaq şəhərlərindən biridir.Adına azadlığın şəhəri də deyilir. Bunun da səbəbi var:“Qırmızı Fənərlər Küçəsi” ətrafındakı əyləncəli gecə həyatı;“Coffeeshop” adı verilən yerlərdə yüngül narkotik maddələrin istifadəsinin sərbəst olmasıŞəhər mərkəzindəki Dam Meydanı, Qırmızı Fənərlər Küçəsi (Red Light District), gül bazarı (hər cür gül toxumu və məşhur holland laləsinin soğanları satılır), Van Qoq Muzeyi, Kanal gəzintisi… Hamısı şəhanə idi.Bir sözlə, həyəcan, çılğın gülüş səsləri, eyni zamanda sakitlik və hüzur. Belə yadımda qaldı Amsterdam.Necə gedək?Amsterdama müxtəlif yollarla getmək olur. Bakıdan birbaşa da getmək olar. Tbilisiyə gedib, ordan İstanbula, İstanbuldan da Amsterdama uça bilərsən. Mən belə etmişdim. Burdan 15 manat verib avtobusla Tbilisiyə, oradan Pegasusla 50 avroya İstanbula, İstanbuldan (Türk Hava Yolları ilə. Bileti 42 avroya almışdım) Amsterdama. Uzun görünə bilər. Səyahətçiyə zövqdür. Əsas məsələ ucuz başa gəlməyidir.Yola təxminən 104 avro xərcləmişdim. Əslində daha ucuzunu da tapmaq olar.Harada qalaq?Əgər bir həftəlik gedirsənsə, azı 600 avronu gözdən çıxar. Amsterdam heç də ucuz şəhər deyil. Orta statistik azərbaycanlıya baha gələ bilər. Ən çox pul mehmanxanaya çıxır. Əgər daha ucuz alternativlər seçsən, 1 həftəyə 500 avro da xərcləyə bilərsən. Məsələn, hostellərdə və ya şəhər mərkəzindən kənardakı otellərdə qalmaqla. Onsuz da nəqliyyat sistemi o qədər gözəl qurulub ki, kənardan mərkəzə gəlməkdə çətinlik çəkməyəcəksən.Holland pendiri və HeinekenO ki qaldı, nə yeyib-içməyə. Hollandiyanın məşhur pivəsi Heinekenin dadına baxa bilərsən. Heineken demişkən, pivə sevənsənsə, Pivə Muzeyinə getməyi də unutma. Səhv xatırlamıramsa giriş 12 avrodur. Biletə həm də bir dənə pivə düşür. Məşhur holland pendirindən mütləq ye. Şərt deyil pul verib alasan. Pendir mağazalarında pulsuz dadına baxa bilərsən.Bu zaman əmin olacaqsan ki, Bakıda holland pendiri adı ilə satılan nəsə başqa daddır. Ancaq 100 faiz holland pendiri deyil ? Məşhur milli yeməklərinə rast gəlmədim. Amma şəhərdə dadlı ət bişirən “Steakhouse”-lar və qəşəng italyan, türk restoranları var. Ən yaxşısı və ucuzu isə marketdən alış-veriş etməkdir.Necə deyərlər, səyahətini ucuz və ya bahalı etmək öz əlindədir. Seçim sənin…Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Guler Mehdizade

382 dəfə oxunub

Trabzon, Rizə - Qaradəniz (Karadeniz) turu

Hamıya salam. Ümid edirəm ki, hər şey yaxşıdır, dostlar. Sizə yaxın zamanda getdiyim, Covid-19 pandemiyasından sonrakı ilk turumdan, Karadeniz səyahətimdən danışmaq istəyirəm. Əvvəlcə, onu deyim ki MÖHTƏŞƏM idi.İstanbuldan Qaradənizə təyyarə ilə 1,5 saata getdik, Pegasusun işçiləri bizlərə necə həsrət qalmışdılarsa, yüksək əhval - ruhiyyə ilə qarşıladılar və yola saldılar bizi, hələ pilotu demirəm. Amma nə HES kodunu yoxladılar, nə maska verdilər, nə də əllərimizi dezinfeksiya etdirdilər. Bu belə. Bileti gediş-dönüş 645 tl’yə aldıq. Havalimanına gəlib elə oradaca maşın icarəyə götürdük. (Şirkət: Esas), Dacia Duster (5 gün 650 tl + 1000 depozit), məsləhətli maşındır. Çalışın 4x4 olmasa da yaylalara çıxacaqsızsa, hündür maşın götürün.Ümumiyyətlə, maşın icarəyə götürmək bu tur üçün ən yaxşı variantdır. Dizel motor - ortalama 5 günə 470 tl pulumuz çıxdı. Maşını alıb birbaşa Rizəyə otelimizə (Keleş otel) getdik. Rizə şəhərini heç sevmədim. Hər gün bir oteldə qaldıq. Və sezon olmadığı üçün sifariş rezervasiyası etmədim, hamısını zənglə sifariş etdim və gedib, yerində görüb, dəyərləndirib elə qalmağa qərar verdim. Bron qiymətləri ucuz, amma telefon qiymətləri baha idi. Qısaca, çənə döymək lazımdır. Otel pis deyildi, lakin çox əksikləri vardı, səhər yeməyi isə yaxşı idi. Şəhərin mərkəzində olduğu üçün bir gecə orada qaldıq. (200 tl ) Həmin gün Fırtına dərəsinə getdik, orada Eveli Cafe var. Rizedə 3 gün qaldıq və səhər yeməkləri yaxşıdır deyə hər gün bu kafeyə gəldik. Zipline 20 tl -e, rafting isə 70 tl - dir. Rizedə 3-4 yemək çeşiti var - ızgara, alabalık və s. Osmanlı restoranı da məsləhətlidir. Qiymətlər isə çox münasib idi. İki nəfərlik yemək hər yerdə ortalama 100 liraya başa gəlirdi. Deyildiyi kimi Ayder yaylasında və ora gedən yolda təmir işləri gedirdi. Hər gün sadəcə 1 saat vaxt verilir ora getməyə. Biz getmədik. Birdən oralarda otel rezerv edərsiniz, etməyin. Ikinci gün getdik Pokut Yaylasına, çoooox bəyəndim. Havası təmiz, buzz kimi. Az insan çox huzur:)Iki gün Oris Green oteldə qaldıq, çox gözəl və təmiz idi. Oteldə bizdən başqa müştəri yox idi və otel sahibləri çox şirin insanlar idi. Üçüncü gün yenə oteli dəyişib, bu səfər də Kotit Bungalowda qaldiq. Oranın ambiansı bir başqa idi. Kaş ki daha çox vaxtım olardı və bir günümü heçnə etmədən orada keçirərdim. Bir gecəsinə 500 lirə ödədik, hər bungalow max 4 nəfərlikdir, 2 mərtəbədir. Üç gün gedib Huser Yaylasında qaldıq. O məşhur sis dənizi olan yaylaya, amma təəssüf möhtəşəm buludları görə bilmədik. Huser yaylasına gedən yol ürkütücü və qorxuludur. Dua edə - edə çıxıb düşmüşük. Dəyərdi mi? Dəyərdi. Hələ o yelləncək. 10 lirəyə istədiyin qədər uç. Yaylada dağların mənzərəsi başqa gözəl olur. Yaylalara gedib-qayıtmaq xeyli vaxt alır. Məncə, bir gündə 2 yayla gəzmək olar. Maşın yoxdursa, turlarla da gedə bilərsiniz. Dördüncü gün günorta Uzungölə getdik, yola 2 saat vaxt sərf etdik. Orada İnci oteldə qaldıq, səhər yeməyi (yaxşı deyildi) daxil 200 lirə, otağımız gəşəng idi.Uzungöldə vaxtımız az olduğundan sadəcə Karestel yaylasına getdik, yeməyimizi də Ada restoranında yedik (çox bəyəndim). Beşinci gün Trabzona getdik, orda da Cemil Hoca’ya axşam yeməyinə getdik (10 numara 5 yildiz), qaldığımız otel isə Hanzade Park Hotel (çox bəyəndim), 200 tl. Trabzon Rizədən daha maraqlı idi, downtown hərəkətli idi, Boztepe pis deyildi. Sümela bağlı olduğundan getmək məsləhət görülmedi. Belə belə işlər. Bir sözlə kim deyir ki, Rize, Trabzon maraqsızdır, inanmayın. Mən daha çox vaxtımın olmağını və daha çox kəşf etməyi arzulayırdım.Bildiyim yerlərdən suallarınız olsa, sevə -sevə cavablaya bilərəm.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Afshan Babazade

267 dəfə oxunub

Lissabon yaxınlığındakı qəsəbələr

Bu dəfə isə sizə Lissabon yaxınlığındakı qəsəbələr və görməli yerlərdən danışacağam ????Avropanın ən uc nöqtəsindən baxarkən...Keçən dəfəki yazılardan birində sizinlə Lissabon haqqında bölüşmüşdüm. (https://seyahetci.com/tarixle-muasirliyin-kesisdiyi-lissabon/).O tarixlə müasirliyin kəsişdiyi, möcüzəli Lissabonun ətrafı özündən də gözəldir.Lissabonu gəzməyə 2-3 gün ayırandan sonra biz növbəti gün maşın kirayələdik və ətrafdakı qəsəbələrə üz tutduq. İlk gün yolumuzu Coba Da Roca burnu və kiçik, şirin sahil qəsəbəsi Cascaisdən saldıq. Ericeira, Sintra və Mafra qəsəbələrini doyunca gəzə bilmək üçün bir gün sonraya saxladıq. Elə bu 3 qəsəbə barədə yazmağı da gələn dəfəyə saxlayıram.ANS demiş, indi isə yaxın əyləşin, Cascais və Cabo Da Roca barədə daha ətraflı ☺️Zənginlərin, mühacir yazar və sənətçilərin məkanıCascais qəsəbəbəsi Taxo (Tejo) çayının girişindən başlayıb, düz Oeiras şəhərinədək uzanır. Hazırda qəsəbənin 200 mindən artıq sakini var. 19-cu əsrin əvvəllərində Cascaisin əhalisi az olub. Bura kiçik, balıqçı qəsəbəsi kimi tanınırmış. Az keçməmiş ingilis tacirlər və avropalı aristokratların tətil məkanına çevrilib.İkinci Dünya Müharibəsi ərəfəsində isə döyüşdən qaçanların - siyasətçilər, aristokrat, sənət adamları və yazarların sığınacağı olub. Öz adıma deyim ki, burada yaşayan hər gün yazıb, yaradar.Zənginliyin gətirdiyi qumarxana və limanCascais yay aylarında Avropanın varlı ailələrinə ev sahibliyi edir. Onu da deyim ki, Avropanın ən böyük qumarxanası “Casino Estoril” də buradadır. Zənginliyin gətirdiyi daha bir məkan isə Marina de Cascais limanıdır. Bu liman 650 qayığa ev sahibliyi edir. Cascais yay aylarının həftə sonları avtomobili olan lissabonluları da qonaq edir.Gözəl və ürəkaçan sahillər buranı ideal çimərliyə çevirir. “Balıqçı Çimərliyi” (Praia dos Pescadores) yayda adam qaynayır. Həftə sonları ümumiyyətlə, yer tapmaq çətin olur. Vaxtımız az, getməli yerlər çox olduğu üçün biz çimərlikdə vaxt keçirə bilmədik. Həm də getdiyimiz gün səhər tezdən yağış yağmışdı. Hava azcana soyuq idi.“Cəhənnəm Ağzı” - The Boca do InfernoElə Cascaisin özündə də görməli yerlər çoxdur. Qəsəbə uzun-uzun, tənbəl-tənbəl gəzilməli yerdir: bura gəldinsə, gərək hər nöqtəsinin dadını çıxardasan. Məsələn, “Cəhənnəm Ağzı” deyilən yerin adına yox, mənzərəsinə baxın siz. Qəsəbənin ən gözəl yerlərindəndir. Atlantik Okeanına açılan dəhlizindən görünən mənzərəni yemə, içmə saatlarca seyr elə. Qayalara çırpılan dalğalar ağ köpüklər yaradır. Elə bil okeana vanna köpüyü tökmüsən. Yuxarıdan baxanda adama elə gəlir ki, okean qaynayır. Sağa-sola, aşağı-yuxarı hərəkətlər edir. Gözünü ayırmadan baxanda adam vahimələnir. Üzə bilsəm də, ayağım sürüşsə, yıxılsam boğulub, ölərəm deyə, düşünürdüm.Bura həm də balıqçıların məkanıdır. Şəkil çəkdiyimizi görüb, bizə gün batımını buradan seyr etməmizi təklif etdilər. Təəssüf ki gözləməyə vaxtımız yox idi.“Ev deyil, şato, şato, canım”Qəsəbədə çox gözəl bir ev də var. O məşhur türk serialında deyildiyi kimi, əslində ev deyil, şatodur ????Adı Casa de Santa Mariadır. 1902-ci ildə tikilib. Yerli sakinlərdən öyrəndik ki, bura keçmişdə varlı bir irlandiyalı tacirə məxsus olub. Həmin dövrlərdə Cascaisin ən göstərişli və lüks tikilisi sayılırmış.Santa Marta Mayak Muzeyi - Farol Museu de Santa MartaEvin, pardon, şatonun düz qarşısında Santa Marta adlı mayak (gəmilərə yol göstərmək üçün siqnal işığı olan hündür qüllə, dəniz fənəri) ucalır. Francisco Pereira da Silva adlı şəxs tərəfindən inşa etdirilib. 2007-ci ildən bu yana Santa Marta Mayak Muzeyi kimi işləyir. Vaxtınız olsa, içinə girib, gəzə, hətta mayaka qalxa, oradan Cascais mənzərəsini seyr edə bilərsiniz.Portuqaliya okeansahili ölkə olduğundan burada mayak, dənizçilik muzeyləri, limanlar, gəmilər, balıq, balıq yeməkləri məşhurdur. Hər addım başı dənizçilik mədəniyyəti ilə qarşılaşırsan. Havada asılı qalan dəniz, yosun qoxusu da bunu unutmağa imkan vermir.Bu arada, unutmadan deyim ki, Santa Marta Mayak Muzeyinə giriş təxminən 5 avro civarında idi.Cascais Qalası - Cidadela de CascaisBundan başqa qəsəbədə Cascais Qalası da var. Düz mərkəzdə, limanın arxasındadır. Binanın üzündən tarix, qədimlik yağır. Yerləşdiyi ərazidə başqa hökumət binaları da var. Daş döşənmiş meydanın mərkəzindəki tarixi bələdiyyə binası kimi.Avropanın ən uc nöqtəsindəCascaisə səhər saat 8-də gəlmişdik. Günortadan sonra, təxminən 3-4 arası buradan Cabo Da Roca burnuna tərəf yola düşdük. Təxminən 30 dəqiqəlik yol idi.Bura “ən xoşbəxt olduğum yer” də deyirəm. Xoşbəxtlik deyəndə nədənsə ağlıma bura gəlir. Kimi Avropanın, kimi dünyanın sonu adlandırır. Söhbət Avropanın Qərb tərəfdən ən uc nöqtəsi, sonu olan Cabo da Roca-dan gedir. Qısacası, Roca burnu.Xoşbəxtliyi xatırladan və “sonsuzluğa” açılan pəncərə...Ərazidə dəniz fənəri və balaca bir kafe var. Bir də suvenir satılan mağaza... Başqa da heç nə. Amma möhtəşəm abu-havası adamı sərxoş edir. Uçurum boyu ağac parçalarından çəkilən çəpər uzaqdan baxanda dəhlizə bənzəyir. Uçurum Atlantik Okeanına açılır. Uzaqdan gələn, dalğaların qayalara çırpılarkən çıxardığı səs səni ovsunlayır və tamamilə öz abu-havasına salır. Qonaqlar şəkil çəkdirir, mənzərənin dadını çıxarırlar. Havasından isə heç danışmayım, tərtəmiz, ləzzətli, çək ciyərlərinə...Bir xeyli gəzib, şəkil çəkdirəndən sonra buradakı kafedə okean mənzərəsində qəşəng bir Porto şərabı içdik. Porto Portuqaliyanın şəhərlərindən biridir. Həm gözəlliyi, həm də şərabları ilə məşhurdur. Şərabları xüsusi şirin olur. Nəticədə, nə qədər içdiyinin fərqində olmursan, bir də ayılırsan ki, hazırsan ????Nə isə, Roca burnuna mütləq getmək lazımdır. Mən hətta ora ikinci səyahət planlayıram. Oradan aldığım foto isə yazı masamın üzərində, ən görməli yerdədir. Nə vaxt keyfim olmur, baxıram, baxanda xoşbəxtliyi xatırlayıram ????Bura sonsuzluğa açılan pəncərə kimi qalıb yadımda. Hər ağlıma gələndə, “hələ ümid var, tükənməyib” – deyib, təskinlik tapıram.Bu yerlərə necə gedə bilərik?Biz yaxın qəsəbələri gəzmək üçün 2 günlük maşın kirayələmişdik. Günü 60 avroya (Fiat Punto). Mühərriki kiçik olduğundan günlük benzin sərfiyyatı da aşağı idi. 2 günə benzinə 30 avro xərclədik. Pullu yollardan istifadəyə görə 2-3 avromuz çıxdı.Cascaisə qatarla da getmək mümkündür. Eləcə də Roca burnuna avtobusla getmək olar. Mən isə deyərdim ki, istədiyiniz yerdə saxlayıb, şəkil çəkdirə-çəkdirə getmək, rahat gəzmək üçün avtomobil kirayələyin.Bakıdan Lissabona isə “Aeroflot” (Rusiyanın hava şirkəti) və Türk Hava Yollarının (THY) reysləri ilə gedə bilərsiniz. Qiyməti gedəcəyiniz günlərə və bileti nə qədər öncədən almağınıza görə dəyişir. Gediş-gəliş üçün minimum 500 manatı gözdən çıxarmalısınız. Mən başqa cür etdim. Bakıdan “Wizzair”-lə (Macarıstanın hava şirkətidir) Budapeştə (Macarıstan), oradan İspaniyaya, daha sonra isə Portuqaliyaya getdim. Sonda da Portuqaliyadan yenə Budapeştə, oradan da Bakıya döndüm. Gediş-gəlişə təxminən 300 manat xərclədim.Nə yeyək-içək?Yeməyə gəlincə, Portuqaliya Avropanın balıq məkanıdır. Balıq və qırmızı ət məbəxlərinin olmazsa olmazıdır. Yanında müxtəlif növ paella (bulğura oxşayan düyüdən hazırlanmış, qırmızı, sarı və ya qara rəng çeşidləri olan plov növü), souslu tərəvəzlər və s. ilə servis edilir. Mən Portuqaliyada olduğum müddətdə yalnız dəniz məhsulları yedim. Sizə də məsləhət görürəm. Bir sözlə, dənizdən çıxan hər şeyi bişirir, çox gözəl də servis edirlər.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər… Paylaşdı: Guler Mehdizade

328 dəfə oxunub

Saxurların gözü Mamrux

Bugün çoxdan arzuladığım bir səfəri reallaşdırdım. Velosipedlə aramızda bir dağətəyi kənd olan Mamruxa getdim. Belə yerlərdə iki ya 3 nəfərlik qruplar arzuolunandır. Mən də hər zamankı kimi Şıxəmirlə getdim. Səfərimizi səhər 6 - da düşünsək də tez olduğuna görə 8 - ə dəyişdik. Bir saata kəndə çatdıq.Öncə kənd məscidinə, onun həyətindəki köhnə Alban məbədinə baş çəkdik. Məscid bölgə memarlığı üslubunda tikilib. Doğma olan üslubu burada da görmək ruhumuzu oxşadı. Karantin dövründə olduğumuz üçün təəssüf ki, bağlı idi. Sadəcə həyətində gəzə bildik.Deyilənə görə, Alban məbədi sovet dövründə tövlə kimi istifadə olunub. Hazırda isə baxımsız vəziyyətdədir. Ancaq bir həyətdə həm saxurların xristian olduqları dövrdə tikilən köhnə bina, onunla eyni həyətdə yenə saxurların müsəlman olduqları müasir dövrdə tikilən məscid vardı. Bu tandem xoş təəssürat yaradır.Ondan sonra məscidin sol tərəfindən 150 metr aralıqda yerləşən, divarında ərəbcə məlumat lövhəsi olan körpüyə baş çəkdik. Ətrafı iri ağaclarla əhatə olunan bu körpünün altından su axmırdı. Bu bir növ körpünü yararsızmış kimi göstərir. Amma çay yatağının dərinliyi maşın və hətta at arabasının da keçidinə əngəl törədir.Daha sonra kənd mərkəzində biraz gəzdikdən sonra çay içməyə getdik. Kənd əhalisinin mehribanlığı, hər kəsin bir-birilə salamlaşmağı diqqətimdən yayınmadı. Bizim də kənddə hamı bir-birinə salam verir. Bu çox bəyəndiyim adətdir. Allahın adını bir-birimizə ötürürük. Burada isə bu hərəkət xüsusi mehribanlıqla edilirdi. Yorğunluğumuz, çayın ləzzətli dəmi, havanın istiliyi, hər zamankı zarafatlarımız deyərkən bir saata yaxın vaxt keçdi, dincimizi alıb, yola çıxdıq.Ordan çıxarkən Mamrux kənd məktəbinin müəllimi, araşdırmaçı Sakit müəllim bizi qonaq çağırdı. Mamruxun ümumi tarixindən, onun fərqli dövrlərdə yaşadığı tarixi, mədəni dəyişikliklərdən söhbət elədi. Bu gün həm də bizi maraqlandıran digər məsələ Mamruxun incisi deyə biləcəyimiz Armatay ( Ay ilahəsi) məbədi haqqında öyrənmək, mümkün olsa ora qalxmaq idi. Təəssüf ki, məlumat alsaq da, bələdçisiz ora qalxmaq qeyri-mümkündür. Dağ-meşə içində dağılmaqda olan məbədi tapmaq xeyli müşkül olacaqdı. Mamruxun qədim olduğunu bilirdim. Amma dəmir dövrünə aid məbədlərin, qəbirlərin varlığından xəbərsiz idim. Kəndə olan marağım daha da çoxaldı. Uşaq vaxtı arı köçləri ilə bura gələndə kəndin gözəlliyi az-çox yadımda idi. Amma bugün bir təbiətsevər olaraq bu gözəlliyə  vuruldum. Sakit müəllimin qonaqpərvərliyi, danışdığı maraqlı tarixi hadisələr(özü tarix müəllimidir), regionun tarixi əhəmiyyəti barədə bir çox mövzular mənim üçün əsl meditasiya oldu.Yenicə çıxmışdıq ki, rəssam Əhməd müəllim, hələ də, kənddə olub - olmadığımızı soruşdu. Dünən gələcəyimi xəbər vermişdim. Təzədən yeni Mamruxdan köhnə Mamruxa qalxdıq, dağın lap dibinə. Dünəndən velosiped sürdüyümə görə xeyli çətinlik çəkdim. Şıxəmir isə hər gün sürməyinin verdiyi rahatlıqla rahatca davam edirdi. Həqiqətən həyətinin dizaynı, evinin divarlarındakı rəsmlər, evin rəssama məxsus olduğunu deyir. Bütün kəndi, dağ və meşələri görə biləcəyimiz kəndin bu hissəsində saxurların milli-mədəni məsələləri barədə söhbət elədik. Sakit müəllimin danışdığı tarixi faktların üstünə Əhməd müəllimlə də daha çox sosial mövzuları xırdalamaq Mamrux və onun saxurların tarixindəki rolunu daha aydın başa düşdüm.Daha sonra qonşuluqda olan, Qafqaz Albaniyası dövründə imarət olsa da hazırda tövlə kimi istifadə olunan bir binaya baş çəkdik. Baxımsız vəziyyəti ilə bəlkə də 20-25 il ömrü qalıb. Ya da ev sahibi yeni tövlə tikərkən sökməli olacaq. Çox acınacaqlı vəziyyətdir. Ümumiyyətlə, Zaqatalada çoxlu tarixi binalar eyni taleyi yaşayır. Şəhər mərkəzindəki alban kilsəsi də həmçinin. Sağollaşıb, üzü bizim kəndə doğru yol aldıq. Kənddən çıxandan sonra bir kənardan Mamruxun aşağıdan şəklini çəkdim. Həqiqətən tam da yaşamaq istəyərəm dediyim yer idi. Ətrafında dağ meşələri, içindən və yanından axan çaylar, geniş bağlar, səmimi insanlar. Bir sözlə, mənə görə hüzuru tərif edəcək çox şeyləri burada tapdım. Bir də Zaqatalada Çardaxlar kəndini bu qədər bəyənirəm. Amma Mamrux artıq ilk pillə oldu mənim üçün.Bugün yaşadığım digər təcrübə isə Mamruxun qonaqpərvərliyidir. Sakit və Əhməd müəllimi Facebook sosial şəbəkəsi üzərindən söhbətlərimiz olsa da ilk dəfə real görüşürdük. Bizi sanki illərin tanışları, dostları kimi qarşıladılar. Belə fikirləşirəm ki, kimsə mənə evini açıbsa ora getməmək ədəbsizlikdir. Bu gözəl insanlar sayəsində Mamrux çox gözəl xatirələrlə yaddaşıma həkk olundu. Onlar mənə görə bütün Mamruxu təmsil edirdilər.Kəndimizdən olan, Gəncədə yaşayıb-yaratmış saxur yazıçımız Əhməd İsayev son əsərlərindən birini kəndimizə həsr edib. Adını da “Saxurların gözü Suvagil” qoyub. Bizim kənd dünyada saxurların kompakt yaşadığı ən böyük yer olsa da (təxminən 7000 nəfər – 1400 yaxın ev) mənə görə gözəllik və tarix baxımından “Saxurların gözü Mamrux”dur.Hər bir Azərbaycanlının öz milli-mənəvi dəyərlərinə sahib çıxaraq, onları qoruyub saxlaması ümidi ilə.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Murad Akifsoy

346 dəfə oxunub

Türkiyənin rənglərlə zəngin kəndi - Alaçatı bələdçisi

Türkiyənin İzmir şəhəri yaxınlığında Çeşmə yarımadasında, Egey dənizinin sahilində yerləşən bu kənd son illərdə turistlərin ən çox diqqətini çəkən yerlərdəndir. Xüsusilə də Aralıq dənizinin istisini sevməyən insanların ən çox bəyəndiyi adreslərdəndir. Ən əsası da Yunan adalarını gəzib kəşf etməyin xəyalını qurub lakin həm bahalı təyyarə biletlərinə görə həm də Şengen vizasını almağın dərdindən bu fikirdən daşınan səyyahlar üçün ən ideal seçimdir.Mən bu şəhərin yaxınlığında balaca kəndə səyahət eləməmiş də İzmir şəhərini Türkiyənin Avropası adlandırdıqlarını dəfələrlə eşitmişdim. Lakin burda olduqdan sonra Egey insanlarının İstanbuldakı türklərlə müqayisədə daha nəzakətli, mehriban, muasir, alicənab olduğunun özüm şahidi oldum. Tarix boyu bu ərazidə məskunlaşan türklər yunanlar ilə qaynayıb qarışmış, onların da adət-ənənələrini və fikirlərini götürmüşlər. Ancaq qonaqpərvərliyə gələndə məncə elə əsl türk millətidir.Alaçatı ucuzdur yoxsa bahalı sualının cavabı isə əlbəttə ki çox bahalıdır. Hətta qeyd etməkdə fayda var ki, buranın yerli sakinlərinə görə yaxşi ki bahalıdır. Çünki bahalı olmasaydı hər kəs gələrdi və burada yaşayanlar bu ovuc içi boyda yerdə yaşamaqda daha çox əziyyət çəkərdilər. Alaçatı tətili üçün neçə gün bəs edər? Bu daş evləri,butik otelləri, lavanda çiçəyinin qoxusu gələn küçələri gəzməyə 4-5 saat kifayət edir. Düzdü yay tətilinə gəlmisinizsə kristal sulu Egey dənizinin kənarında salınmış qızmar qumlu çimərlikləri üçün 3-4 gün qalmaq olar. Ancaq çalışın bayram ərəfəsində getməyin. Çünki əcnəbi turistlərlə yanaşı türklər də bura bir neçə günlük tətili fürsət bilib axın edir və bu hal dar küçələrdə gəzməyi biraz daha da çətinləşdirir. Biz 2018ci ilin iyun ayında Ramazan bayramında 3 günlük getmişdik. Ramazanın türklər üçün nə qədər önəmli bayram olduğunu bilənlər ordakı sıxlığın mənzərəsini artıq təsəvvür eləmiş olar məncə.Alaçatıya hava limanından necə getmək olar? İzmirin kəndi olduğu üçün buranın hava limanına çox da yaxın olduğu düşüncəsinə qapılmayın. Alaçatıya İzmirin Adnan Menderes Hava Limanından gedib çıxmaq üçün əgər sizi hava limanından qarşılayan otelin birbaşa transferi yoxdursa bir neçə dəfə nəqliyyat dəyişməli olacaqsınız. İzmir hava limanından Alaçatıya məsafə 85 km-dir. Hava limanından çıxdıqdan sonra HAVAŞ avtobuslarından istifadə edərək Çeşməyə birbaşa gedən avtobusdan düşdükdən sonra oradan minibuslarla Alaçatıya gedirsiniz. Aprel-Noyabr aylarında həyata keçirilən Havalimanı- Alaçatı səfərləri havalimanından 00:30, 03:30, 08:30, 10:30, 12:30, 14:30, 16:30, 18:30, 20:30, Çeşmədən isə 02:30, 04:20, 06:30, 08:30, 10:30, 12:30, 14:30, 16:30, 18:30, 20:30 saatlarında yola çıxır. Təqribən 1 saat yarım davam edən yolun gediş haqqı isə 30 TL- 7,45 AZN təşkil edir.Alaçatıda harda qalmaq olar? Alaçatı butik otelləri, daş evləri ilə ad salan kənd olduğu üçün bura gedib ən azı 1 gecəlik belə olsa hovuzlu, bostanında organik, təravətli meyvə tərəvəzi özləri becərdikləri məhsullardan hazırlanan səhər yeməyini yemədən buradan ayrılmaq olmaz. Biz Ev Bharat adlı butik oteldə 3 gecə gecələdik. Bayram vaxtı olduğundan qiymətlər hər zamankından 2 qat daha baha idi və bu oteli mən 2ay əvvəl bron eləmişdim. Ancaq yenə də ən pik vaxtlarda getsəz 1gecəsi 170AZN olacaq. Digər tövsiyyə edəcəyim otellər Alaroof Butik Otel, Vivento Otel Alaçatı, Alaçatı Eski Ev Otelidir. Balayı üçün bura üz tutmusunuzsa İğdeli Han Suite möhtəşəm seçim ola bilər.Alaçatıda gəziləcək yerlər Əslində həm hər yer biri-birinə çox yaxın olduğu üçün həm də çox balaca kənd olduğundan gəziləcək yerləri özünüz dar küçələrilə piyada gəzərkən kəşf edəcəksiniz. Ancaq hər yerdə olduğu kimi buranın da mütləq görülmədən evə qayıdılmayacaq yerləri var.1) Alaçatı Yel Değirməni Köhnə və yeni Alaçatı ərazisində bir çox külək fəndləri var ki, bu da demək olar ki, bütün il boyu küləklər yaradır. Alaçatının mərkəzindəki bir təpədə yerləşən qədim yel dəyirmanları buranın yorğunluğunu atmaq və ən əsası da gün batımını seyr etmək və sözün əsl mənasında yaşadığımızı hiss eləməyimiz üçün ən möhtəşəm yeridir bu gözəl kəndin.2) Alaçatı evləri Bu evlər hər küçədə, hər döngədə görəcəyiniz yunanlar tərəfindən tikilən daş evlərdir.3) Alaçatı Port Port Marinada gecələr təşkil olunan əyləncələr, gecə klubları gecə həyatı həvəskarları üçün ideal yerdir.4) Kemelpaşa Caddəsi Ən çox alış veriş etmək istəyənlərin gəldiyi bu meydan kafe və restoranlari ilə məşhur yerdir.5) Dutlu Qəhvə Adını kölgəsində məskən saldığı tut ağacından götürən bu restoran dadlı yeməkləri ilə bura gələnlərin ilk baş çəkdiyi məkanlardandır. Bu arada bura qədər gəlmişkən İzmirin ləzzətli kumrusunu yemədən qayıtmayın.6) Alaçatı Meydanı 7) Aya Yorgi Körfəzi8) İmren Pastanesi- Sizə tovsiyyəm buradan evə mütləq saqqızlı lokum alıb aparmağınızdır. Mən 2 il əvvəl aldığım lokumu hələ də saxlayıram.9) Egey Dənizi Çimərlikləri Bura gələnlərin bu qədər diqqətinin ən əsas səbəni də Egey dənizin sahilində məskən salmasıdır. Günəşlənib doyunca üzüb otelinizə qayıdarkan bir də son tövsiyyəm Da Franco-dan dadı damağınızda qalacaq ləzzətli dondurmalarından almağımızdır. Ümid edirəm siz də bu səyahətdən mənim kimi bol xatirə ilə qayıdacaqsınız. Xoş istirahətlər.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Ulkar Ismayilzada

642 dəfə oxunub

Avropanın ən məşhur şəhərləri - Herodotun izi ilə

"Heç bir şey səyahət kimi zehni inkişaf etdirmir" - Emil ZolaMövzuya başlamamışdan öncə onu qeyd etmək istərdim ki, səyahəti sevən birisiyəm və 11 ölkə, 24 şəhərdə olmuşam və şəkillərin də hamısını özüm çəkmişəm.Ölkə olaraq- Fransa, İtaliya, Rusiya, Gürcüstan, BƏƏ, Türkiyə, Portuqaliya, İngiltərə, Almaniya, Bolqariya və Misir.Şəhərlər olaraq isə- Nitsa, Monako, Paris, Marsel, Kann, Roma, Vatikan, Venesiya, Florensiya, Moskva, Tbilisi, Dmanisi, Dubay, İstanbul, Bodrum, Marmaris, İzmir, Lissabon, Almada, Sintra, London, Hamburq, Sofiya və Şarm El Şeyx.Bəli çox deyil, amma az da deyil məncə.Ən əsası da qeyd etdiyim yerlərdən qatar ilə keçməmişəm, hər birində ən azı 3 gündən artıq yaşayıb şəhərlərin abu-havasını öyrənmişəm )))TarixçəSəyahət - hər hansı bir ərazini və ya su sahəsini, onları öyrənmək üçün, eləcə də ümumi təhsil, bilişsel, idman və digər məqsədlər üçün hərəkət etmək deməkdir.Tarixdən ilk səyahət edən şəxs kimi Herodot tarixə düşmüşdür.Helicarnassusda 484-cü ildə anadan olan Herodot daha yaxşı bir tarixçi və hətta bir yazıçı kimi tanınır, ancaq onu dünyanı gəzən ilk məşhur səyyah adlandırmaq olar.Nömrə 1- FransaFransız mədəniyyəti yoxdur. Fransa bir mədəniyyətə sahibdir və rəngarəngdir.Fransa həqiqətən çox rəngarəng mədəniyyət sahibi, kübar insanların məskəni sayılacaq yerlərdəndir. 4 şəhəri xüsusi qeyd etmək istərdim:MonakoMonako əslində şəhər deyil də krallıq hesab olunur və əhalisi 40.000 yaxındır.Monako da gördüyünüz hər detal dəbdəbə göstəricisidir. Bahalı yaxtalar, ancaq oyunlarda və musiqi kliplərdə gördüyünüz maşınlar və kazino...Kazinoda əsasən yaşlı nəsil, pensiya yaşında son şanslarını oyun avtomatlarında cekpot udmaq ümudi ilə keçirdiyini görə bilərsiz. Monakoda olduğum dövrdə gülməli hadisə baş vermişdi. Yemək yediyim vaxt göydən bir göyərçin üstümə öz ehtiyacını etmişdi.  Bu milyonçu olmaq deməkdir, hələ də gözləyirəm..Nitsa/KannKann şəhəri ən populyar festival keçirilən şəhərdir və dəbdəbədə Monakodan heç də geri qalmır.Kann festivalı keçirilən ərazidə hər gün hər hansı bir tədbir və ya canfəşanlıq baş verir.Nitsa şəhəri isə öz Lazur sahili ilə çox populyardır. Nitsada olan hər adam Lazur sahilərində heç olmasa bir dəfə olsun belə çimib və günəş vannası alıb. Burada insanların çılpaq şəkildə günəş alması normaldır. Bu hal çox normal qarşılanır, amma bura nudist çimərliyi deyil bunu da nəzərə almaq lazımdır ))ParisParis şəhəri hamımıza Fransanın paytaxı və Eyfel qülləsi ilə tanışdır əlbəttdə ki. İlk öncə onu qeyd edim ki, dünyada ən çox turist qəbul edən şəhər Parisdir. Burada addımbaşı cütlükləri görə bilərsiz. Şəhərdə yağışlar tez-tez ola bilər və hətta yayın qızmar cağında belə yağış yağır. Senna çayı üzərində gəmi gəzintisi ilə siz Eyfel qülləsini bir başqa gözəl rakursdan görə bilərsiz. Bundan əlavə elə eyni gəzinti zamanı ABŞ-dan bizə tanınan Azadlıq heykəlini görə bilərsiz. Ümumiyyətlə, Azadlıq heykəlini ABŞ-a Fransa hədiyyə edib, ABŞ-da öz növbəsində Azadlıq heykəlini cavab hədiyyəsi kimi Fransaya təqdim edib, amma 4 dəfə daha kiçik nisbətindəNömrə 2- İtaliyaİtaliyada ilk qayda belədir- nə demək istədiyinizi bilmirsizsə, Pasta deyin.Əlbəttdə ki Italiya öz mətbəxi ilə dünyada ilk yerləri tutur, amma şəhərlərin gözəlliyində də ilk yerlərdədir.4 şəhəri xüsusi qeyd etmək istərdim:Roma İtaliyanın paytaxı, həm də Qədim Roma imperiyası olan Roma şəhərinin hər addımında bir qədimi və ya antikvar tikili ilə rastaşacaqsız. Ümumiyyətlə, İtaliyanın əksər əyalətlərində özünü Azərbaycandakı kimi bir az hiss edirsən, səbəb isə insanların bir az bizə oxşamasıdır. Küçədə hamı əl-qol ilə və yüksəkdən danışır. Trevi fəvvarəsi turist axını olan ən məşhur yerdir. İnanca görə Trevi fəvvarəsinə qəpik atmaqla arzularınız çin ola bilər və bu fontandan il ərzində Roma əyaləti atılan qəpiklərdən 1.5 million Avro məbləğində pul toplayırlar. Roma Kolizeyi haqqında da deməmək günahdır. Roma şəhərinin simvolu olan bu tikilidə olduğunuz zaman xüsusi hislər yaşayırsız, elə bil sizi indi qladiator meydanına döyüşə çağıracaqlar.VatikanMüqəddəs Papanın iqamətgahı olan bir şəhər-dövlətdir. Vatikanda təyyarə meydanı olmadığına görə Papa öz iqamətgahına ancaq vertolyotla enir. Vatikan həm də öz tarixi muzeyi ilə məşhurdur və siz burada məşhur Sikstin kapella məbədini görə bilərsiz. Ümumilikdə bu muzeye daxil olan zaman, hər otaqdan insanı valeh edəcək abu-hava hiss etmək olar.Venesiya/FlorensiyaVenesiyaya qayıq şəhəri desək yanılmarıq. Şəhərdə əsas nəqliyyat qayıqdır və şəhərdən bir az qoxu gəlir kanalların sayı çox olduğundan. Şəhərdə çoxlu körpü, qədim kilsələr var və bu şəhərə ayrıca gözəllik verir.Florensiya - Bu şəhər mənim ağlımda dəbdəbə ilə qədimliyin vəhdəti kimi qaldı. Arno çayı sahilində yerləşən şəhərin hər bir yeri gözəl və şəkil çəkməlidir, əsasən də axşam saatlarında.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Asif ibrahimov 

201 dəfə oxunub
YENİLİKLƏRƏ ABUNƏ OLUN