BLOQ

Christmas turu part 1 - Budapeşt, Brüssel, Aachen

Budapeştdəki bütün otel, apartament və hostelləri bu linkdən (bron) edə bilərsiniz.Sizə nədən deyim, nədən danışım. Hal-hazırda Christmas turumuzun 5-ci günündəyik. Fikir verdim, qrupda bu tərəfə gəlmək istəyənlər çoxdu, ona görə də, bəzi şeyləri qeyd eliyim, bəlkə kiminsə işinə yaradı.???????????????????????????????????????????????????????????????????? Marşrut:Bakı ➡️Budapest ➡️Brussels ➡️Aachen ➡️Strasbourg ➡️Colmar ➡️Switzerland (bir neçə şəhərə getməyi planlayırıq) ➡️Ravensburg ➡️Konstanz ➡️Vienne ➡️Budapest ➡️Bakı????????????????????????????????????????????????????????????????????️ Biletlər;20 dekabr. Bakı-Budapest ➡️ 35 EUR (Wizz)21 dekabr. Budapest - Brussels ➡️ 19 EUR (Wizz)23 dekabr. Brussels - Aachen ➡️ 11 EUR (Flix)Aachen - Konstanz ➡️ Maşınla gəziləcək2 yanvar. Budapest - Bakı ➡️ 103 USD????????????????????????????????????????????????????????????????QEYDLƏR:???? Biletləri 1-2 ay qabaqdan aldım, aydın məsələdi ???? Budapest- Bakı reysini düz bir ay Airhint-lə izlədim. 180 dollardan 103-ə düşəndə risk elədim aldım. Səhv elədim. Çünki, salonun cəmi 50% dolu idi. Böyük ehtimal yenə də düşəcək idi və belə də oldu. Düz 70 dollara kimi düşdü ????‍♂️????‍♂️ Məsləhət odur ki, Airhint-dən əlavə, hər dəfə qiymət düşdükcə, yer seçiminə qədər davam edin və salonun dolu və ya boş olduğuna baxın. Uçuşa bir ay qalıb, yerlər cəmi 40-50% doludursa, mənim kimi tələsməyin ))???? Wizzair-lə birinci dəfə idi uçurdum. Narahatdır. Gecə uçuşu üçün isə, vapşe ölkə ucuna qoyulası deyil. Traxtur səsi verir. Budapest Brussels uçuşunda isə, çox yellədi, babat turbulens idi. Elə bil Quba yoluynan gedirsən ????‍♂️???? Bakıda çantalara heç baxmadılar. Amma Budapeştdə nemes kimi yoxladılar. Gözünüzün yaşına baxmadan, uyğun olmayan hər şeyi çıxardıb, zibil yeşiyinə tulluyasıdılar, əmin olun ???????? Avropa daxilində Wizz-də gecikmələr çox olur belə başa düşdüm. 1 saata kimi gecikdi. Özü də, terminalın içindən təyyarəyə kimi piyadaca gedirsən) Yəni, avtobusa da ekonomiya eliyillər ))???????? Budapest deyib, keçməyin. Mən də keçmədim ???? Miqrasiyadan rahat keçirsən. Mehriban şəkildə, peçatını vurur, göndərirlər. Yuxarı çıxırsan,100E avtobusu var, düz mərkəzə gedir, Deak Ference Ter metrosuna. Elə dayanacaqda aparat var, rahat oxuyub, ala bilərsiniz. Kartla da ödəmə var. 5-cə manata. Elə metronun çıxışında saxlayır. Düşdüyün yerdən bir az irəlidə, sağda ləzətdi bir yaxma obyekti var) Əlüstü girirsən, maraqlı çörək yaxmalarından yeyirsən, ucuzdu.Mən, mərkəzdə Boomerang hostel-də double room götürdüm, 35 EUR. Breakfast daxil. Parlament, Bazilika, Christmas market, Dunayın sahili, Opera binası, hamısı ayaqla gediləsi məsafədə. Xəritə götürüb, piyada gəzdim.Çox gözəl şəhərdir, camaatı da mehriban. Ucuz deyə bilmərik. Christmas marketdə qızıl balıq qızartması gördük, ürəyimiz getdi. Dedim, bunun dadına baxmaq lazımdı. Zakaz elədim. Yan tərəfdə bir xanım da, elə ondan yeyirdi, qayıtdı ki, bu çox bahadi haa, yavaş ol )) Dedim, nə qədər olar ki, aha olsun 10 evro. Dedi, darıxma. Nəysə, bizim balığı gətirdi, yanında da tərəvəz və s. Dedi, 24 EUR. Bayaqkı xanıma qayıtdım dedim, əşi, ömründə bi dəfə yeyirsən da, hər gün Budapeştdə balıq yemirsen ki ????‍♂️????‍♂️ (içimdə də özümü söyürem ki, lom, əvvəl soruş, sora al da, aliqarxsan sən??)Belə bahalı obedden sora, gedirsən Dunayda bir gəmi turu atırsan ki, aliqarx həyatın tam olsun. Gəmi, mütləqdir. Bütün Dunayboyu tikililəri görürsən, audio guide da var. Hər şeyi izah eliyir.Hə, bir də, yaxşı qulyaş yemək istəsəniz, Budapest Bistro ya gedin.Məşhur şirniyyatları olan kurtoskalac, boş şeydi. 1000 forintə boş olanıdır, 2000 forintə içərisinə dondurma qoyulur. Heç biri bir zad deyil, yəni, o pulun üstün düzəldin qızıl balıq yeyin məncə ????‍♂️???????? Brüssel. Ayraportdan şəhərə gəlmək od bahası, 17 EUR. Söhbət, Charleroi dan gedir. Info deskdən də soruşdum ki, ən ucuz nə cür gedim, dedi variant yoxdu, Flip gedir ancaq (avtobusdu). Düz bir saata Gare du Midi-yə gəldik. Mən də Airbnb de tutmuşam evi. O da ki, mərkəzdən yarım saat məsafədə, Jette də. Wizz onsuz da gecikmişdi, bir də yolun belə uzaq olmağı, ev tapşırığını da zəif eləmişəm, bilmirəm nətər gedim Jette-yə. Nəysə, vağzala girən kimi, birini tutdum, sağ olsun izah elədi. Bir başqası kömək elədi, bilet aldıq metroya (2.4 EUR). Başqa bir stansiyada düşüb, avtobusla getməliyik hələ. Gecə 11.30, yağış yağır. Sağ olsun Bakcell, Belçikada işləmir roaming internet paketi.. Kankret stress. Elə metrodan düşən kimi, bir day dayı tutdum ki, xəritəni göstərdim, sağ olsun, düz dayanacağa kimi gətirdi. Biznən bir yerdə avtobusu gözlədi. Avtobusa mindik, aha, bilet yoxdu. Gecə vaxtı yaxında aparat da yoxdu. Çıxartdım cash verəm, götürmədi şofer. Gətirdi düz binanın qabağına. Deməyim odu ki, çox mehriban, gözəl insanları var imiş. Heç belə gözləmirdim.Səhər durub yerli "şirin" kafelərin birində zavtrak eləmək istədik. Çox mehriban sahibəsi var idi. Xeyli piroq yedirtdi bizə, ancaq birinin pulunu aldı ))Brüssel baha şəhərdir. Hər yerdə hiss eliyirsən ) Eləcə pivə qiyməti normaldı, 2 evrodan başlayaraq. Grand Place ətrafında əla Christmas market var. Local yemək və içkilərin dadına baxa bilərsiniz. Monqol mətbəxindən tutmuş, Kanada içkilərinə kimi hər şey var idi ))Ümumiyyətlə, Brüsselin binaları çox gözəldir. Küçələr bir az ensiz və çirklidir. Amma, insanları xoş olduğu üçün, belə şeylər gözə görsənmir.???????? Aachen. Brüsseldən Axenə Flix-lə gəldik. Yarım saat gecikdi avtobus. WiFi da işləmirdi. Amma, rahatdı. Axen çox gözəl şəhərdi, qədimliyi gözə girir. Aldstadt - da çox gözəl Christmas market var. Indilərdə gəlsəniz, nağıl kimi bayram keçirərdiniz. Hələ ki, burdayıq. Bu gün hava küləkli olduğu üçün, Monschau-ya gedə bilmədik. Ona görə də gedim görüm, Christmas marketdə nə var ne yox. Sağlığınıza da bir iki bakal vuraram ???????????????? Sabahkı rotamiz ➡️ Strasbourg !P.S. O məşhur balığın da şəklin aşağıda görə bilərsiniz ????Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Valid Memmedli 

657 dəfə oxunub

Səyahət əhvalatları

Əsl #hollandpendiri nin narıncı* olduğunu düşündüyümüz vaxtlar idi. Yəni hələ Hollandiyada olmamışdıq, amma futbola çox baxan vaxtlarımız idi. İl 2012. Elə bilirdik orda hər şeyi narıncı olur. Elə easyJet kimi. Amma easyJet sayəsində çox diyarlara uçmuşduq, sağ olsunlar müsəlmançılıqla qoyurdular qiymətləri.Günlərin bir gecəsi uçuş Parisdən Londona idi. Daha doğrusu Luton'a. Hələ də bilmirəm o aereportu niyə London hesab edirlər. Ordan evə gəlib çıxmaq üçün qatar, sonra subway, sonra avtobus lazım olurdu, xərci isə easyJetle uçuşdan ikiqat baha.Dosta tanışa təriflədiyim lowcoster bu dəfə əməlli başlı pozmuşdu planları, daha doğrusu əhvalı. Maceralarla dolu Avropa turunun dönüşündə artıq sadəcə evə çatıb uzanıb yatmaq istəyirdim. Amma easyJetin planları başqa imiş.. Düz 2 saat 50 deq gecikmə ilə baş tutan uçuşu gözləyən sərnişinlər artıq deyinməkdən bir-biri ilə söhbət eləməyə, dostlaşmağa başlamışdılar ki, mən də xəbərim olmadan bir neçə dost tapmışdım, elə onlarla maraqlarda ortaq nöqtələr axtarırdıq ki, birdən bir qadın yaxınlaşdı mənə, bilmədim niyə məhz mənə, amma o vaxtlar heç orasını düşünməzdik, cool vaxtlar idi. Nə isə, dedi bəs telefonu yanmır, məndən onu Londonda gözləyənlərə yazsın ki, nigaran qalmasınlar. Heç ordan da ağlıma heç nə gəlmədi ki nigarançılıq hara London hara.. Nəsə telefonumu verdim mesajlasdi qaytardı, qoşulduq digər sərnişinlərlə söhbətə və minik başlayanda hamı döndü əvvəlki ciddiyyətinə. Heçnə olmamış kimi.Gecikmə nəticəsində qatarı da buraxmışdım, başqa qatar tapmağa qarışan baş heç fikirləşmədi ki bəs görüm o nə sms yazdı, aldı. Nə də olmasa Avropa mentaliteti həqiqətən adamın üstünə oturmuşdu. Başqalarının nəyinəsə olan ac göz azəri marağı yox idi (düzü heç Avropadan əvvəl də yox idi elə də). Telefonuma sms gələndə gördüm ki Azərbaycanca. Sən demə bu xanım Azərbaycanlı imiş. Yazılarında olan səhvlərdən, yadıma saldığım söhbətlərimizdən başa düşdüm ki çoxdandı tərk edib bu doğma diyarı, amma hələ də öz dilimizi işlətməsi xoş idi, isti idi.Beləcə artıq üzdə təbəssüm vardı :) yeni qatar axtarmaq, sonradan metro stansiyada gecələmək və s. qanqaraçılığı getmişdi :) amma günün, daha doğrusu gecənin marağı bitməyibmiş.. Ardı var.* bir pendir manyakı kimi deyə bilərəm ki ən dadlı pendir, elə narıncı olandı. Amma o Holland pendiri deyil. İngilis pendiridi. Leicester (Lester) pendirini yesəniz digər pendirlerə xəyanətiniz davamlı hal alacaq) Bakıda uzun illər yox idi o pendir (hətta məşhur restoranlar pendir assortidə cheddar ilə yola verirdilər. Qiymətlər də yola verməsələr də). Ta ki, Port Bazaar açılana qədər. Amma ondan sonra da elə yox kimi oldu)) çünki kg.ını 138-165 manat arası satırdılar. Sonradan Bravoda da satılmağa başladı, daha münasib qiymətə, təqribən 30 manata. Amma orda satılan waitrose malıdır ki hansı ki heç ingiltərədə onun yaxınına durmurduq. Yaxşı vaxtlar idi Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Ziya Bey 

581 dəfə oxunub

Budapeşt, Vyana, Bratislava, Praqa, Dresden bələdçisi

Salam dostlar. İstərdim ki, Budapeşt, Vyana, Bratislava, Praqa və az da olsa Dresden haqqında yazım. Səyahətim 2019 İyul ayının sonlarında olub. Çexiya üçün Şengen vizasına müraciət eləmişəm. Girişim Budapeştdən, çıxışım isə Praqadan olub. İndi isə gələk əsas məsələyə. Şəhərlər haqqında məlumata:Budapeşt. Dunay çayının iki hissəyə ayırdığı şəhərin bir tərəfi Buda digər tərəfi isə Peşt adlanır. Əsas gəzib görməli yerləri də elə dunay çayının sahilindədir. Buda qalası, Balıqçılar bürcü (qalası), dunay çayının üzərindəki körpülər, dunay çayı sahilindəki ayaqqabılar (mənim üçün o qədər də maraqlı deyildi????), Aziz Stephen Bazilikası, Parlament binası və çayın sahilindən 2-3 km uzaqlıqda olan Qəhrəmanlar meydanı və şəhərin mərkəzi küçələri gəzdiyim yerləridir. Bundan başqa Termal hamamları, Yahudi məhəlləsi və sənətə ilgisi olanlar üçün Terror Haza (Terror muzeyi), Opera Binası da görüləcək yerlərdəndir. 2 tam gün ayırmağınız əsas görüləcək yerləri görməyiniz üçün kifayətdir (ən azından mən belə düşünürəm????) Əgər şəhərdə rahat gəzmək istəyirsinizsə günlük bilet almağınız tövsiyyə olunandır. Günlük biletləri metrolardan, aeroportdan və şəhərin digər yerlərinə quraşdırılmış bankamatiklərdən ala bilərsiniz. https://bkk.hu/en/tickets-and-passes/prices/. Bu saytda bilet qiymətləri və sair ətraflı yazılıb. Günlük biletlər D 11 feribotlarında da istifadə oluna bilir.Vyana. Xüsusən son onillikdə 8 dəfə dünyanın ən yaşamalı şəhəri seçilib. Budapeştə nəzərən bahalı olsa da o qədər getmişkən gedib görməyə dəyər bir şəhərdir. Dunay çayı Vyanadan da keçir. Bratislavaya yaxın olduğu üçün orda sadəcə bir günümü keçirib Bratislavanı gəzdim. St Stephen Katedralını, Hundertwasseri, Hofburg sarayını, Belvedere sarayını, Museum quarteri və Graben küçəsini gəzə bildim. Əgər vaxtınız çox olarsa bir az uzaqda olan Schönbrunn sarayına mütləq baş çəkin. Musem quarter bölgəsində olan Naturahistoriches Muzeumun içinə girin. (Bunu çox istəsəm də vaxt darlığı səbəbi ilə gerçəkləşdirə bilmədim).Bratislava. Slovakiyanın paytaxtı olan və mərkəzindən başqa gəzməyə yeri olmayan bu balaca, amma bir o qədər də şirin olan bu şəhər Vyanadan 60 km uzaqlıqda yerləşir. Demək olar ki hər saatbaşı 1-5 avro arası avtobuslar var. Səhər gedib günorta qayıtmalı olan bir yerdir. Most SNP-(Dunay çayının üzrərindəki körpünün üstündə qüllə kimi tikilmiş restoran xidməti də verən bir yer) şəhərə gözəl mənzərə açılır. Yuxarıya qalxma qiyməti 7,4 avrodur.Praqa. Mən deyərdim ki, bu şəhər özündə ən gözəl tarixi-memarlıq əsərlərini cəm edib. (Bəlkə daha da gözəlləri var. Mən görməmişəm hələ????). Astronomik saat, tyn kilisəsi, Charles körpüsü, Praqa qalası, şəhərin Mala strana dedikləri hissəsi, rəqs edən bina və bir-birindən yaraşıqlı sayısız digər binaları görülməyə dəyər. Bundan əlavə myczechrepublic.com saytından şəhərdaxili nəqliyyat və sair haqqında ətraflı məlumat əldə etmək olar. Trdelnik yeməyi hər kəsə tövsiyyə edirəm.Dresden. Gedib getməmək haqqında tərəddüd etdiyim, sonra bir yoldaşın məsləhəti ilə getdiyim və heç də peşman olmadığım gözəl bir alman şəhəri. Praqadan 2.5 saat uzaqlıqda yerləşir. Yaxşı muzeyləri var (bu yaxınlarda birini soydular????). Oxuduğuma görə birinci dünya müharibəsi zamanı şəhərin 4 də 3 bombalanıb. 4 də 3 ü bombalandıqdan sonra bu qədər gözəldisə kim bilir əvvəlcədən nə qədər gözəl olub Dresden. Yazının uzun olduğunun fərqindəyəm. (Hər dəfə birini yazmağa hövsələm çatmır????)Kimin əlavə sualı olarsa soruşa bilər.P.S. Fotograf paylaşmağı sevmirəm.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Sarxan Suleymanov

901 dəfə oxunub

Miçoakan bələdçisi

Ölülər gününü qəbristanlıqda keçirdim…☺️Unudulmaz səyahət təcrübəsi oldu mənim üçün. Bəlkə çoxlarınız Coco cizgi filminə baxmısınız. Bax elə o cizgi filmini canlı canlı görmək və yaşamaq. Həqiqətən çox möhtəşəm idi. Sizə səyahətidən ətraflı danışım. Əgər vaxtiniz və maraqınız olarsa daha ətraflı mənim Blog yazdığım səhifəyə daxil olub oxuya bilərsiniz. http://evdenuzaqlarda.com/michoacan/ℹ️ Michoacán, Miçoakan kimi oxunur və əyalətdir, Meksikanın qərb mərkəzindədir. Cənub-qərbdən Sakit Okean və qərbdən Colima və Jalisco, şimaldan Guanajuato, şimal-şərqdən Keretaro, şərqdən Meksika və cənubdan Guerrero ilə həmsərhəddir. Paytaxtı isə Morelia şəhəridir.????Michoacan da Jorullo vulkanı 1759-cu ildə püskürmə zamanı yarandı və 1943-cü ildə Paricutín Uruapan şəhərinin şimal-qərbindəki bir sahədə qəflətən inkişaf etməyə başladı; püskürmələri 1952-ci ilə qədər davam etdi. Kənd sakinləri hərkəs kəndi vaxtında tərk etdi və daha sonra San Juan kəndi yerlə bir oldu.????Morelia, Michoacan’ın paytaxtı və əyalətdəki ən böyük şəhərdir, şəhərdə 600.000 nəfərdən çox əhali var. 1991-ci ildə YUNESKO-nun Dünya İrsi saytı listəsində yer alıb. Şəhər tamamı ilə möhtəşəmdir. Hələ siz bura noyabr ayının 1 və 2 si gəlsəz çox maraqlı şeylər görə bilərsiz. Çünki bu günlərdə ölülər günü qeyd edilir və inanılmaz dərəcədə maraqlıdır.????Michoacanda görə biləcəyiniz çox möhtəşəm olan Monarch kəpənəkləridir. ABŞ-ın şimal-şərqindən və Kanadadan 4820 km uzaqlıqdan gəlirlər. Günlərinin geri qalanını Meksika’da yaşayırlar. Uşaqları bütün həyatını Meksika’da yaşayır və yazda, Şimali Amerikanın şimal-şərqinə köç edən nəvələri olur. Sonrakı qış bu kəpənəklərin nəvələri dədə babalarının etdiyi kimi qışda Michoacana geri dönürlər. Həqiqətəndə bir möcüzədire. Ziyarət etmək istəsəz Michoacanda monarx kəpənəklərini görmək üçün ən yaxşı vaxt yanvar-mart aylarıdır. Səhər saat 9, 10 arası getməyinizi məsləhət görürəm. Santuario de la Mariposa Monarca Giriş 50 Peso – 4.50 Azn✈️Michoacan vaxtı ilə Meksikanın təhlükəli bir əyaləti olub. Lakin hal hazırda təhlükəsiz və daha çox turistin olduğu bir əyalətdir. Michoacana gəlmək fikriniz olsa Meksikanın paytaxtına uçub daha sonra bura uça bilərsiniz. Qiymətlər hardasa 75-100 manat arası olur adətən.????????“Ölülər günü” Latın Amerikasında, əsasən də Meksika, Qvatemala, Honduras və Salvadorda qeyd olunan, məqsədi ölüləri anmaqla bağlı olan bayramdır. İspanca “Día de Muertos” adlanır. Adətə görə bu bayramın keçirildiyi günlərində rəngarəng karnaval təşkil edilir. Müasir dövrdə bu bayram hər il noyabrın 1 və 2-də qeyd olunur. Bu bayramın tarixi Latın Amerikasının ispanlara qədərki tarixinə kimi gedib çıxır. Belə ki, onun başlanğıcının asteklərə aid olduğu məlumdur. Qədim asteklərin dövründə bu bayramda baş fiqur “Miktlantekuli” adlı “Cənab Ölü” hesab olunurdu. Həmin dövrlərdə bu bayram adətən iyul-avqust aylarında keçirilərdi. Lakin ispanların bu ərazilərdə məskunlaşmasından sonra ispan keşişləri bayramın noyabr ayına keçirilməsinə qərar verib.Hellouindən fərqli olaraq,☠️“Ölülər günü” qorxutmaq məqsədli deyil. Burada olan skeletlər ölənlərə işarədir. İnanclara görə gerçək ölüm unudulduğunda olur, festivalın məqsədi də məhz, ölənlərin unudulmamasını təmin etməkdir. Bu məqsəd istiqamətində vəfat etmiş insanları xatırlamaq üçün şəkərdən kəllə və bəzək-düzəklər, ölənlərin sevdiyi qoxuların, süsləmələrin olduğu qurbangahlar hazırlanır. İnsanlar ölü kimi geyinərək bəzənir; minlərlə insan özünü ölüyə bənzədərək, nağıllarda olan ölü qəhrəmanların kostyumlarını geyərək şəhərin küçələrinə çıxırlar. Hətta yaxınlarını yad etmək üçün qəbirstanlığa gedənlər bu mərasimi yasdan şənliyə çevirirlər. Hesab edilir ki, həmin günlərdə hər kəs ölüsünə mümkün qədər çox sevinc bəxş etməlidir, elə buna görə də qəbirlərə məxmər gülünün ləçəkləri qoyulur. Qeyd edim ki, bu ənənəvi bayram 2008-ci ildə YUNESKO tərəfindən Bəşəriyyətin Qeyri-maddi mədəni irs üzrə “Reprezentativ siyahısı”na daxil edilmişdir.Maraq göstərib oxuduğunuz üçün təşəkkür edirəm.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Seyid Hüseyn

877 dəfə oxunub

Sərfəli büdcə ilə 6 ölkə, 8 şəhər

6 ölkə, 8 şəhər - cəmi 800 Azn ????Yazı çoox uzundur, amma birnəfəsə oxuyacaqsınız :)3 ay qabaq Rəvan ilə iki Yamoniyalı olaraq qərara gəldik ki, bu yay Avropanın bir hissəsini fəth etməliyik.Planımıza Rəvan 6, mən 7 ölkə saldım.Bakı Tbilisi qatarı ilə başlayıb, Budapeşt - Bakı Wizzair reysi ilə bitirdik.İlk günümüz o qədər də yaxşı başladı demək olmaz, 5 ərəblə bir plaskart vaqonda Tbilisə qədər yol getmişik. İstidən vaqon buxarlanırdı. ????Üz tutduq Kutaisi şəhərinə. Maps.me sayəsində uzun ellər dolaşıb, çox dağlar aşıb hostelimizi tapdıq. Əla qonaqlama, çox mehriban münasibətlə qarşılaşdıq. Gürcülər bu mövzuda əvəzolunmazdır :)Səhəri üz tutduq Vyanaya.Vyana - Kübarlıq, Elita, Azadlıq, Sağlamlıq, Əyləncə və rahatlığın şəhəri:Şəhərə ilk addım atan andan etibarən yuxarıda sadaladığım bütün amilləri görmək mümkündür.İnsanlar çox pozitiv və yaşından aslı olmayaraq gümrah görünüşdədir. Yaşlısından cavanına qədər hər kəs qaçır, birgə əylənir, velosiped sürür. Şəhərin özünün də bunun üçün geniş imkanları var, şəhərin hər bir nöqtəsində elektrik skuterlər və velosipedlər var. Hansı ki, adicə app vasitəsilə QR kod oxudub götürürsən və istənilən yerdə sərbəst buraxa bilirsən. Rəvanla 2 nəfərə bir skuter götürüb Vyananın küçələrində şou göstərmişik. Axırda da Rəvan yaxşıca yıxıldı. ????İnsanların çoxunu kafelərdə yox, parklarda piknik edən yerdə görmək olar. Ümumiyyətlə Vyanada saat 6-dan sonra demək olar bütün iaşə obyektləri bağlı olur. Amma gecəsindən - gündüzündən asılı olmayaraq qızlar da, oğlanlar da, yaşlı qadınlar da hər kəs özünə rahat bildiyi yerdə - fantan ətrafında, otluqda, skamyada əyləşib pivə içərək söhbət edir. Parklarda pulsuz rasladuşkalar olur, bəzən də kupalnikdə skamyada uzanıb özünü günə verən qızları görə bilərsiniz.Şəhər həm tarixi, həm modernliyi özündə birləşdirir. Möhtəşəm tarixi binaları, kilsələri, sarayları var. Bir də Dunay Çayının digər sahilinə keçmək lazımdır, əminəm ki, çox insan keçməyib. Şəhər digər tərəfdən Honkonga da oxşayır, Sinqapura da Nyu Yorka da. Vyanada olduğunu unudur insan.. Gecələr insanlar dunay çayının sahili boyunca uzanıb /əyləşib pivə içir, əylənir, musiqi dinləyir, rəqs edir. Bir sözlə necə lazımdırsa, xoşbəxt yaşayırlar.Dunay çayında yerləşən adada bir möhtəşəm gecələr keçir nə festivallarda görmək olar, nə barlarda, sadəcə yerində yaşamaq lazımdır :)Şəhərdə isə bomujlar yox səviyyəsindədir.Vyanadan üz tutduq Romaya. Romanın gəzməli və görməli yerlər Kolizey ilə Vatikan arasındadır. Qalan yerlər ya İstanbuldur, ya da Bazilya. Şəhərin mərkəzi və tarixi hissələri sanki arxeoloji qazıntıda yerin altından tapılıb və heç şotqa ilə tozu da alınmayıb. Həddindən artıq səliqəsiz və çirkli şəhərdir. Mərkəzdən bir-iki küçə uzaqlaşan kimi bütün küçələrin və bütün binaların birinci mərtəbəsi divarlar yazılıb, çirk əlindən heç nəyə toxunmaq mümkün deyil. Çox köhnə və çirkli ictimai nəqliyyatı var. Tramvaylara baxanda, SSSR Bakısındakı tramvaylar yada düşür. Şəhərin bütün küçələrində bomujlar addımbaşı dayanıb. Seneqal, Banqladeş, Kenya, Nigeriya kimi ölkələrdən gələn qaradərililər şəhərin ya küçə alverçiləridir, ya da ucuz xidmət sahələrində işləyirlər.Yeganə maraqlı və üstün tərəfi tarixi abidələrin özünəməxsus olmasıdır. Həmçinin bütün əsas tarixi abidələr demək olar ki, bir sıra ilə düzülüb. Dediyim kimi hər şey Vatikan ilə Kolizey arasında yerləşir. Bir gün ərzində şəhərin bütün əsas kilsə, muzey və digər maraqlı yerlərini gəzmək mümükündür. Şəhərdə olan zaman heç bir nəqliyyat vasitəsindən istifadə etmədik. Hər yerə piyada gəzərək getmişik.Romadan bezib (oxu: iyrənib) qaçdıq Pragaya.Bu şəhər də Vyana kimi gözəlliyin və rahatlığın başqa bir adıdır.Addım başı parklar, meşələr, şəhərin təbiətlə harmoniyası və sakitlik insanın ruhunu dincəldir.Mərkəzi və tarixi yerlərlə yanaşı, şəhər ətrafı parkları, monastrı, sakit küçələrini də gəzdik. Yolüstü Türk kafesində Belarusdan gəlmiş Azərbaycanlı ilə də rastlaşıb söhbətləşdik.Xüsusi qeyd edim ki, bu şəhərə Sarı geyinib gəlməyin :D Şəhərdə qəribə cücülər var ki, sarı rəng görən kimi daraşırlar adama. Rəvanın ikinci macərası da bununla başladı. 1 saat cücü qovmuşuq, axırda bacarmayıb köynəyi dəyişdi :Dİki günlük macərədan sonra üz Tutduq Çexiyanın ikinci böyük şəhəri olan Brnoya.Bura haqqında demək olar ki, nağıllardakı şəhərdir. Balaca Praga da demək olar.Oradan da üz tutduq, Bratislavaya. Çatana qədər o qədər dost-tanış pislədi ki, dedik görəsən hara gedirik. Gördüyümüz isə əksi oldu, bu da həmçinin bir tərəfdən muasirləşməyə çalışan, bir tərəfindən də tarixi özündə saxlayan balaca, gözəl şəhər idi. Xüsusilə gecələri, PUBları çox maraqlı və əyləncəlidir.Bir gecə də Bratislavada keçirib Getdik Budapeştə.Dunay çayını artıq 4-cü şəhərdən izləyirdik. Biraz gərgin və yorğun vaxtımıza düşdü. Rəvanın vecinə deyildi, 3-cü dəfə idi gəlirdi. Mən düşdüm şəhərin canına, burada da insanların həyat tərzi, rahatlığı şəhərin gözəlliyinə gözəllik qatırdı. Şəhərin yuxarıdan (fisherman heykəlinin olduğu yerə çıxdıq) görüntüsü möhtəşəmdir. Dunay çayında yerləşən balaca bir ada da var. Budapeştə gələn hər bir insan mütləq orada olmalı və heç olmasa 1 saat insanlara qoşulub həyatdan zövq almalıdır.Həmən günün axşamı Budapeşt Bakı reysi ilə üz tutduq Bakıya.Yalan olmasın 8 günə 300 km yaxın yol piyada gəzmişik. Hal qalar? :)Səyahət boyu çəkdiyim çox qeşəng şəkillərdən bir neçəsini bura əlavə edirəm, amma hamısını Instagramda @thmsb_mmdv şəxsi profilimdən izləyə bilərsiniz.Bütün bu macəramızın büdcə və planı haqqında isə Rəvan yazacaq.Hə bir də hər kəsə Rəvan kimi yol yoldaşı arzu edirəm !Bir nüansı da nəzərinizə çatdırım ki, sentyabrın sonu bir həftə avropa turum yenə olacaq. Sizə ətraflı ekanom səyahət barədə, və ilk dəfədən ard - arda iki multi şengen almağımın lifehack'lərini bölüşəcəm. Qısası izləməkdə olun. Hamınıza bol səyahətlər arzu edirəm :)Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Tahmasib Mammadov   

689 dəfə oxunub

Şəhər bələdçisi - Kopenhagen və Malmö

Salam əziz gəzəyənlər. İlk dəfə 6 ay bundan əvvəl, özümü sizə təqdim edib, Hamburg və Lübeck (Almaniya) səfərimi və həyəcanımı sizinlə bölüşmüşdüm. İndi isə, 5 günlük Copenhagen və Malmö (Danimarka və İsveç) səfərinə çıxdım.Artıq ikinci dəfə olacağı üçün nisbətən həyəcan və o ən sevdiyim, bilmədiyin yerlərə oyanan qorxu hissini daha az hiss etdim . Amma təbii ki bu dəfə "ilk"lərim olacaqdı və keçən dəfəki kimi layihə hesabına getmirdim ????. Bu ilklərdən biri Wizzair təcrübəsi oldu (köməyi üçün Vusal Ekberova xüsusi təşəkkürlər).Kutaisinin kiçik aeroportuna, Omnibus'larla səfərə start verdik.Həmişə yolçuluğa başladığımı və yad yerə gedəcəyimi, təyyarənin kəmərini bağladıqda hiss edirəm. Bu dəfə də, eyni o hisslə yola qoyulduq.Copenhagen aeroportuda digər təcrübəm kimi, eyni "avropa dəbində" idi, metro dayanacaqları isə çox modern və təmiz. Burda tanış olduğumuz Filippinli qadının dediyinə görə, yollarda avtomobillərdən çox velosipedlərə üstünlük verilirdi. Cash pul artıq yoxdur deyilə biləcək qədər az istifadə olunurdu.Kiçik danimarkalı evdə, şamlarımızı yandırıb HYGGE'ni (Danimarka da xoşbəxtlik simvolu) hiss etdik. Bununla birlikdə Chinese Dumplings bişirib yedik.Copenhagen sahillərindən, Şimal dənizinin dalğalarını dinləyə, rəngli və nostaljik binalarla gözlərinizi rənglərə doydura bilərsiniz.Bura həmdə velosiped ilə çox məhşurdur (xüsusi üsulları və qaydaları bilmədən velosiplə gəzməyə çıxmağınız məsləhət deyil ????).Bununla birlikdə, Copenhagendə, Christiania adlı bir yer mövcuddur. Bura "Freetown" adlanan 7.7 hektarlıq bir ərazidir. Açıq narkotik satışı ???? və azad həyatları ilə seçilirlər. Bu əraziyə nə polis nədə hökümət daxil olub təsir göstərə bilmir. Öz müstəqilliklərini elan ediblər və vurğulamaq istəyirəmki qurduqları çox fərqli bir formatdır.Malmö şəhəri isə, Copenhagendən 40 dəqiqə uzaqlıqdadır və (heç səs çıxarmayan) qatarlarla gedə bilərsiniz. Bu bir neçə saata gəzə biləcəyiniz kiçik şəhər, məni həqiqətən heyran etdi.Sahib olduğu böyük muzeyi (Təbiət, Elm və Tarixi) bitib tükənməyəcək qədər çox bilgi ilə doludur.Bununla birlikdə şəhərdə çox qeyri-adi tikilişi olan, 700 illik St. Peter kilsəsi yerləşir. İç dizaynı həm dəb-dəbəli həmdə çox sadədir (bilmirəm necə olur ????). Bu qeyriadilik həm kilsədə həmdə bütün şəhərdə əks olunub.Wizzair'lə sadəcə 1 bel çantası ilə çıxdığım bu 5 günlük yolçuluq mənə ölkəmdə keçirdiyim illərdən belə daha çox fayda və motivasiya bəxş etdi. 2 ölkə və 2 şəhəri 130 euroya gəzmiş oldum. İndi isə aeroportta oturub, evə qayıdış təyyarəmi gözləyirəm.İtməkdən, yolda qalmaqdan və s. çox şeylərdən qorxa bilərsiz. Eyni həyat qorxuları kimi. Ama yenə də yaşayırıq. Yenə də yol alırıq. Durmayın, gedib adını belə bilmədiyiniz yerlərdə gəzin və bu günlərin hər saniyəsinin zövqünü yaşayın. Həyat dayanmaq üçün çox qısadır! Hələlik. ????

667 dəfə oxunub

Soyuq İsveçrə "sınağı"

Budəfəki səyahətimin şüarı:"Tanrı məni cəzalandırmaq üçün İsveçrəyə göndərdi" ????20 saatlıq aclıq, BlaBlaCar'ın sifarişi ləğv etməyi, buna görədə Bern şəhərinə gedə bilməməyim və əvəzinə Zurixə yola düşməyim, orada isə Couchsurfing'in anidən evə qəbul etməməyi və Zurixdə bir gecə 0-2 dərəcə soyuqda çöldə qalmaq, Lokau'da bir skamya tapmışdım ki oturum yemək yeyim, elə bir qısmat ???? yemişdim ki, mənimlə üzbəüz evdən bir qadının çıxaraq şəklimi çəkib "İ am calling police" deməyi ilə işıq sürəti yığıb dağın başına tərəf bir əlimdə ağır çanta bir əlimdə canım norveç balığı dağıla-dağıla necə qaçmışamsa, sonda balığın özünün yox ədviyyatlarının qalmağı, Lindau şəhərində mastercard/visa ilə ödəniş qəbul olunmadığı üçün "bir balaca" da aclığın dibinə düşməyim, Lindau - Munxen qatarında polisin 40 dəfə pasport / bilet kontrol etməyi nəticəsində yata bilməməyim və heçnə anlamadım bu çoxsaylı yoxlanışdan...370 AZN / 4 şəhər 3 ölkə / 7 gün / Noyabr 2019Deməli bu səyahətimdə ilk dəfə idi ki, yalnız təyyarə biletlərini əvvəlcədən almışdım vəssalam gediş-gəliş cəmi 40 AZN (Kutaisi - Basel / Munich-Kutaisi)Qalan hərşeyi yerində aldım və ilk dəfə planı pozaraq Münxendən olan geri dönüşü təxirə salıb yol aldım doğma "last station" Budapeştə ???? Bura getməkdə ən əsas məqsəd dostuma sürpriz etmək idi ????1. İSVEÇRƏ: Zurix2. AVSTRİYA: Bregenz, Lokau3. ALMANİYA: Lindau, MunichNəqliyyat vasitələri və xərcləri: 230 AZN✈ WIZZAIR: Kutaisi - Basel 17 AZN✈ WIZZAIR: Budapeşt - Baku, 66 AZN✈ WIZZAIR: Munich - Kutaisi, 23 AZN???? FLİXBUS: Basel - Zurix, 14 AZN???? FLİXBUS: Zurix - Bregenz, 20 AZN???? FLİXBUS+Regiojet: Munich - Budapest, 40 AZN???? Qatar (OBB): Lochau - Lindau, 4 AZN???? Qatar (DBB): Lindau - Munich, 48 AZN (Bayern ticket - bu biletlə Bayern ərazisində - Ulm, Lindau, Memmingen, Munxen və s. şəhərlərdə metro və qatardan 9am-3am arası limitsiz istifadə etmək olar)Yerləşmə: Hostellər və xərcləri: 141 AZN- Isveçrə???? Backpack hostel, 65 AZN / 1gecə, Zurix- Almaniya???? Euro youth hostel, 46 AZN / 2 gecə, Munxen- Macarıstan???? Unity hostel , 30 AZN / 2 gecə, BudapeştDeməli çatdım Isveçrənin BASEL şəhərinə, yazdım ki BlaBlaCar şoferinə hardasan qadan alım bəs nə vaxt gəlirsən ???? Dediki qaqa sən 1 nəfərsən sərf eləmirsən (elə bil Maştağa, Bilgəhə gedən manatlıq taksi zaddı ????) Pahoooo qaldıq pis vəziyyətdə, Bernə gedən qatarın qiyməti 36 $ olduğunu görüb dedim flixbus hara mən ora ???? Berndəki ev sahibinə dedim ki bəs mən gələmmiyəcəm bu şofer mənə atdı, dedi no problem. Nəysə o şoferi yad edə edə aldım flixbus bileti və Zurixə yola düşdüm, acından da can verirəm???? Zurixə çatıb ev sahibinə yazıram ki, gəldime gəldim adresi atın görüm, mənə nə yazsalar yaxşıdır ? Biz evdən indi çıxası olduq çox üzr istəyirik, mən də dedim ayıb söhbətdir, sözü belə olmaz ???? Bunlar nə danışır a kişi, çöldə neyniyəcəm bu norveç soyuğunda mən (baxmayaraqki soyuğu sevirəm)?! Aclıqdan soyuğu vapşe hiss edirəm özüdə nəyi var ????Üz tutdum qatar stansiyasına 2 saat orda qaldıqdan sonra polis gəldiki stansiya bağlanır çölə çıxmalısız. İlahi bu nə temadı???? Nəysə çıxdım bayıra Zurixin mərkəzində 2-3 kruq vurmuşam artıq, barmaqlarımın ucu buz bağlayıb əlimi hiss eləmirəm, getdim biraz gəzəndən sonra gördümki bir ATM bölməsi var, içərisində də bir qız yatıb dedim əla bir isti yer tapdım nəhayət, ordada 2 saat falan keçirəndən sonra səhər ilk açılan restorana daxil oldum, ac adam təəssüf ki qiymətləri yox yeməyi gördüyü üçün məğlubiyyətə uğradı ???? 2 keks və 1 çay cəmi 21 AZN ???? heçnə, çoxda şey eləmirəm ???? Zurixi gecə o qədər gəzmişdim ki, səhər gəzəndə artıq ürəyim bulanırdı, o çətin "vaxtlarım" yadıma düşürdü.Avstriyada hər şey əla keçdi, Lokau və Bregenzə mütləq baş çəkin, Hər ikisini 1 günə sığdırmaq mümkündür.Almaniya barədə isə, Lindau kiçik və əhalisi az ola bir şəhərdir, Konstanz (Almanca, Bodennsse) gölünün sahilində yerləşir. Bu şəhərə gəlsəniz mütləq surətdə üzərinizdə nəğd pul götürün. Kart çox məhduddur burda. Munxeni heç sevmədim, böyük, əhalisi çox bir şəhər, tipik avropa şəhəri, eynən Paris.Deməli mən Munxendən artıq geri qayıtmalı idim, səhər yuxudan durub tez getməli idim Memmingen aeroportuna. Həmin vaxt dostum da orda idi, dedim gedim ona bir jest edim ???? Dedim vapşe getmirəm, nəsə heç getmək qayıtmaq istəmirdim ümumiyyətlə, girdim flixbus saytına baxdım Budapeşt reysinə aldım ilk bileti getdime ver əlini Budapest, hələ hələ Bakıya ucuz bilet tapmisdim????Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Royal Planck

627 dəfə oxunub

Yunanıstan - Afina bələdçisi

Afinadakı bütün otel, apartament və hostelləri bu linkdən book (bron) edə bilərsiz.Aviabilet.Yunanıstana, xüsusilə də Afinaya getmək lap balacalıqdan arzum idi. Ölkənin antik tarixi, adaları, dənizləri, təbiəti hər zaman maraq dairəmdə idi. Ancaq Yunanıstana gedib çıxmaq o qədər də ucuz deyildi. Düzdür Kutaisidən 20-30 avroya gedib çıxmaq olar. Ancaq Gürcüstanla quru sərhədimizdə barbar davranış, vaxt itkisi, yorğunçuluq kimi səbəblərə görə Kutaisinin üstündən birdəfəlik xətt çəkmişəm.Biraz araşdırma aparandan sonra ucuz biletlər tapdım. Bakı-Sofiya (Buta airways) 29 avro, Sofiya-Afina (Ryanair) 15 avro. Tarixlər də üst-üstə düşürdü. Üstəgəl həm Bolqarıstanı, həm də Yunanıstanı tura daxil etmək olur.Viza.Deyilənlərin tam əksinə gülərüzlü konsulla görüş. Heç bir sual soruşmadı, cəmi 2-3 dəqiqə vaxtımız getdi, o da şəkil çəkdirməklə, barmaq izlərinin götürülməsi üçün.İki gündən sonra zəng etdilər ki, hər üçünüz viza almısınız.Əsas sürpriz də oldu ki, viza 1 illik multi oldu.Afina havalimanı "Eleftherios Venizelos" səliqəli, müasir, geniş bir sözlə rahatdır. Pasport kontroldan (personal çox professionaldır) cəmi bir neçə saniyəyə keçdik. Burdan şəhərin mərkəzinə həm metro (10 avro), həm də avtobuslar (95 nömrəli, 6 avro) var. Taksi ilə getmək 40 avroya başa gəlir.Otel, ev.Afinada qalmaq üçün ən uyğun yerlər Omonia, Plaka, Syntagma və Monastirakidir. Bu yerlər Afinanın mərkəzi Akropolisin ətrafıdır və hər yerə yaxındır. Qiymətlər də normaldır. Təxminən 30 avroya iki-üç nəfərin qalacağı, hər şəraiti olan ev və ya otel tapmaq olar.Yemək.Afinada qiymətlər qərbi avropa ilə müqayisədə ucuzdur. Həm marketlər, həm də restoranlarda ucuzluqdur. Ən yadda qalan yeməkləri Kalmar qızartması oldu. Akropolisə çıxan yolda (ancaq piyada mümkündür) adı yadımda qalmayan restoran var. Zeytun ağaclarının altında zevs məbədinə baxa-baxa yunan musiqisi və dadı yaddan çıxmayan Kalmar qızartması. Xidmətə söz ola bilməz. Qiymət də ucuz.Afinanın mərkəzi də bir çox avropa şəhərləri kimi miqrant istilasına uğrayıb. O dərəcəyə çatıb ki, şəhərin mərkəzində ərəb, hindu dillərində yazılan reklamlar da görünür. Küçə ticarəti də onların əlindədir. Marixuana isə günorta vaxtı da xeyli insan tərəfindən istifadə olunur.Ancaq Akropolisə yaxınlaşdıqca hər şey dəyişir. Elə təəssürat yaranır ki, eradan əvvəlki illərdəsən. 2400 il əvvəl tikilən Parthenon lap təpənin üstündədir. Demək olar ki, Afinanın hər yerindən görünür. Ancaq piyada çıxmaq mümükündür. Aşağıda mütləq təbii portağal şirəsi içib sonra çıxmaq lazımdır, yoxsa adam çox yorular. Girişdə satılır. Bilet 20 avro. Bu qiymətə Parthenon, Erecthenion, Hephasteus kimi tikililəri və ümumilikdə kompleksi (Akropolis) gəzmək olar.Muzey sevənlər üçün National Archaeological Museum giriş 10 avro. Burda istədiyiniz qədər tarixi əsərlər görəcəksiniz. Şəhərdə çox sayda muzey var. Hamısını gəzmək üçün xeyli vaxt lazımdır.Monastiraki bizim 8-ci kilometr (vasmoy) bazarı kimi bir yerdir. Burada 10, 15 avroya Burberry, Gucci, Ralph Lauren və s. brendlərin məhsullarını almaq olar.Ermou küçəsinə isə Afinanın Neftçilər prospekti ya da Port Bakusu demək olar.Kifissia. Bura Afinanın milyonerlər məhəlləsidi. Bahaçılıq, villalar, sakitçilik.Pirey. Bura Afinanın Kubinkası ya da sovetskisi demək olar.Syntagma meydanı yaxınlığında isə uşaqlar üçün çox maraqlı ola biləcək National Garden var. Bura 1836-cı ildə kraliça Amaliya tərəfindən inşa etdirilib, şəhərin ən yaşıl hissəsidir. İçəridə kiçik də olsa zoopark da var.Glyfada. Afinada ən gözəl çimərlikləri burdadır. Mərkəzdən 10 km aralıdadır. Tramvay və metro (Elliniko stansiyası) ilə rahat gəlmək olar.Plaka. Bura şəhərin ən turistik yeridir. Antik tikililər, Bizans dövründən qalan məbədlər, muzeylər, instaqram şəkilləri üçün ideal yer. Bir də dəniz məhsulları sevənlər üçün ən dadlı, gül-çiçəkli butik kafelər.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Elshan Ismayilov 

2316 dəfə oxunub

Balissimo????

Balidəki bütün otel, apartament və hostelləri bu linkdən book (bron) edə bilərsiz.Balissimo????Vacation, bal ayı və ya sadəcə eqzotik yer kəşfi üçün Bali ən rahat və ilkin seçimlərdən olmalıdır. Çox möhtəşəm gözləntilərlə getməyin ki, ya gözləntiləriniz artıqlaması ilə doğrulsun, ya da sadəcə məyus olmayasanız.Xüsusən Bakının qışa sərt keçidindən qaçmaq üçün ən yaxşı mövsüm noyabrdır, Visa tələb olunmur, turla getmək rahatdır, amma düşünürəm ki, əlinizdə nağd pulunuz varsa, biletləri, oteli və transportu (aeroport-otel&otel-aeroport) özünüz həll edə bilərsiniz.Balinin çimərliyi, cəngəlliyi, meşəliyi və ibadətgahları möhtəşəmdir, adanın qalan hissəsini instagrama çəkib yerləşdirmək istəməzsiz)Gedərkən sizə mütləq bu tipsdən yararlanmağı məsləhət görürəm:- özünüzlə böyük pul qabı götürün, çünki pulları çoxdur)- authorized yazılan yerlərdə qətiyyən pul dəyişməyin, sizi aldada bilərlər, necəsə olur ki, onların yanında pul sayanda düz olur, qıraqda yenidən sayanda az çıxır. Pul dəyişmə məntəqələrində ad&soyad, otel ünvanı kimi detallı informasiya istəyirlərsə, yaxşıdır.- mütləq qalacağınız gün sayına görə tur planları edin, turlar üçün isə tripadvisor turları məsləhət görürəm, biz Alex adlı bələdçi ilə günə 40$-lardan turlar planlayırdıq, adam həm rus, həm eng dilini bilir. Kimsə istəsə kontaktını verə bilərəm (təbii ki qrup qaydalarına zidd deyilsə)- kuta çimərliyi surfing və ya ümumiyyətlə çimmək üçün mükəmməldi, tərtəmizdir, amma orada hər şey pulludur, hətta dəsmalları da ayrıca satırlar ona görə özünüzlə dəsmal aparın)- Bakıdan gedəndə böcək dişləməsi əleyhinə sprey aparın, Bali böcəklərinin ayaq fetişi var elə bil ???? ayaq şişir və göyərir, gecələr isə qaşınmalar güclənir, ona görə tədbirli olun.- bike sürə bilirsinizsə, əlaçı. Balidə bike kirayəsi çox ucuzdur, tək və ya cütlük şəklində getmisinizsə, lap sərf edəcək. əks halda yalnız tur rəhbərinin avtomobili və ya tura getmədiyiniz günlər taksi işlədəsi olacaqsız. Taksi xidmətindən söz düşmüşkən beynəlxalq standartlı taksometr Bluebird taxi xidmətində var, xeyli komfortlu və kondisionerli maşınlardır, amma onların bəzi ərazilərə girişi qadağandır, şəhər mərkəzinə gedəcəksizsə, hər yerdə var və rahatlıqla işlədin. Nəzərə alın ki, yerli taksi xidməti Bali taxi loqolarını və maşın rənglərini Bluebirdə bənzədib, axşam səhv sala bilərsiniz, diqqətli olun)- meşələrdə, cəngəlliklərdə, çimərliklərdə istifadə edəcəyiniz adrenalin əyləncələr zamanı ucuz qiymətə qaçmayın. Mütləq sığorta olub-olmadığını yoxlayın, bəzi yerlərdə var, qoy olsun 2 dəfə baha amma ürəyiniz də rahat olsun)- İbadətgahlara gedərkən çiyin və dizlərinizi örtəcək geyimlər geyinməyə çalışın, necə deyərlər, yerli adətlərə hörmət etməyə çalışaq ????- Günə 100$ xərcinizin çıxması qarantidir, qiymətlərin qeyri-sabitliyinə hazır olun, xüsusən yerli mətbəxə mədəniz alışmasa, italyan restoranlarında servis və tax vergisi gəlir çıxır 21faizə, ona görə qalacağınız günə görə ortalama 100$ (gün üçün) məbləğ götürməyə çalışın.- Heyvanları çoox şirin görsənə bilər, onları qıcıqlandıracaq hərəkət və ya göz zilləmələrinə qədər belə görsənərlər. Xüsusən sacred monkey forest-də meymunlara gözünüzü zilləyib baxmayın, onlar yoxmuş kimi davranın, uzaqdan sevin :d- plastik istifadəsinə çox yol verməyin, şopinq üçün özünüzlə böyük kağız çanta və ya parça çantalar aparın.- əslində yerli əhali noyabr ayını low season olaraq dəyərləndirir, amma bizim bəxtimizdən 10 günlük səfərimizdə cəmi 2 gün yağış yağdı, o da Bali yağışını da görməyə dəyərdi.)Balidən həzz almaq insana görə dəyişir, meditasiya üçün möhtəşəm ab-havaya sahibdir, yaxşıca restart elətdirir düşüncələrinə, bir də çox romantik məkandır ????Baliyə səyahət arzulayırsınızsa, indidən pul yığmağa başlayın????Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Gulsen Hesenzade

613 dəfə oxunub

Yeni başlayanlara gəzəyən məsləhəti

19Bu dəfəki postda da gəzməyə həvəsi olub, büdcəsi və ya məlumatı az olan, xarici dil biliyi zəif olan, bir sözlə yeni başlayan gəzəyənlər üçün faydalı ola biləcək fikirlərimi, köməkçi proqramları və s. paylaşıram. Əvvəla onu deyim ki, sonuncu səfərim zamanı 09-21 noyabr tarixində viza və digər xərclər (biletlər, yemək, qalmaq və s.) daxil 450 euro büdcə ilə Avropanın 4 ölkəsinin, 7 şəhərini (Vyana, Barselona, Valensiya, Pisa, Florensiya, Roma, Budapeşt) gəzdim. Qrupda bundan da az büdcə ilə səyahət edən yoldaşların postlarını tapa bilərdsiniz. Az büdcə ilə səyahət heç də parklarda yatmaq və ya ac qalmaq demək deyil, düzgün araşdırma və planlaşdırmanın nəticəsidir. Misal üçün onu deyim ki, son səfərimdən artıq çəki ilə qayıtmışam ???? Baxmayaraq ki, getdiyim şəhərlərdə aeroport – şəhər mərkəzi nəqliyyatlarından başqa heç bir şəhərdaxili nəqliyyatdan (metro, tramvat, avtobus və s.) istifadə etmədim. Şəhərin ruhunu hiss etmək üçün onu piyada gəzmək şərtdir)Digər xərclər isə (şəhərdaxili turlar, ödənişli istarahət obyekləri, konsertlər və s.) subyektiv olaraq dəyişir.Əvvəldə dediyim kimi, bu postda yeni başlayanlar üçün faydalı hesab etdiyim məlumatlar (mobil tətbiqlar, saytlar, əlavə avadanlıqlar) paylaşacam. Gəzdiyim şəhərlərin görməli yerləri barədə isə qrupda xeyli məlumat var ???? Əgər aşağıda qeyd etdiyim şərtlərə əməl etsəniz, göstərdiyim app ları yükləyib, məşq etsəniz rahat şəkildə səyahətinizi planlaşdırıb gedib gəzə bilərsiniz.Ehtiyat tədbirlər.Mütləq xarici pasportunuzun və vizanızın şəklini çəkib google drive a əlavə edin, ən asandı isə facebookda bir dostunuza göndərin. Əlavə surətini də çıxarıb çantanıza atın.Mümkün qədər az paltar götürməyə çalışın, inanın, apardığınız paltarlardan heç istifadə etmədikləriniz çox olacaq. Özünüzlə mütləq çəkələk götürün.Mütləq powerbank aparın. Mən istifadə etdiyim 20000 mAh la Xiaomi Power Bank 2C Bakıda saytında 45-50 manata tapa bilərsiniz. (http://prntscr.com/q62mbe)Müəyyən miqdarda nəğd pul götürün, ancaq çalışın ki, ödənişlərinizi plastik kartla edəsiniz, yoxunuzdursa mütləq alın (Mən Unibankın albalı plus debet kartından istifadə edirəm). Bu zaman həm pul itirmək qorxusu az olur, həm də başınız qəpiklərə qarışmır. Ehtiyyat kimi kartın arxasındakı 3 rəqəmi əzbərləyib, silin. Yaxşı olar ki, app ı yazıb kartı itirdiyiniz təqdirdə deaktiv edəsiniz. Həmçinin, səfirliyə sənəd təqdim edəndə artıq kartınızın son aylardakı çıxarışını da göstərə bilirsiniz. ( http://prntscr.com/q63k3w )Özünüzlə əlavə kiçik həcmli çanta götürün, hosteldə yerləşdikdən sonra su, powerbank, fotoaparat kimi əşyalarınızı içərisinə qoyub şəhəri gəzə bilərsiniz.Təyyarə biletiAvropaya təyyarə ilə ucuz qiymətə bilet almaq üçün 3 variantınız var. 1) Bakı – Budapeşt - Bakı reysi həftədə 2 dəfə, 2) Tiflis-Milan reysi həftədə 4 dəfə, 3) Kutaisi – Avropanın Almaniya, Fransa, İtalya daxil olmaqla 19 ölkəsinə reyslər mövcuddur. Avropadaxili uçuşlarda isə bu və ya digər low costların xidmətindən yararlana bilərsiniz. Bu reysləri Macarısatanın WizzAir və İrlandiyanın Ryanair şirkətləri həyata keçirir. Kutaisiyə və Tiflisə necə getmək barədə qrupda xeyli məlumat var.Otel, Hostel, qonaq evləriYeni başlayan gəzəyən kimi sizə məsləhət görərəm airbnb, couchsurfing kimi saytlardan uzaq olub fikrinizi booking.com da cəmləyəsiniz. Bu halda sizin qapıda qalmaq, qarışıq ünvan axtarmaq kimi problemləriniz olmayacaq. ( http://prntscr.com/q63f1t ) Hostel bron edərkən mətbəxdan istifadə imkanın olub olmadığına fikir verin. Reytinqsiz və ya reytinqi aşağı olan yerləri bron etməyin. Qeyd edim ki, hostellər otellərdən daha maraqlı olur, müxtəlif yerlərdən olan insanlarla maraqlı söhbətlər edə bilirsən. Hosteldə qalmaqdan çəkinən xanımlar üçün onu deyim ki, yalnız xanımların xidmətində olan otaqlar da mövcuddur. ( http://prntscr.com/q63g8g )YeməkAvropada restoran xidməti çox bahadır, lakin siz ərzağı marketdən alıb özünüz hazırlasanız sizə normal qiymətə başa gələr. Bir şey də var ki, getdiyin ölkənin milli yeməklərindən dadmasan olmur. Ona görə dəməsləhət görərəm 2 gün qalacağınız bir şəhərdə 1 və 2 dəfə milli yeməklər üzrə tanınmış bir restoranında nahar edin. Bunun üçün tripadvisor proqramı sizə kömək olacaq. Özünüz üçün buterbrod hazırlayıb çantanıza atın ki, şəhəri gəzəndə acsanız bir də hostelə qayıtmalı olmayasınız.Şəhərlərarası nəqliyyatAvropada şəhərlərarası nəqliyyat üçün bir neçə seçim var (qatar, avtobus, gəmi). Biletləri bir neçə gün əvvəl online şəkildə şirkətlərin app dan istifadə etməklə və ya web üzərindən ala bilərsniz (Flixbus, Regiojet və s.)Şəhərdaxili nəqliyyatŞəhərdaxili nəqliyyat üçün bir neçə gedişlik və ya 24, 48, 72 və s. saatlıq güzəştli və bir çox nəqliyyat növlərində keçərli olan biletlər mövcuddur. Mən yalnız piyada gəzdiyim üçün onların heç birindən istifadə etmirəm. Əldə etmək istəsəniz biletləri terminallardan ala bilərsiniz. Marşurut xəttlərini isə Google map ilə dəqiqləşdirə bilərsiniz. ( http://prntscr.com/q63qjq )Application və saytlarlarÇalışıb mümkün qədər az, ancaq kifayət edəcək app lar qeyd edəcəm. Çalışın, yüklədiyiniz bütün app larda bir gmail ilə qeydiyatdan keçəsiniz.1) Google search – bir gəzəyənin səyahət planlaşdırmasının yarısı mütləq axtarış aparmaqla keçməlidir, gedəcəyiniz yerlər, marşurutlar, hava proqnozları və s. bütün informasiyanı google da axtarıb tapa bilərsiniz.2) Google maps və Maps.me Bu iki proqram sizə tanımadığınız şəhərlərdə istədiyiniz yerlərə getməkdə kömeklik edəcək. Hər iki xəritə offline şəkildə işləyə bilir. Yalnız telefonun gps ni açmaq kifayətdir. Otelinizin yerini, gedəcəyiniz məkanları əvvəlvədən xəritədə qeyd edin.(http://prntscr.com/q636j9 )3) Skyscanner.com – bu axtarış sistemi çoxlarına məlumdur. Bir daha qeyd etmək istəyirəm ki, bu sayt bilet satmır, bilet satan kompaniyaları müqaisə üçün bir yerdə cəmləşdirir. Seçim etdikdən sonra əsas sayta yönəldir. Yaxşı olar ki, bu saytı web üzərindən istifadə edəsiniz. App versiyası çox da xoşuma gəlmir. Dəqiq qiyməti əsas sayta keçid edəndən sonra alacaqsınız. ( http://prntscr.com/q62ua4 )4) Omio – Bu app vasitəsilə siz Avropada şəhərlarası nəqliyyat vasitələrinin qiymətinə baxa və seçim edə bilərsiniz. Eynilə skyscanner kimi bu app da nəqliyyat xidmətlərini yerinə yetirən şirkətlərin xidmətləri haqqında məlumatları özündə cəmləşdirir. (http://prntscr.com/q62xm6)5) Rome2rio – Ola bilər ki, hər hansı məkana çatmaq üçün bir necə nəqliyyat vasitəsi dəyişmək lazım olacaq. O halda bu app sizə kömək edəcək və qatar, metro, avtobus kimi nəqliyyat vasitələrindən istifadə etməklə bir neçə variant təklif edəcək. Bu funksiya Google mapda da var. ( http://prntscr.com/q63089)6) Blablacar – Avropada şəhərlərarası transfer üçün geniş istifadə olunur. Əgər siz bir neçə gün əvvəldən avtobus bileti almamısınızsa və sabaha olan bilet qiymətləri büdcənizə uyğun deyilsə onda bu proqramdan istifadə edib, eyni yolu daha tez və nisbətən ucuz qiymətə gedə bilərsniz.7) TripAdviser – Bu proqram vasitəsilə səyahətlə bağlı sizi maraqlandıran suallara cavab tapa bilərsiniz. Gəzməli yerlər, dadlı yeməklər verilən kafe və restoranlar, qarşılaşdığınız çətinliklər və digər sizi düşündürən suallarla bağlı digər gəzəyənlərin yazılarına baxıb, nəticə çıxara bilərsiniz. ( http://prntscr.com/q632fg )8) Gəzəyənlər – hazırda 43 min istifadəcisi olan Gəzəyənlər qrupu özü böyük bir informasiya deposudur. Axtardığınız məlumatı axtarış yerinə yazmaqla daha yaxşı başa düşəcəyiniz həmvətənləriminiz mövzu ilə bağlı post və şərhlərindən görə bilərsiniz. ( http://prntscr.com/q62t4v )9) Facebook – Getdiyiniz şəhərdə olan eventlərdən (canlı musiqi, konsert, tədbir, trainig və s.) xəbərdar olmaq üçün facebook un event bölməsindanistifadə edə bilərsiniz. (http://prntscr.com/q62s9y )Postun əvvəlində çox məlumat yerləşdirmək istəsəm də, yazdıqca həcminin çox olduğunu görüb qısatmaq qərarına gəldim. Əgər istifadəçilər tərəfindən faydalı post kimi qarşılanarsa, göstərdiyim məlumatları və app ları daha geniş, istifadə qaydalarını izah edən post yazaram. Ancaq belə düşünürəm ki, bu məlumatlardan istiqamət götürüb özünüz araşdırma etsəniz daha çox və faydalı informasiya əldə etmiş olarsınız.Edit: Sona qədər oxudunuzsa və nəsə bir sual yarandısa şərh yerinə yazıb soruşa bilərsiniz. Mən və ya başqa məlumatı olan yoldaşlar köməklik edərik :-) Uğurlar hamınıza...Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı:  Azer Hasanov

885 dəfə oxunub
Bizi izləyənlər siyahısına qoşulun!