Çilov adasına necə getmək olar?
Çilov adasına necə getmək olar? Adaya spirtli içki gətirmək, almaq, satmaq, içmək qadağandır. Qadınların və kişilərin avtobusu ayrıdır. Söhbət Əfqanistan Əmirliyindən yox, Çilov adasından gedir Adada üç polis, iki icra nümayəndəsi və bir lotu var. Adaya səyahət etmək üçün orada qeydiyyatda olan sakin sizə icra nümayəndəsindən alınmış dəvət məktubu göndərməlidir. Məktubda sizin səyahət tarixləriniz, passport məlumatlarınız, qalacağınız yer göstərilməlidir. Təxminən şengen vizası kimi. Yerli sakini necə tapaq? Hər gün səhər tezdən saat 07.30-09.00 arasında Zığ limanına gələrək orada ada sakinlərindən biri ilə tanış olaraq dəvət məktubu göndərməsini xahiş etmək olar. İcazəni həll etdikdən sonra gəmi, yoxsa helikopterlə gedəcəyinizə qərar verməlisiniz. Hər ikisi pulsuzdur. Helikopterlə getmək üçün SOCAR-ın baş ofisindən tanış taparaq tapşırıqla məsələni həll etmək olar. Aznefti ağlınızdan keçirməyin, onların sözü keçmir. Koroğlu metrostansiyası ətrafında Bakı kəndlərinə gedən taksi sürücülərindən Artyoma (Pirallahı) gedənləri tapın və “Vertolyotnu”-da düşəcəyinizi deyin. Qiymət adambaşı 3 manatdır, hər beş-on dəqiqədən bir taksilər hərəkət edir. Vertolyotla səyahət 8-12 dəqiqə çəkir. Gəmi ilə getmək istəyirsinizsə Zığ limanına getməlisiniz. Buradan Zəfər və Üfüq gəmiləri 4-5 saata, digər sovet dövründən qalan gəmilər isə 6-7 saata gedir. Gəmi ilə səyahət heç də asan deyil. Fiziki olaraq hazır deyilsinizsə gəmini yaddan çıxarın. SOCAR-ın yeni saqqallı komandası gəmiləri yeniləsə yaxşı olardı. Hər iki halda adada sizi ilk olaraq Socar Təhlükəsizlik idarəsi-nin əməkdaşları qarşılayacaq, sonra içəri keçəcəksiniz. Özünüzlə notebook və spirtli içki aparmayın, notebook-un oğurluq olmadığını sübut etmək məcburiyyətində qalacaqsınız. Spirtli içki isə olmaz Əvvəllər rusların daha çox yaşadığı adada hazırda əksəriyyət Masallı, qismən Qazax və digər rayonlardan miqrasiya edib buraya yerləşənlərdir, ruslar isə yenə də var. Xüsusilə şiələr üstünlük təşkil edir, az sayda sünnülər, gizli sələfilər, gizli nurçular, provoslav xristianlar, və ateistlər də var. Adanın maraqlı yerləri:1. Taxta evlər. Adanın özünəməxsus taxta evləri əslində buranı Santorini, Amalfi edəcək qədər gözəl ola bilərdi, ancaq baxımsızlıqdan çoxu dağılıb gedir.2. Mayak. XIX əsrdə tikilib, adanın hər yerindən görünür.3. Urnos. Burda insan yaşamır, qayalıqdır, ağac da yoxdur, gözəl çimərliyi var. Bəzən bura flaminqo sürüləri gəlir.4. Köhnə qəsəbə. İlk sakinlər burada, yəni adanın şimal hissəsində məskunlaşıblar. Bura üç hissədən ibarətdir. Milyonerlər məhəlləsi, aşağı-sahil hissəsi və Akifə xalanın dükanı olan hissə.5. Yeni qəsəbə. Neft tapıldıqdan sonra yeni yaradılan və müasir qəsəbə. Məktəb, bağça və xəstəxanalar, stadion, yeməkxana, Çay evi, yataqxanalar, FHN, İcra nümayəndəliyi, polis bölməsi, gəmi limanı buradadır.6. Çimərliklər. Adanın neftdən sonra ən böyük sərvəti təmiz çimərlikləridir. Tər-təmizdir, mənim kimi üzməyi sevən adamlar üçün buranın qiyməti yoxdur.7. Rus qəbiristanlığı. Maraqlı köhnə qəbir daşları və xaçlar var, əslində tarixdir, qorunmalıdır.8. Park. Mövcud şəraiti nəzərə alsaq çox gözəl parkdır, ümumiyyətlə adanın yaşıllaşmasında əməyi keçənlərə zəhmətkeş MKT (JEK) əməkdaşlarına böyük təşəkkür düşür.9. Stadion. SOCAR-ın ada əhalisinə etdiyi ən böyük yaxşılıqlardan biri bu stadiondur. Gənclər axşamlar burada futbol və voleybol oynayırlar, bəzən maraqlı yarışlar da keçirilir.10. Göz yaşları restoranı. Adada bir turistin yemək yeyə biləcəyi yeganə yer “Göz yaşları” restoranıdır.Burada toyuq ətindən hazırlanmış dolma, küftə, şordan hazırlanmış ayran, ətsiz kotlet, sümüklü piti və digər qeyri adi dadları test etmək olar. Spirtli içki isə qadağandır.
Ad günü keçirənlər, dostlarla yeyib-içmək istəyənlər əziyyət çəkirlər, məclislərini gecə keçirirlər, spirtli içkini isə gizli satıldığına görə dükanlardan iki-üç qat baha qiymətə alırlar.Əvvəllər “Muxtar kafe” var idi, həm yemək, həm də spirtli içki verilirdi, indi isə rəqabət yoxdur. Restoranın adını burada yemək yeyən fəhlələr qoyub. Bura əslində Xəzər İaşə adlı aşağı səviyyəli (yeyinti, pul silmək üçün yaradılıb) bir qurumun nəzdindədir. Adamları olduğuna görə SOCAR onları qova bilmir. Yeni saqqallı komanda isə dəyişmək üçün hazırlaşır. Adada sifarişlə çox dadlı kütüm, berj, vobla, kefal, sületka, zalom və imkanınız varsa nərə balığı da yeyə bilərsiniz.11. Məscid. Keçən əsrdə tikilmiş Şiə məscidi. Hazırda da əzan oxunur, namaz qılınır, ehsan verilir.12. Hərbi hissə. Burada qulluq edənlərin böyük əksəriyyəti tapşırıq, ya da müəyyən məbləğ pul ödəməklə vətənə olan borclarını ödəyirlər. Hərbi dildə desək kef edirlər.Adanın hər tərəfində yaşıllıqlar salınır və yüksək səviyyədə qulluq olunur. Quraqlığa davamlı olduğu üçün adanın küçələri iydə və yasəmən, zeytun, əncir ağaclarıyla doludur və hər tərəfdən gözəl iydə və yasəmən qoxusu gəlir. Son onillikdə ümumilikdə 100 mindən çox zeytun, küknar, eldar şamı, əncir və digər həmşəyaşıl ağaclar əkilmişdir, bu da adanı gözəlləşdirir və daha maraqlı edir. Çilov sakit yerdir. Ancaq avtobuslar, idarə maşınları və bir neçə şəxsi avtomobil var. Adada üç polis, iki icra nümayəndəsi və bir lotu var, yol polisi, radar yoxdur.Adada gəzərkən adamın ruhu dincəlir. Sakit, təmiz, baxımlı küçələri, yaşıllıq, köhnə evlər, dənizin, qağayıların səsi və s.Adada əsas maraqlı əyləncələr: - Balıq tutmaq. - Kiçik balıqçı gəmilərində adanın ətrafını dövr etmək. - Qaşqaldaq və çöl ördəyi ovlamaq. - Futbol, voleybol, stolüstü tennis oynamaq. - Tər-təmiz çimərliklərdə istirahət etmək.
Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Elşən İsmayılov
