3096 dəfə oxunub

İsveçrənin ən kosmopolit şəhəri - Zürix

Zürixdəki bütün otel, apartament və hostelləri bu linkdən book (bron) edə bilərsiz.

Bir gün metroda SNCFin (Fransada dəmiryolu şirkəti) “29 euroya İsveçrə” reklamını görüb təcili Paris-Zürich biletimi aldım. 60 euroya Zürichə getmək çox ucuz göründü gözümə. Amma təbii ki, bu İsveçrəyə gedib çıxana qədərki düşüncələrdir. Çünki İsveçrə deyildiyi qədər bahalı deyil, daha da bahalıdır. Yeri gəldi bir lahmacuna 10CHF (təqribən... erhhm 18AZN) ödədim, yeri gəldi 30CHF olan pizzalara baxıb oha dedim. Çox gəzdim, çox şey öyrəndim, yağışa düşdüm, İsveçrəlilərin təbiətinə valeh oldum .

Səyahətə Paris Gare de Lyon-dan başladım. Təqribən üç saat sonra peyzajın dəyişməsilə İsveçrəyə çatdığımızı anladım. Yol üstü Baselə göz vurub Zürichə çatdıq. Qatarla səyahətin ən gözəl cəhətlərindən biri birbaşa şəhər mərkəzinə çatmaqdır. Zürich HB vağzalında eurolarımı rəngbərəng İsveçrə frankına dəyişib turizm ofisindən ZürichCARD aldım, şəhər xəritəsini götürüb düşdüm şəhərin canına. Səyahət haqqında isə ilk hissəsini müşahidələr, ikinci hissəsini isə gəzintiyə ayırdığım bir yazı yazdım.

Zürich müşahidələrim

Money, money, money

İsveçrəlilər varlıdırlar, sirr deyil. Amma bu qədər varlı olduqlarını açığı mən də bilmirdim. Pul vahidləri frankdır. 1CHF təqribən 0,86 euro, yəni 1,75AZN edir. İki devalvasiya görmüş birinə bir sillə, bir qapazdır bu məzənnə. Mən 1CHF=1euro deyə düşünüb xərcləmələrimi ona görə elədim, daha doğrusu xərcləmə etməməyə çalışdım. Amma əskinazları rəngbərəng belə çox şirin şəkərdir, kazıklandığını sənə unutdurmağa çalışıblar, o qədər baha olmasa adam birini xatirə saxlamaq istəyir vallah. Qəpikləri isə ayrı aləmdir. 50 qəpikləri ½ Fr deyə qəribə bir sikkədir, onu xatirə saxladım.

Dil

Dörd rəsmi dili olan İsveçrənin Zürich kantonunda yalnız Alman dilində danışırlar, bir də ingilis. Amma hamı ingiliscə bilmir. (Migrosdakı qıza 15 dəqiqə ərzində 3 dildə toyuq salatı istədiyimi izah etdim, başa düşmədi, az qala yumurtlayacaqdım orda ki, başa düşsün). Dönərləri ilə dünyamızı şənləndirən türk qardaşlara da çox rast gələcəksiniz.

Dəqiqlik

İsveçrə dəqiqliyi dedikləri şeyin həqiqətən də mövcud olduğunu gördüm. Əvvəla hamının qolunda saat var, hər yerdə saat var. Saat muzeyi belə var. Dünyadakı ən yaxşı saatsaz olduqları üçün mü dəqiqdirlər, yoxsa dəqiq olduqları üçün mü saatsazdırlar? Yumurtadanmı toyuq çıxır, toyuqdanmı yumurta çıxır? Cavabını bilmədim, amma saniyəsinə qədər dəqiqdirlər. Bakıdakı nəqliyyatın çox intellektual idarəsini və Parisdə SNCF-in gecikmələrini görmüş biri olaraq tramvayların saniyəsi saniyəsinə dəqiqliklə gəldiyini görmək heyrətləndirici idi. Amma gəl gör ki, bu dəqiqlikləri bəzən çox bezdirici olur: axşam Migrosun bağlanmasından 10 dəqiqə əvvəl özümü marketə atıb alışveriş edirdim, xanım başımın üstündən çəkilmirdi ki, bağlayırıq.

Transport

Ən yaxşı nəqliyyat vasitəsi ayaqlardır. Zürich ümumilikdə İsveçrənin ən böyük şəhəri olsa da, görülməli yerlər şəhər mərkəzindədir. Mərkəzdən uzaq ancaq Uetliberg mütləq görülməlidir. Amma vaxt itirməmək və cazibəsinə qarşı durmamaq üçün şəhərin simvolu sayılan ağ-mavi tramvaylara minmək lazımdır hərdən.26172688_1587661457986938_4585654076566396452_o

Mən kontrolla rastlaşmadım, amma cərimələnib səyahətinizi burnunuzdan gətirmək istəmirsinizsə, risk etməyib ZürichCARD alın. 24 saatı 27CHF olan ( 72 saatlıq növü də var) bu kartı Zürich HB-da yerləşən turizm ofisindən əldə edə bilərsiniz. Kart şəhərin transport sistemindən pulsuz istifadə, muzeylərə pulsuz giriş və bir çox güzəşt imkanı verir. Gecə avtobusu və gəmi turu üçün əlavə 5CHF verib supplementary ticket almaq lazım olur. Məsləhətim odur ki, piyada gəziləcək yerləri bir gün üçün planlaşdırıb, Uetliberg və muzeyləri digər 24 saat ərzində görəsiniz (saatı yaxşı hesablayın )

Qidalanma

Zürichi tək kəlmə ilə ifadə etmək olar: baha. Normal bir restoranda pizzanın 30CHF (təqribən 52AZN!) olduğunu nəzərə alsaq, restoranlarda oturub aristokratcasına yemək yemədiyimi anlamaq üçün münəccim olmağa ehtiyac yoxdur. Mən bir addım daha irəli gedib Parisdən özümlə iki sendviç belə götürmüşdüm ki, birini yolda yeyərəm, digərini Zürichdə. Qaldığınız hosteldə/hoteldə özünüzlə sendviç hazırlamaq imkanınız varsa, sendviç götürün. Yoxdursa, Migrosa bir baş çəkin, ucuz restoran kimi filialları var, qiymətləri daha münasibdir. Mənim seçdiyim variant isə Kebab oldu ♥. Dünyanın hansı şəhərinə getsəniz orda bir kebab, içəridə isə bir türk qardaş görəcəksiniz. Mənə daha əvvəl “lahmacuna 18 AZN verəcəksən” desələr, “başın xarab olub” deyib gülərdim, ta ki Zürichə gələnə qədər. Ən ucuz yemək variantının 10 franklıq lahmacun/dönər olduğu bir şəhər düşünün. Buna görə də Zürichdə gedilə biləcək kafe/restoran tövsiyyəm yoxdur, üzrlü sayın.

Yeməyin bu qədər baha olduğu bu şəhərdə, çox şükür, su pulsuzdur və tam təmizdir. Bakıda marketlərdə astronomik qiymətlərə satılan Alp suyunu burda tam pulsuz içə bilərsiniz. Ona görə də İsveçrədə marketdən su almağı ağlınızdan belə keçirməyin, bir butulka götürüb doldurun, təmiz, saf Alp suyu ;)Həyatımda ən ləzzətli suyu Rieterparkda içdiyimi iddia edirəm.

Alışveriş

Etməyin. Eləməyin. Hər şey bahadır. Markalar desəniz, eyni markanın daha ucuzu Bakıda var. İsveçrənin simvolu olan saat almaq üçün isə böyrəyinizi satmalısınız. İsveçrə bıçağı və ya maqnit ala bilərsiniz (maqnit belə 10CHF idi, əl-insaf)

Küçələrə su səpmişəm

Planımı əvvəldən qurduğum üçün ZürichCARDı növbəti gün üçün saxlayıb ayaqlara qüvvət verirəm. Vağzaldan Bahnhofplatza çıxıram, ordan da Bahnhofstrasse ilə irəliləyirəm.26026128_1587646127988471_7668324393667688704_o

Zürichdə bu iki rəngi çox görəcəksiniz: ağ və mavi. Kantonun rəsmi rəngləridir və tramvaydan gölün rənginə qədər hər şey ağ və mavidir. Uraniastrasse və Bahnhofquai ilə irəliləyərək qarşı sahildəki binalara baxıram, ilk dəqiqələrin verdiyi o möhtəşəm vauuu hissi ilə gəzirəm hələ ki. Çayın o biri sahilinə keçib Niederdorfstrasseni kəşf edirəm. Bütün küçələri ayrı bir gözəl olan Zürichin strasse və gasse-lərində gəzib nəyahət Lindenhofa gəlib çıxıram. Lindenhof Zürichin gözəlliyini seyr edə biləcəyiniz ən mükəmməl məkandır. Sözlə ifadə olunmayacaq dərəcədə gözəldi.

St Peter Kirche ətrafındakı küçələrlə Münsterhof meydanına çıxıram. Zürichdəki ən məşhur kilsələrdən biri olan Fraumünsterin yanındakı bu meydanda Parisin simvolik skamyalarını görüb biraz təəccübləndim doğrusu, amma çox şirin bir hiss oldu. Qarşı sahildə Zürichin məşhur tikililərindən olan Helmhaus görünür.26173053_1587653864654364_3660825164860685889_o

Plan şəhər mərkəzindən bir az uzaq olan hostelə piyada getmək, bu vaxt ərzində isə Zürichin gözəlliyindən zövq almaqdır. Stadthausquai ilə irəliləyib tramvayların kəsişdiyi, gəmilərin gəlib-getdiyi Bürkliplatza gəlib çıxıram. Sonra Zürich gölünün sahilindəki yaşıllıqlara atıram özümü. Burda çox böyük iki dərs öyrənirəm: 1. hava proqnozu proqramlarına inanma; 2. yayda səyahət edirsənsə, mütləq çimərlik paltarı götür. Niyə deyə soruşsanız, hava proqnozuna görə yağışlı günlərin məni gözlədiyini düşündüyüm Zürichdə günəş parıldayır, şəhər əhli yaşıllıqda uzanıb özünü günə verir, gölə girib üzürlər. Belə çox kədərli bir hal alıb ayaqlarımı suya salmaqla kifayətləndim. Suyu bu qədər şəffaf olan Zürich See-də üzə bilməməyimin heyfini başqa bir gəzintidə çıxacağıma qət etdim. Yalan olmasın, 2 saata qədər sahildə oturmuş olaram. İnsanlar mutlu, insanlar gülüyor, insanlar yüzüyor. Hava qaralana yaxın tərpənmək vaxtıdır deyib hostelə tərəf yollandım.26171027_1587664644653286_5830787114791836354_o

Ucuz və sərfəli olsun deyə Zürich Youth Hosteldə bir çarpayı book eləmişəm. Hostel də dağ başında, inin cinin top oynadığı bir yerdədir. Normalda Parisdə olsam biraz narahat olacağım, Bakıda axşamın bu saatlarında yaxınından keçməyəcəyim tənha, yarıqaranlıq, it hürməz, karvan keçməz küçələrdir, amma bilirsən ki, İsveçrədir, ürəyin rahatlaşır. Səbəbini bilmədən insan özünü arxayın hiss edir. Cinayət hallarının nadir olduğu, insanların rifahının tavanlarda olduğu bu ölkədə ən tənha küçələr belə adama dostyana görünür.

Hosteldə iki gecə üçün 100CHF (bəli, bu qiymətə hostel) ödədiyim otağa çıxıb yerləşirəm. Hostelin yeri çox əntiqədir, çarpayım pəncərə yanındadır və pəncərədən meşələr, dağlar görünür. Quşların səsi gəlir, çox möcüzəli atmosfer var. Birinci günü tamamlayıram.

Növbəti gün səhər 6da oyanıb, səhər yeməyi yeyib düşürəm yollara. Bir az yağışlı, tər-təmiz havadır. Çox səyahət etmiş olmasam da, indiyə qədər etdiyim səyahətlərdən bir şey öyrənmişəm: hər şəhərin öz qoxusu var. Parisin qoxusu kofe və krep, Brüsselin qoxusu waffledırsa, Zürichin qoxusu yaşıl ağacların, yağış düşən torpağın, təbiətin qoxusudur. Yazanda belə sanki şəhərin qoxusunu hiss edirəm.

Günün ilk hədəfi Rieterpark-dır. Parkda bir mən, bir də itini gəzməyə çıxarmış xanım var. Tam sükut.

Günortaya qədər küçələri fırlanıb Grossmünster-ə gəlirəm. Katolik kilsələrindən fərqli olaraq içərisinin şişirdələcək qədər xüsusi bir gözəlliyi yoxdur, amma damına çıxıb şəhərə baxmaq mütləqdir ;)

Hər bir küçəsini xüsusi qayğı ilə gəzərək Opernhausa doğru irəliləyirəm.

Cəmi 10 dəqiqə sonra Bahnhofstrasseyə çatıb error verirəm. Muzeyin adresinə baxıram, küçəyə baxıram, yoxdu anam, muzey yoxdu. Kiçik bir errordan sonra saat butiklərinin alt mərtəbəsində gizlədilmiş bu muzeyə girirəm. Muzey də belə ingilislərin “posh” dediyi tərzdədir. Girişdə əlinizə bir iPad verirlər ki, eksponatlar haqqında məlumat əldə edin. İsveçrəlilərin saat takıntılarını burada daha yaxşı anlamaq olur. Hərnöv saat var. Mexanizmi görünməz olan saatlar isə ayrı bir möcüzədir. Muzeyə ZürichCARD vasitəsilə pulsuz girmək mümkündür.

26170979_1587673241319093_3649823668351167175_o

ZürichCARDın bir digər nemətindən faydalanmaq üçün üz tuturam Bürkliplatza. 5CHF əlavə ödəyib gəmiyə bilet alıram və bir saat ərzində Zürich gölündə gəzirəm. O vaxt da Game of Thrones-a yenicə baxıb bitirmişdim, gəminin burnuna çıxıb özümü bir anlıq *SPOILER* Westerosa taxt-tac almağa gedən Daenerys kimi hiss etdim.

Gəmi səyahətindən sonra özümə bir yaxşılıq edim deyib başqa bir muzeyə yollanıram. Kunsthausda bir saata yaxın incəsənətin ən gözəl nümunələrinə ağzı açıq tamaşa edib yeni isveçrəli rəssamlar kəşf edirəm. Sonrasında isə yağışa düşüb balığa dönürəm. Çətirimin olmasına baxmayaraq daxili orqanlarıma qədər islanıb özümü bir türk restoranına atıram.

Növbəti gün üçün 3 istiqamət var: Uetliberg, Botanika Bağı və Nationalmuseum.

Uetlibergə S10 qatarı ilə gedilir. Təqribən 40-50 dəqiqəlik yoldan sonra dağa qalxmağa başlayıram. Sözlərlə ifadə edilməyəcək bu dağ səyahətinin sonu Uetlibergdəki mini Eyfelə çıxmaqla nəticələnir. Heidi yadınızdadır? Yaxud Milkanın mor ineği? Bax həmin o təbiət, o gözəllik, dağlar. Uzaqda Luzern, İnterlaken, dağlar, kiçik kəndlər... Nağıllar.

26171682_1587676984652052_2032526322887178077_o

Vaxt gəlir İsveçrə təbiəti ilə sağollaşmağa. Gedirəm təbiətin daha mini forması olan Botanika Bağına. Uetlibergdə gördüklərimdən sonra sönük qalır təbii ki.

Son hədəf: Nationalmuseum. Zürich HB-ın yanında olması səbəbindən ən sona saxladığım bu muzey indiyə qədər gördüyüm ən interaktiv muzey ünvanına layiqdir. Adətən muzeylərdə “eksponatlara toxunmayın” yazısı ilə qarşılaşırıqsa, Zürichdə əksinə “eksponatlara toxunun” yazısı ilə qarşılaşdım. Məşhuuuur İsveçrə bankları haqqında kolleksiya, İsveçrənin tarixi, ideologiyası, şokoladları haqqında çooox geniş məlumatın olduğu bu muzeyi görmədən İsveçrə ziyarəti tamamlanmış sayılmır.

Vaxt gəlir geri dönməyə. TGV Lyria ilə nağıllar ölkəsinə əlvida yox, hələlik deyib ən qısa müddətdə yenidən görüşmək ümidi ilə yola düşürəm. Hələlik, Zürich!

DİGƏR BLOQLAR

Əsrarəngiz Bali

Balidəki otel, apartament və hostelləri bu linkdən book (bron) edə bilərsiz.Bu səyahətə biz xüsusi hazırlaşmışdıq çünki ikimizin də Uzaq Şərqə ilk səyahəti idi. Çoxlu blog yazıları və İndoneziya (Bali) haqqında məqalələr oxumuşduq  Gəzəcəyimiz yerlərin uzun bir siyahısını hazırlayıb getdik Baliyə.Bali İndoneziyada yerləşən minlərlə adadan biridir. Biz 7 gün qaldıq. Əgər getməyi planlayırsınızsa siz də ən az 7 gün düşünün. Çünki ada o qədər zəngin və rəngarəngdi ki, o qədər uzaq məsafəni heyfslənərək qayıtmaq yaxşı olmaz Adada necə ki yerli əhalidən çox turist var, eləcə də maşından çox motosiklet görəcəksiz. Yollar çox ensiz olduğundan millimetr məsafəylə ötüşür maşınlar və ya motosikletlər bir-birinin yanından. Əgər motor istifadə etməyi bacarırsınızsa onu kirayə götürün, yox maşın düşünürsünüzsə yaxşı olar ki günlük sürücü (təxminən 10 saat sizi istədiyiniz yerə aparır) danışasınız. Sükan sağdadır və hərəkət soltərəfli olduğundan çaşdırıcı ola bilər. Sürücünün etibarlı olması da əsas məsələdir çünki bel çantası belə olsa hər yerə daşımaq istidə yorucu olur. Bizim sürücü Gusti o gəzintinin ən gözəl, şirin, unutmayacağımız parçası oldu Harda və necə qalmaq məsələsinə gəldikdə isə o sizin necə bir yer istəməyinizlə bağlıdı. Tamamən təbiətlə iç-içə mi, yoxsa bir az Avropa şəhərlərini andıran hərəkətli yerlər mi (Kuta, Hard Rock cafenin-inanılmaz zövq aldıq- yerləşdiyi bölgə. 1 günlük gedib gəzmək olar amma tətili orda keçirmək Baliye haqsızlıq olar  ) və ya okean və ya dənizə yaxın yer (daha çox sörfçülerin tərcih elədiyi yerdi. Ora da 2 gün ayırdıq, okeanın altına endik, paraşut və dəniz sahili) olması mı. Biz Ubudda qaldıq. Ubud mərkəzdə olan bir yerdi və gedəcəyimiz yerlərə daha rahat gedə bilərdik. Və dediyim o təbiətlə iç-içə olan yerdi. Bali ümumiyyətlə elə bir yerdir ki hər addımda yabanı təbiət sizi heyrətləndirir. Luks, göstərişli, insan əli ilə düzəlmiş məkanlara çox rast gəlməyəcəksiz. Eyni zamanda böyük otelde qalmağın da mənası yoxdu Balidə. Palma ağaclarının əhatəsində olan, özəl hovuzlu villa tipli qonaqlama yerləri əsl Bali abu-havasındadır.Meymun meşəsi, Düyü tarlaları (UNESCO'nun qoruması altındadır) və yüzlərlə ibadət yerləri. Bu ibadət yerlərinin (daxil olarkən hamı qursaqdan aşağı bağlanmalıdır) bəziləri min illərdir var. Bali adasının sakinlərinin əksəriyyəti hindu dininə sitayiş edir və dinlərinə çox sadiqdirlər. Hər bir evin girişində 2 qorxulu üzlü heykəl var. Bunlar qardiyanlardır və evi şər qüvvələrdən qoruyurlar. Bu arada, hansı evin varlı, kasıb olması da bu gardiyan heykəllərdən bilinir. Varlılar vulkan daşlarından düzəltdirir heykəllərini. Gündə bir neçə dəfə kiçik qablarda yeməklər qoyurlar hər küncə ki digər canlılarda da qidalansın və beləliklə tanrılarına təşəkkür edilər indoneziyalılar.Bizə ən çox təsir edən mənzərələrdən biri də Kimtamani ərazisində yerləşən Batur vulkanı oldu. Baliyə gedərkən təyyarə o vulkanın üstündən keçir. Olduqca vahiməli görüntüsü var))Və əsla etmədən dönməməli olduğunuz şey Bali masajıdı əlbəttə) "yenidən doğuldum" dedizdirir adama.Orda qaldığımız müddətdə azərbaycanlıyla heç rastlaşmadıq. Daha çox rusları gördük (orda balayına Baliye gəlmək çox meşhurmuş), 3-4 çift türkiyəli ilə rastlaşdıq. Turistlərin əksəriyyətini avstraliyalılar (daha çox sörf üçün gəlirlər) , amerikalılar və çinlilər təşkil edir. Bali yazmaqla bitməz) Faydalı olacağını düşünürəm postun. Hər kəsə mənalı, unudulmaz tətillər arzulayıram Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Nigar Talibzade

1169 dəfə oxunub

Malayziya Bələdçisi

Salam, Gəzəyənlər!Bu postda Sizinlə Asiya səyahətindən öyrəndiklərimi bölüşmək istəyirəm. Planım Malayziya və İndoneziyada toplam 3 ay keçirmək, müxtəlif şəhərləri gəzməkdir. Bu yazıda Malayziyanın paytaxtı Kuala-Lumpur və Pinanq ştatı haqqında yazacam.Tövsiyə etdiyiniz yerləri mənə bildirsəniz, sevinərəm. Əlavə olaraq postdakı qeydlərimi yaxşılaşdıracaq fikirlərinizi də bildirməkdən çəkinməyin.Bilet: Toplam təxminən 490 AZN-ə Bakı - Əbu Dabi (Wizzair 115 $) - Dubay (Şəhərlərarası avtobus) - Kuala-Lumpur (Batik air 170$ ) (bileti uçuşdan təxminən 30 gün əvvəl almışdım, yoxsa daha ucuz almaq olardı). Biletlərdən həm qiymət baxımından, həm də gözləmə vaxtı baxımından çox məmnun qaldım. Hətta birbaşa uçuşa (Bakı - İstanbul və s. üzərindən) nisbətdə belə daha tez çatdım.Viza: Malayziyaya viza yoxdur, başqa sözlə, girişdə ödənişsiz viza verilir. Tələblərdən biri ölkədən çıxış biletinizin olmasıdır, məndə yox idi, lakin miqrasiya əməkdaşlarını “plansız gəzəyən” olduğumla bağlı razı saldım. İndoneziya viza tələbi var, mən birbaşa Bakıdakı səfirlik vasitəsi ilə 2 aylıq tək giriş viza almışam.Kuala-Lumpur (Malayziya): Şəhər olduqca müasir şəhərdir. Yaxşı nəqliyyat sistemi, müxtəlif mətbəxlərə aid restoranlar və s. var. Axtardığınızı tapacaqsınız. Ümumilikdə isə mənim üçün ən problemli məsələlərdən biri yemək olub. Daha çox Pakistan, Ərəb mətbəxinin olduğu restoranlarda yeyirəm.İqlim: Hal-hazırda Malayziyada yağışların bol olduğu sezondur. Lakin bu halda belə, yağış mənə ciddi problem yaratmayıb, demək olar hər gün eyni vaxtda yağır (15:00 - 16:00) və qısa müddətdə dayanır. Malayziyada olduğum digər bölgələrdə, misal üçün Lanqkavidə demək olar heç yağmır.Bazarlıq: Malayziyada ümumilikdə bizə nisbətən ucuz və ya eyni qiymətdir, nəqliyyat, texnologiya, geyim, ərzaq və s. Nümunələr: 150 km qatar nəqliyyatı - 4 AZN 360 km avtobus nəqliyyatı - 16 AZNTəhlükəsizlik: Məncə, Malayziya olduqca təhlükəsizdir. Əksini hiss etdiyim hər hansı bir hadisə ilə rastlaşmamışam. Küçədə yaşayan insanlar çoxdur, bu ilk baxışda narahatlıq hissi yaradır, lakin buna öyrəşdikdən sonra əvvəlki qədər narahat etmir. Əlavə olaraq, insanlarda ingilis dilini bilmə səviyyəsi yüksəkdir və kömək etməyi sevərdirlər. Suallarınız varsa, cavablamaqdan məmnun olaram.Gəziləcək yerlər haqqında növbəti postlarda yazacam. Instagram-da gəzdiyim yerlər, Malayziya, İndoneziya və digər asiya ölkələri haqqında da məlumat paylaşıram, siz də izləyə bilərsiniz: https://www.instagram.com/bashiroglu/Paylaşan: Abdulla Bashiroglu

63 dəfə oxunub

Tayland - Phuket Adası Bələdçisi

Hərkəsə salam. İllərdi arzusunda olduğum Tayland'a, phuket adasına getdim axır ki. Keçən il artıq qəti qərar verdim, gedecəm dedim. Artıq özümü tam hazır hiss edirdim. Hər gün bilətlərə baxırdım ki, ən ucuz bileti necə tapa bilərəm.Sizə kömək olar deyə özümün bəzi təcrübələrmi bölüşmək istəyirəm.Uçuş, viza və digər vacib məsələlərBilet: Indigo Hava Yolları – 1080 AZNViza: 68 manat (Onlayn almaq mümkündür!)Oktyabrın 8-dən etibarən vizanı onlayn almaq mümkündür və prosedur olduqca sadədir. Tələb olunan sənədlər: Şəxsiyyət vəsiqəsi Xarici pasport Uçuş biletləri (gediş-dönüş) Otel rezervasiyaları Sizin şəklinizSəfirliyin öz mail adresinə yazmışdım ki, cavab nə vaxta çıxar?10-15 iş gününə dedilər. Dekabr ayı idi və sezon başlayırdı deyə gec gəlməsi normaldı məncə. Sizdə daha tez gələ bilər cavab. 12 ya 13-cü gündə əlavə sənəd istədilər. Otel rezervasyalarımı tam istəyirdilər, mən isə müəyyən günlərin rezervasiyasını göndərmişdim, dedim yəgin problem olmaz amma onlar qalacağım günlərin rezervasiyasını tam istədilər. Ondan sonra 2 iş gün içində təsdiqlədilər. Qısaca viza almaq onlayn sadədir, problem olmur.PhuketGəldiz çatdız Phuketə, hava limanından düșən kimi taxilər var bilet alıb gedə bilərsiniz rahat. Hava limanın içində exchange'lər, sim nömrə satan yerlər doludu. Mən nömrəni ordan almadım. Patongda düşən kimi hər yerdə exchange, tur satan, nomre satan yerlərlə doludu. Mən elə ordan aldım nömrəni. Exchange edəndə də baxın sərf edir yoxsa yox. Bir də pulu sayın həmişə yanında. Bir də qeyd edim orda ən məşhur app'lar bolt və grabı gördüm. Nömrə alanda mütləq orda aktiv edib, grabdan qeydiyyatdan keçin. Məndə belə bir problem oldu, nömrə başqa adamda da olduğu üçün grab'dan qeydiyyat edə bilmədim. Yaxşı ki bolt işləyirdi, ondan istifadə etdim. Hər yerdə seven-eleven marketlər doludu, səhv eləmirəmsə orda da nömrə satılır daha sərfəli qiymətə. Ondan əlavə Big c marketləri daha böyükdü ordan da yemək içməyinizi ala bilərsinizQalacağınız yeri düzgün seçin.Mən Patong'da qalırdım həm dənizə yaxındı həm yemək çeşidləri çoxdu həm də əyləncəsi yaxşdı. Phuket' də çoxlu aktivitelər edə bilərsiniz, fillərlə yürüş, onları yedizdirmək, çimizdirmək, pələngləri görmək, akvarium ve s. çoxdu. Mən çox da sevmədiyim üçün filləri falan görməyə getmədim. Mənim üçün əsas olan adalar idi. Phuketdə çox qalmağı məsləhət görmürəm, 2-3 gün bəs edər deyə düşünürəm. Təbii ki vaxt varsa daha çox qalmağ olar oranı tam başa düşmək üçün. Mən olsam daha çox adalara gedərdim. Phuket'də Big buddha'ya getdim, təssüff ki bağlı idi. Yağış mövsümündə, güclü yağışlar olub, torpağ sürüşüb. Belə dedilər mənə. Yenə də ora kimi gedib mənzərəni falan görə bilirsən amma içəri buraxmırlar. Videosunu atacam hara kimi buraxırlar. Phuket old town'a gedib görmək olar, Patong'a baxanda daha sakit, daha temiz yollar görürsən, qısaca Patongdakı xaos olmur. Qətiyyən şəhər turu almırsınız, boşuna ona pul verməyin, özünüz gedin gəzin. Ada turlarını alın amma diqqətli olun, çunki dəhşət çox turist olur, (dekabr-may) və turları çox baha qiymətə satırlar.Danışıb qiyməti aşağı salın, alveri sevirlər. İlk deyilən qiymətə alsanız çox peşman olacaqsız. Mən sizə haradan almağ məsləhətdi onu qeyd edəcəm. Joe qaqaş var, çox şirin biridi mütləq turları ondan alın ən ucuz onlarda gördüm. Yeri phuket old town'da yerləşir. Patongda 4000 baht falan deyirsə phi phiyə və ya digər yerlərə qətiyyən almayın, qiyməti aşağı salmağ çalışın. Mənə də o qədər deyirdilər 1500-ə kimi düşdü. Similian adalarını hələ 6000-ə yaxın deyirdilər. Yaxşı ki Joe qaqaşı tapdım, ondan aldım 2100-ə.Tour agencyJoe:+66 90 965 9044Tayland təhlükəlidirmi?Qətiyyən, ən azından qaldığım Phuket adasında, Phi Phi adasında elə bir şeyə rast gəlmədim. Əksinə insanlar bir-birnə qarşı çox gülərüz, mehribandılar. Mən 3-4 hostelde qaldım hər şey əla idi, təmizlik baxımdan. Bircə hindilərin olduğu hostellərdən uzağ dursanız yaxşı olar. Hosteldə qalanda dəyərli əşyalarım falan var idi, çox rahatlıqla orda qoyub gedə bilirdim, hərkəsdə elə idi onsuz.Lap belə deyirsizsə yox mən yenə də ortalıqda qoya bilmərəm gedirsiz seven eleven'dən qıfıl alırsız özünüz üçün. Hər hostel vermir bunu, ağlınızda olsun.Qısaca kimin ağlında belə suallar var idisə narahat olmasın.Tayland yeməkləriOrdan dəqiq ac qalmarsız, əgər çox narahatsızsa. Mənim də elə tərəddüdlərim var idi düzü amma düyülərinin hamısından yoxladım normal idi, hətda çox bəyəndim bəzilərini. Yenə də bəyənməsəz belə fərqli-fərqli ölkələrin restoranları var. Dəniz məhusllarını sevənlər üçün cənnətdi. Təssüff ki, mən çox sevmirəm. Hər gün meyvə suları içirdim çoxlu. Siz də getsəz bunu bol-bol edin :dO boyda yol getdiz elediz masajsız olmaz da  Gündə masaja getmək istəyəcəksiz. Təbii ki ehtiyyatlı olun yer seçəndə, onsuz çox rahat, haranın normal masaj yeri olduğunu seçə biləcəksiz.Mütləq getməli olduğunuz yerlər! Phi Phi Islands Maya Bay Pileh Lagoon Viking Cave Monkey Beach Bamboo Island Phi Phi Viewpoint James Bond Islands Ko Tapu (Məşhur qayalı sütun) Phang Nga Körfəzi Similan Islands Donald Duck Bay Similan Viewpoint Elephant Head Rock Krabi və ətrafı Railay Beach Phra Nang Beach Ao Nang Beach Əgər daha çox vaxtınız varsa, Buralara da gedin : Koh Samui Koh Phangan Ko TaoHə bir də unutmadan deyim, Phi phi adasında axşamlar qəşəng alovlu şoular olur, gedin izləyin. Ondan əlavə boks gecəsi olur saat 9 da başlayır 1-ə kimi davam edir. İçəri kecmək üçün bir içki almağınız bəs edir. Bundan əlavə istəsəniz sizdə döyüşə bilərsiniz orda Əlavələr olsa bölüşə bilərsiniz.Paylaşan: Aykhan Iskandarli

70 dəfə oxunub

Camogli – Liguriya sahilində Cənnət

Camogli – Liguriya sahilində sakit, rəngarəng bir cənnət Öncəliklə salamlar hər kəsə!Uzun zamandır sizə səyahət təəssüratlarımı paylaşmırdım, bu dəfə isə İtaliyanın Liguriya sahillərində yerləşən Camogli adlı kiçik, rəngarəng, amma çox sevimli bir balıqçı şəhərindən yazmaq istəyirəmCamogli Genuyaya yaxın yerləşir və qatarla 30–40 dəq-lik məsafədədir. Mən Romedan qatarla gəldim təxmini 6 saata. Dəniz sahili, rəngli binaları və sakit atmosferi ilə məni valeh etdi. Bura daha çox italyanların özlərinin istirahət etdiyi bir məkandır(xaricilər cox az gördüm) – hələ "kəşf edilməmiş" incilərdən biri desək, yanılmarıqCinque Terre və Portofino sahillərinə çox yaxındır, Və ən önəmlisi – onlarla müqayisədə xeyli daha münasib qiymətlidir! Boatlarla rahatlıqla bu sahillərə gedə bilərsiz.Ev kirayəsi və otel qiymətləri:Mən Airbnb-dən 3 gecəlik ev götürdüm – qiymət total 338$ (2 nəfərlik). Ev düz mərkəzdə yerləşir. Şəkillərdən evin viewsun görə bilərsizhttps://www.airbnb.com/l/Gh4C4cQtYemək:Şəhərdə dəniz məhsulları ilə məşhur balıq restoranları çoxdur. 12-14 euro arası qarışıq balıq məhsulları almaq olur. Pizzalar 8eurodan başlayır. Mağazalarda su qiyməti 0,50 euro. Gündəlik 2nəfərə qidalanma 50-60 euro civarı cıxır. Bir sözlə qiymətlər cox münasibdir. Yemək qiymətləri barədə ətraflı mina.frzll instagram səhifəmdə paylaşım etmişəm.Kiçik məsləhət:Yayda getsəniz, çimərlik ayaqqabısı götürün – çünki çınqıllı çimərlikdir.Paylaşan: Mina Farzali

65 dəfə oxunub
Bizi izləyənlər siyahısına qoşulun!