1655 dəfə oxunub

Şəhər bələdçisi - Əbu-Dabi şəhərində maraqlı nə var?

Əbu-Dabidəki bütün otel, apartament və hostelləri bu linkdən book (bron) edə bilərsiz.
Əbu-Dabi şəhərində maraqlı nə var?

Wizz Air aviaşirkəti sayəsində artıq 50-60€ kimi kiçik büdcə ilə BƏƏ-nin paytaxtı Əbu-Dabi şəhərinə gedib qayıda bilərik. Hətta bəzən qiymətlər 2-6€ olur.

1. Şeyx Zayed məscidi. Sheikh Zayed Mosque

Tonlarla ağ italyan mərmərindən istifadə edilərək tikilən, memar Yusuf Abdelki tərəfindən layihələndirilən möhtəşəm məscid turizm mərkəzidir.

Məscidin xalçası 5 il ərzində 1200 qadın tərəfindən minlərlə ton Yeni Zelandiya yunundan istifadə edilərək toxunmuş və 5300 kvadratmetr ölçüsü ilə dünyanın ən böyük əl ilə toxunmuş xalçasıdır.

Məscid isə dünyanın 3-cü ən böyük məscidi olaraq siyahıda öz yerini tutub. Böyük mərmər sahələr firuzə, mərcan, svarovski və s. qiymətli daşlarla bəzədilmişdir.

2. Luvr muzeyi. Louvre Abu Dhabi

Ərəb dünyasının ilk universal muzeyi, ərəb memarlıq sənətinin müasirliklə qovuşduğu mərkəz olan Luvr muzeyinin layihəsi memar Jan Nouvelə məxsusdur.

Burada bir çox qədim sivilizasiyalara aid tarixi tapıntılarla yanaşı, 19-cu əsrə aid sənət kolleksiyası da var.

Link: https://www.louvreabudhabi.ae/

3. Emirates Palace Hotelə mütləq baş çəkin!

Emirates Palace

Adı hotel olsa da, əslində saraydır. Qızılla bəzədilmiş dizaynlara, parlaqlığa və əzəmətə baxmaq lazımdır.

Hotelin interyeri klassik, lakin çox qəşəng bəzədilmişdir. Foyedən tutmuş koridorlara və tualetlərə qədər səliqəli tikilmiş strukturdur.

Hotelin daxilindəki BBQ AL QASR restoranında nahar etməlisiniz. Restoran hotelin terrasındadır, möhtəşəm mənzərəsi var. Qiymətlər çox aşağı olmasa da, bu gözəl mühitlə müqayisədə yüksək deyil.

4. Corniche sahilboyu küçəsi. Corniche Beach Abu Dhabi

Küçə, Əbu-Dabinin şimal-qərb sahilinin çimərlikləri boyunca, hündür blokların kölgəsində, tər-təmiz piyada və velosiped yolları, mənzərəli parklar, dəbli restoranlar, yüksək ulduzlu otellər ilə təchiz edilmişdir.

Corniche küçəsi şəhərin ən prestijli bulvarıdır. Çimərliklərə asan girişi təmin edən yolun altındakı tunellər, Etiad Towers və Emirates Place mənzərəsi göz oxşayır.

Dənizin parıldadığını, gur yaşıllığını seyr edərək gəzmək insanın ruhunu sakitləşdirir.

Parkların birində skamyada əyləşmək, kafelərdən birində əsl ətirli kofe içməkdən həzz almanızı tövsiyə edirəm.

5. Yas adası. Ferrari World Abu Dhabi Ferrari World Abu Dhabi

Mütləq görüləsi yerlərdən biridir. Xüsusilə sürət həvəskarısınızsa şəhərdə ilk gedəcəyiniz yer bura olmalıdır. Bura əslində böyüklərin özlərini uşaq kimi hiss edib əylənə bildikləri yerdir, 10 yaşdan kiçik uşaqları aparmayın.

Burada müxtəlif atraksionlar var. Ən çox tələbat isə adrenalin sevənlər üçün 52 metr yüksəklikdə sürəti 4,9 saniyəyə 240 km/saata çatan "Rollcoaster" simulyatorudur.

6. Warner Bros. World Abu Dhabi

Uşaqların əylənməsi üçün ideal yer. Dünyada bu kimi maraqlı və tam təchiz olunmuş yerlər barmaqla sayılacaq qədər azdır.

7. Qasr Al Watan

BƏƏ rəhbərinin iş yeri. Möhtəşəm memarlıq əsəridir. Ziyarət etsəniz peşman olmazsınız. Əmirliyə səfər edən dövlətlərin rəsmi nümayəndələrinin qəbul olunduğu nümayəndəlik sarayıdır. Döşəmələrdən qapılara, çilçıraqlara, mərmərlərə və oymalara qədər detalların gözəlliyini görməmək mümkün deyil. O qədər gözəl memarlıq nümunələri var ki, göz hara baxacağını bilmir. Günortadan sonra getsəniz, gün batdıqdan sonra gözəl musiqi dinləyə və işıq şousuna baxa bilərsiniz.

8. Yas Mall. 400-dən çox dünya brendini təklif edən mağazalar, restoran və kafelər, 20-dən çox kinoteatr, təmiz, səliqəli, geniş və sərin quruluşu olan nəhəng ticarət mərkəzi.

9. Observation Deck 300, Jumeirah At Etihad Towers, Abu Dhabi

Həm şəhərin panoramic mənzərəsini, həm də günəşin doğmasını və batmasını seyr etmək istəyənlər üçün maraqlı yer ola bilər.

10. Abu Dhabi Falcon Hospital

Şahin xəstəxanasıdır, içəridə şahinlər haqqında hər cür məlumat ala bilərsiniz, həm də əlinizdə tutub şəkil çəkdirə bilərsiniz. Mütləq əvvəlcədən telefonla görüş təyin edin.

Qiyməti 1 milyon dirhəm (272000$) hətta daha baha olan quşların sahibləri onların hər xırda problemi üçün bura gəlirlər.

11. Saadiyat çimərliyi.

Saadiyat Beach Club

Ağ qumu son dərəcə gözəldir, dəniz tər-təmizdir və parıldayır. Şəhərdə çimərlikdə vaxt keçirmək üçün bir nömrəli yerdir. Tez-ez yaxınlığa suda oynayan delfinlər gəlir. Həftə sonları və bayram günlərində xeyli sıxlıq olur.

12. Yas Gateway Park

Demək olar ki, tamamilə bitki örtüyü olmayan bir ada, süni suvarma sistemi sayəsində abadlaşdırılıb.

Bu da parkda bir zamanlar Ərəbistanda mövcud olan faunanı bərpa etməyə imkan verib.

Ada zürafələrin, antilopların, kaftarların, bəbirlərin, gepardların, ceyranların, dağ qoçlarının, dəvəquşlarının və bir çox başqa canlının gətirildiyi vəhşi təbiət qoruğuna çevrilib.

Qoruğun ərazisi 87 km²-dir. Ada üç hissəyə bölünür: 1-ehtiyat, 2-heyvanlar üçün, 3-könüllülər, otel, marina və çimərlik olan turizm zonası).

Ada MSC və Kosta kruiz xətlərinin marşrutu üzərindədir. Əsas yaşayış məntəqələri: Zar və Dasa. Adanın landşaftı əsasən düzdür. Adada çay yoxdur. Sahildə manqrov meşələri var. Dincəlməyə gələn hər qonağın şərəfinə manqrov ağacı əkilir. Bundan əlavə, ada dəniz qoruğu kimi xidmət edir - dəniz quşları üçün yuva yeri, okean tısbağaları üçün nəsil artırma mərkəzi sahil sularının biomüxtəlifliyini qoruyub saxlamağa imkan verir.

13. Emirates Park Zoo & Resort

Emirates Park Zoo və Resort Əbu-Dabidən 35 km aralıda, Əl Bahia bölgəsində yerləşir.

BƏƏ-nin ən yaxşı zooparkıdır. Bütün BƏƏ-də tapa biləcəyiniz ən yaxşı Zoopark. Maraqlı dizayn edilmiş və bəzədilmişdir. Qaçırmaq istəmədiyiniz bir çox əyləncə növü var.

Uşaqları əyləndirmək üçün ideal yerdir. Zürafələri, begemontları, filləri, dəvələri, zebraları, keçiləri, ceyranları və digər canlıları əl ilə bəsləmək ilanı boynunuza taxa bilmək və əlinizdə qartal tutmaq şansınız olacaq. Hətta zürafələrlə birlikdə səhər yeməyi proqramı da var.

Zooparkın restoranı, əyləncə mərkəzi və hoteli də var.

14. Qasr Al Hosn şəhərin ortasında bərpa edilmiş istehkamdır, şəhərin tarixi təməlinin qalığıdır. Burada şeyxlərin hekayəsini və Əmirliyi necə inkişaf etdirdiklərini görəcəksiniz. Qədim zamanlarda səhrada həyatın sadə və sakit görünüşünü təqdim edir. Qalanın yanında incəsənət mərkəzi də var. Qasr Al Hosn əvvəllər bölgənin mirvari dalğıc iqtisadiyyatını qorumaq üçün tikilmiş qala idi. Kral ailəsi üçün yaşayış sahəsi vaxt keçdikcə genişlənərək saraya çevrilib.

15. Heritage Village Abu Dhabi

Şəhəri ən yaxşı şəkildə görüb şəkil çəkdirə biləcəyimiz nöqtə. Çimərliyə keçidi olan açıq səma altında muzey.

Ərəblərin yerli həyatını göstərmək üçün tikilmiş yer. Muzeydə ərəblərin harada qaldığını və necə yaşadıqlarını görə biləcəksiniz.

Heritage Village üçün bir neçə saat kifayətdir. Sol tərəfdəki əsas qapıdan girdiyiniz zaman, keçmişdə səhrada yaşanan həyata bənzəyəcək şəkildə qurulmuş bir sahə var. Keçmişdə istifadə edilənlərə bənzər bir ev görəcəksiniz. Ziyarətçilərə minməyə icazə verilən dəvə də var. Çox müxtəlif malların satıldığı bir bazar da var. Keçmişdən qalma qalıqların muzeyi var. Su üzərində müasir Əbu-Dabiyə gözəl mənzərəsi olan bir çimərlik var. Tövlələrdə uşaqların əylənməsi üçün başqa canlı heyvanlar da var. Ən maraqlı sahə sənətkarların öz əl işlərini nümayiş etdirdiyi və satış üçün çox gözəl əşyaların olduğu yerdir. Dəri sənətkarlıq, gözəl çantalar və başqa əşyalar, şüşə düzəldən, toxucu, dulusçu var.

16. Mangrove National Park, Abu Dhabi

Manqrov ağacları arasında qayıqla səyahət edib flaminqolara, balıqlara, böyük tusbağalara baxıb sakitləşmək istəyirsinizsə mütləq bura baş çəkin. Ekoloji səbəblərə görə yalnız elektriklə işləyən qayıqlara icazə verilir, bu da onların əksəriyyətinin günəş enerjisi ilə işləyən və çox səssiz olması deməkdir.

17. Umm Al Emarat Park

Ailənizlə şəkil çəkdirmək və vaxt keçirmək üçün mükəmməl yerdir.

Uşaqlar üçün oyun meydançası, yemək dükanları var.

Təbiət parkına çox yaxındır. Əbu-Dabinin ən yaxşı parklarından biri. Əvvəllər "Əl Müşrif parkı" adlanırdı. Kiçik zoopark var. Çoxlu uşaq əyləncə növləri var. Tədbirlər adətən həftə sonları keçirilir. Parkdakı mənzərə heyrətamizdir. Parkda həftə sonları Yoga məşqləri keçirilir.

18. Abu Dhabi National Exhibitions Company - ADNEC

Əbu-Dabidəki ən qeyri-adi tikililərdən biridir və bu gün artıq BƏƏ-nin paytaxtının simvoluna çevrilib. Göydələn dünyanın ən böyük maili binası kimi Ginnesin Rekordlar Kitabına düşüb. Binanın əyriliyi məşhur Piza qülləsindən 4 dəfə çoxdur.

19. Dates Market Abu Dhabi

Bazar heç də böyük deyil və bir sıra kiçik dükanlardan ibarətdir. Hər mağazada əzbər öyrəndikləri ifadələrlə turistləri çağıran dəllallar var:

“Gəlin! Ən ucuzu bizik! Burada həm yerli xurma, həm də İran, İraq, Fələstin, İordaniya, Oman, Bəhreyn və digər ölkələrdən gətirilmiş xurma ala bilərsiniz.

Xurmanın müxtəlifliyi heyranedicidir: təzə var, toxumlu və toxumsuz qurudulmuş var- qoz və püstə ilə doldurulmuş şokoladlı xurma. Hər zövqə görə xurma var. Xurmadan başqa başqa şirniyyatlar və tropic meyvələr də var.

Azərbaycan Turizm Blogerləri Assosiasiyası

#uçmaqüçündoğulanlar #travelblogger #travel #VisitAbuDhabi #abudhabi #emirates #uae #visituae

DİGƏR BLOQLAR

Strasburq bələdçisi - "Capitale de Noel"

Sizə biraz Strasburqdan danışım...Bəzən yaşadıqlarını nə sözlərlə, nə də təəccüblə ifadə edə bilirsən. Gözlərimizin gördüyü, zövqümüzün oxşadığı və nəticə də keçirdiyimiz hislər sanki sonsuz bir xoşbəxtlik alqoritmidir. Nəticədə ortaya çıxan harmoniya biz var olduğumuz müddətdə bizimlə həmişə yaşayır və hər zaman emosional bir pəncərə kimi həyatda neqativ olduğumuz zamanlarda açılaraq bizi "charge" edir. Strasburq da onlardan biridir...Hər şey təsadüfdən doğur. Strasburqla görüşüm plansız şəkildə sürətlə cərəyan etdi. Norveçdən qayıtdıqdan 20 gün sonra təsadüfən Wizzair'in Kutaisidən 20 AZN dəyərində təklif etdiyi bileti görübdə almamaq "vicdan əzabı" olardı :) Bu tip biletlərə qarşı çox həssasam nədənsə. Uçuş Fransanın Mulhouse şəhərinə idi, Strasburqa 115 km məsafə yerləşir. Həmçinin ən bəyəndiyim hava limanı olanı olan BaselMulhouseFeiburg (3 ölkəninin aeroportu) ilk tanışılığım idi. Bu aeroportun özəl cəhətlərindən biri də əlverişli tranzit mövqedə yerləşməsidir, Fransa torpağında yerləşsə də Almaniya və İsveçrənidə əhatə edir. Təsəvvür edin, hava limanından Basel şəhərinə məsafəs 7 km-dir, yəni piyada ????Strasburqda münasib qiymətə hostel demək olar ki, yox dərəcəsindədir. Buna görə də Couchsurfingə üz tutdum və qısa müddətdə yerli bir fransız tərəfindən təklifim qəbul edildi. Gecə saat 02:00 və biz (1 nəfər yoldaş) nəhayət Strasburqa qədəm qoyduq. Gecə şəhərin sükutunu kainatın ulduzları tərəfindən ifa olunurdu sanki. Nəhayət evi çətinliklə tapıb, gecələdik.Qeyd edim ki, Alsas əyalətinin paytaxtı sayılan bu şəhər təbiətlə harmoniya təşkil edən şəhərlər silsiləsindəndir, bal ayı etmək istəyənlər üçün münasibdir fikrimcə, romantik şəhər adlandırmaq olar. Əlavə olaraq, 1 saatlıq məsafələrdə yerləşən Colmar şəhərciyinə və Baden-Badenə yəni Almaniya ərazisinə də keçmək olar.Şəhərin mərkəzi hissəsi "Le petite France" (lö peti fxonse) kiçik Fransa deyilən hiss əsas turistik yerdir. İll çayının qucaqladığı bu möhtəşəm şəhər bir-birindən fərqli, rəngarəng pitoresk evləri, kanalları, körpüləri, dar küçələri və yerli məhsulların satıldığı saysız-hesabsız mağazalar dolu, 273.000 əhalisi olan sakit, firavan, oksigen dolu bir həyat tərzinə malik bir şəhər.Şəhərdə gəzərkən mütləq Motsartın Romanze əsərini dinləyin, o zaman şəhərin ruhunu daha yaxından hiss edəcəksiz. İlk üzləşdiyim St. Paul protestant kilsəsi uzaqdan tipik görünsə də, yaxından nəzər yetirdikdə, fərqli toxunuşlar adamı valeh edir. Kilsələri sevirəm, səfər etdiyim şəhərlərdə ilk olaraq muzeyləri və kilsələri ziyarət edirəm. Lakin bu dəbdəbəli tikilini necə sevməyəsən, çox qədimdə deyil, 129 yaşı var. Onun "gothic" arxitekturalı tərzi, qədimi xarakterli olması, incə naxışlarla nəhəng bir tərzdə təcəssüm olunmağı və əlavə olaraq qeyri-səlis rəngə malik olmağı insanın gözündən lap ruhunu oxşayır. Strasburqun qəlbində yerləşən, hər il 6 milyon turistin ziyarətinə gəldiyi, yaxşı 1000 ildən çox olan, Notr-Dam katolik kilsəsini tərif etməyə isə sözlər kifayət etməz. Viktor Huqo da kilsə haqqında fikrini "nəhəng və incə möcüzə" olaraq bildirmişdir. Əslində boşuna deməyib, çünki kilsənin özünə xas olan rəngli daşları çox qırılqan və incədir, dəfələrlə yenilənib, bərpa olunmuşdur. Həmçinin kilsəni ağlın tapınağıda adlandırırlar. Kilsəsinin içərisindəki astroloji saat Rönesans dövrünün rəssam, heykəltaraş və riyaziyyatçıları tərəfindən ərsəyə gətirilmişdir.Həmçinin onu da qeyd edim ki, şəhər 1949-cu ildən Avropa Birliyinə ev sahibliyi edir. Avropa Parlamenti və onun İnsan Haqqları məhkəməsi də burada yer almaqdadır. Buna görə də AB-nin Brüsseldən sonra 2-ci əsas məkanıdır. Avropa parlamentinin Brusseldən sonra 2-ci əsas görüş nöqtəsidir.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Royal Planck‎

1619 dəfə oxunub

Baqajınız zərər gördükdə nə etməli?

25 Ölkədə olmuşam, fərqli hava yolları ilə uçuşlar etmişəm. Soruşsanız ki ən pis hava yolları hansıdır, şübhəsiz ki, Amerikada daxili uçuşlar icra edən hava yollarının adını çəkəcəm. Bunlardan biri də Frontier'dir.Çiynimizdə 1 ədəd çanta, 1 ədəd kiçik TravelGuitar və mənim Tar alətim var idi.Təyyarəyə minik başlayanda mənə bildirdilər ki,çantalar free'dir amma 1 adam 1 alət götürə bilər özü ilə və hər alətə görə də 55$ ödənilməlidir. Bildirdim ki, Tar ilə Gitaramı üst üstə qoyanda heç normal akustik gitaranın ölçüsü etmir. Dedim ödənişi edirəm amma Tarı özümlə Cabinə götürmək istəyirəm. Çox aqressiv şəkildə yox dedilər Tar baqaja getməlidir. Gitaranın furlyarı nazik olduğundan onu baqaja verə bilməzdim. 5/7 dəqiqə dirəşsəm də day uzatmadım ( Tarın Hard case'i olduğuna görə dəfələrlə baqaja gedib və sapsağlam alətimi hava limanından götürmüşəm ) Amerika daxili isə ilk dəfə idi baqaja verirdim Tarı. Alətin üstünə əlləri ilə böyük “ FRAGILE “ yazmaqlarına baxmayaraq getdiyimiz ştatın hava limanında futlyarın qarpız kimi partladığını gördüm. O cür bərk materialın çatlayıb aralanması üçün çox hündürdən çırpmaq və yaxud üzərinə hədsiz ağır əşya qoyulmalıdır. Baqajda alətə alət kimi yanaşmayıblar, üstündəki yazıya isə heç fikir verən olmayıb. ( Amerika daxili 2 uçuşda 3 çimodanımızı qırıblar fərqli hava yolları ) Çimodanımızın birini də bunlar qırdı " sağolsunlar ". Bu vaxta kimi heç vaxt hava limanlarında yaxınlaşıb qırılmış baqajın ödənişi üçün müzakirə etməmişəm. Lakin təyyarəyə minmədən öncə Tarı məcburi şəkildə əlimdən alıb baqaja verən, aqressiv şəkildə danışan işçilərin sifəti yadıma düşdüyü üçün əsəbləşdim! Dedim bu dəfə qırğın edəcəm!) Dili yaxşı bilməyə-bilməyə indi ya sizə verən Allah ya mənə misalı ilə söhbət eliyirəm. Sağolsun dostum #Malik bizi qarşılamağa gəldiyi üçün ətraflı müzakirələri o aparmağa başladı.Hava yolları nümayəndəsi Qırılmış baqajların şəklini çəkib özlərinə götürdülər araşdırma üçün, bizdən də əlavə məlumatlar aldılar.Bir müddət sonra mail yazdılar ki, 55$ alət üçün, 75$ baqaj üçün ödənən məbləğlər kartınıza qaytarıldı və dəymiş ziyanın qarşılığı olaraq sizə 400$-lıq uçuş bileti təklif edirik.Mənə ?! 55$? uçuş bileti ?! Əsəbim 3 qatına çıxdı! Mən o ödənişlərdən imtina etdim! Bildirdilər ki, bizə çek təqdim olunmadan biz sizə əlavə ödəniş etməyəcəyik. Çekləri atmamağın necə vacib olduğunu indi anlamışdım) Çimodanın çekini atdığıma görə o məbləğ ödənilmədi amma Tarın və futlyarın çeki var idi. Sağolsun dostlarımın biri musiqi mağazasının arxivindən qaiməni tapdı, digəri isə tərcümə+təsdiq elətdirib mənə göndərdi! Həmin tərcümə+təsdiq olunmuş qaiməni adı keçən hava yollarının mailına göndərib " Dİ HI " dedim öz ləhçəmiz ilə) Utanmadan hələ də 400$-lıq bilet təklif etdilər. Dedim a kişi, a xala, a bibi, a əmi başınıza dəysin e sizinlə səyahət edən deyiləm bir daha!Biraz uzun çəkən prosesdən sonra nəhayət ki dünən ünvana 1,750$ ???? dəyərində çek göndərdilər!) Sağolsun hava yollarına həftədə 3 dəfə zəng edən Malik! Ona bir sandwich borculyam ???? ( çox güclü qonaqlıqdır )Deyəcəyim odur ki, qaimələrinizin qədrini bilin ???? və baqajınız qırıldığında haqqınızı tələb edin ki, hava yolları şirkətləri özlərini adam kimi aparsınlar.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Rizvan Aliyev

844 dəfə oxunub

Günəşin doğulduğu diyar - Cənubi Koreya

Hər kəsə Salam ????????‍♂️Fikir verdim qrupda Cənubi Koreya ilə bağlı paylaşım azdır.Qərara gəldim ki, bugün sizə 2 il öncə həyata keçirdiyimiz uzaq Koreya səfəri barəsində bir qədər yazam ????????. Başlayaq!????İlk öncə onu qeyd edim ki, Bakıdan Seula birbaşa reyslər təəssüf ki yoxdu, ona görə hər hansısa bir tranzit şəhər seçməlisiz. Biz Pekini seçdik, amma siz seçməyin. İndiyədək gördüyüm ən problemli staff orda oldu????????‍♂️. Alternativ olaraq Moskva, Tokyo və ya 2 saat uzun olsa belə İstanbulu seçməyi məsləhət görərdim, amma Pekin yox. Yol biraz uzundur, amma o əziyyətə dəyər????10 günlük səfərimizdə Koreyanın Seul da daxil olmaqla 5 fərqli şəhərində olduq. Ölkəyə ilk addım atdığınız andan etibarən tam fərqli bir dünyaya düşdüyünüzün fərqinə varacaqsız. İnsanlar çox gülərüz,turistlərə qarşı mehribandır, şərq qonaqpərvərliyinin ilk dəfə burda canlı şahidi oldum. Təhlükəsizlik cəhətdən Seul dünyada criminal rate'in ən aşağı olduğu paytaxt şəhərlərindən biridir. Gecə saat 2-də belə tək, tam rahat şəhərdə gəzə bilərsiniz. Məqsədiniz əylənmək, cavanlıq eləməkdirsə Gangam Station (aha PSY'nin "Gangam style" hitinin çıxdığı yer ????) buna ən uyğun, gənclərin çox getdiyi yerdir. Yox əgər fikriniz görməli yerləri dolaşmaqdırsa, İmperator sarayı ????, Namsan tower, Samsung'un innovasiya muzeyi maraqlı məkanlardır. Paytaxtda 1 tək bəyənmədiyim havasının bir qədər ağır olması oldu. Yerli əhali bunu yalnız şəhərdəki əhali sıxlığıyla yox Çinin əksər zavodlarının ölkənin şimal-şərqində tikməsi ilə əlaqələndirirlər.Ən önəmli məqamlardan biri- yemək məsələsi. Bunu mütləq nəzərə alın ki, Koreyalılar çox acı sevirlər. Yeni bir təam sınayacaqsızsa, su yanınızda mütləq olsun. Ən məşhur yeməkləri kim-çi, bibimbap və balıq məhsullarıdı????. Amma gördüyünüz hər çiy balığa bizim kimi suşi deməyin, yaponları çox da sevmirlər burda  Bir də getmişkən okean balığının da dadına mütləq baxarsız, tam fərqli olur????????. Əgər Koreya mətbəxi ağız dadınıza uyğun gəlməsə, şəhərdə bizə daha yaxın olan Özbəklərin və Türklərin restoranları da var, onları yoxlaya bilərsiniz.Səfərimizin ən maraqlı hissəsi dostumla 1 günlük sadə Koreya ailəsində qalmağımız oldu. Axşamüstü söhbət edəndə ailə üzvlərimizi falan soruşdu, səhər oyananda gördük ki, hər ikimizin ailə üzvləri üçün ayrıca hədiyyələr hazırlayıb ???? Digər maraqlı bir məqam Şimali Koreya ilə sərhədə yaxın ərazidən keçəndə oldu. Uzaqdan görünürdü ki, sərhəd boyunca şimallılar gözəl görünüşlü, əzəmətli binalar tikiblər. İşin ən maraqlı tərəfi odur ki, o binalarda realda yaşayış yoxdu, sadəcə olaraq sərhədboyu görüntü xarakteri daşıyır, bircə gecələr işıqları yandırılır???????????? Məndən məsləhət söhbət düşmədikcə Koreya problemindən danışmayın, həssas məsələdir onlar üçün.İndiyədək olduğum 11 ölkə arasında Koreya Respublikası həqiqətən də ən fərqlisi və əsrarəngizidir. Əgər nə vaxtsa "monoton" Avropa şəhərlərindən bezsəz, istiqaməti şərqə-Asiyaya yönləndirməyi məsləhət görərdim ????#yoladami #KoreyaƏgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Mayıl Mammadli

2119 dəfə oxunub

Orta Asiya bələdçisi - Qırğızıstan

Qırğızıstan gördüyüm ən özünəməxsus ölkələrdəndir deyə bilərəm.Orta Asiya ölkələrini bəlkə də mən çox sevirəm, bilmirəm. Amma zövq alıram buralara səyahətdən.İlk olaraq deyim ki, artıq Bakı-Bişkek reysi açılıb. Amma mən Bakı-Daşkənd reysi ilə, Özbəkistan hava yolları ilə gəldim. Bilet Azaldan biraz daha ucuzdur, amma get-gəl 400$ etdi. Sonra Daşkənddən maşın götürüb kiçik qrup ilə səyahətə başladıq. (Özbəkistanı artıq 2 il qabaq çox gözəl gəzdiyim üçün bu dəfə az qaldım)Özbəkistanın cənubunda yerləşən Andican şəhərinə getdik, ordan da Qırğızıstanın Oş şəhərinə keçdik. Quru sərhədi keçmək hardasa 3,5 saat çəkdi. Amma rahat, incitmədən keçirtdilər (quru sərhəddə ən çox Özbəkistan saxlayır). Qırğızlar Azərbaycandan olduğumu görüb, elə pasport yoxlamasında çox xoş qarşıladılar məni, 10-15 dəq söhbət elədik, keçdim. Əsas məsələ isə Oş-Bişkek yolunda başladı. Yol möhtəşəmdir. 700km-dən biraz uzun olan yol, bütünlüklə perevaldır demək olar ki, ona görə də biz toplam 14 saata getdik bu yolu. Yolda Chickan kendində bir qonaq evində qaldıq, və səhər möhtəşəm dağ və çay mənzərəsinə oyandıq.Sonra yola düşdük və yolda çoxlu sayda quraşdırılmış yurtalar gördük. Birində dayandıq və yüklədiyim videodaki o şirin nənə və nəvələri ilə tanış olduq. Yurtalar yay ayları üçün nəzərdə tutulub, çünki dağlar yayda belə çox soyuq olur. Burada qoyun/quzu/inək otarırlar. Amma adət-ənənələrini qoyurub saxlayırlar. Çox gözəl hisslər ilə ayrıldım buradan.Ölkənin bir başından digər başına maşın ilə səyahətim bitdi. Qırğızıstanın buqədər gözəl olduğunu düşünməzdim heç. Bişkekdən başlasaq, şəhəri (mərkəzini) bir gün içində gəzib bitirə bilərsiz. Sovietləri xatırladan şəhərdə elə ən təzə olan tarix muzeyidir. Mərkəzdə gəzdiyiniz zaman çoxlu sayda divar rəsmləri ilə qarşılaşacaqsınız ki, sırf Qırğızıstanda olduğunuzu xarıtladır. Bundan əlavə mərkəzdə yerləşdirilən yurtada, at südü ala, milli geyimlərlə şəkil çəkdirə bilərsiz. Şəhərdə çoxlu sayda park salınıb, elə təzəlikcə (10ay əvvəl) Azərbaycan-Qırğızıstan dostluq parkı(Heydər Əliyev parkı)-da bunlara daxildir. Hə, şəhərdə bir gün gəzdikdən sonra gedə bilərsiz Ala-Archa Milli Parkına. Yəgin ki, buralarda ən görüləsi yerdir deyə bilərəm.Tər-təmiz dağ havası, yam-yaşıl meşələri adamı lap valeh edir. Hələ Ak-Say şəlaləsinə çatsaz, başqa bir gözəllik ilə qarşılaşırsız.Şəlaləyə 5-6 km piyada yol getməlisiz və 2665m hündürlüyə qalxmalısız. Yol biraz çətindir, ona görə də xüsusi ayaqqabınız olsa yaxşıdır, amma əziyyətinə dəyir.Bişkekdən çıxıb Qırğızıstanın mirvarisi olan Issık-Kula getdik. Ən turistik tərəfi də Borteri kəndi sayılır. Gölün suyu hər zaman soyuqdur sanki, amma gözəlliyinə söz yoxdur. Maraqlısı budur ki, burada hamı cibinə uyğun qalmağa yer tapa bilər. Yəni gölə sıfır məsafədə otaqların gecəsin 15-20 AZNdə tapa bilərsiz, və ya premium otellərdə gecəsini 250-300 AZNdə götürə bilərsiz. Ətraf şəhərlər/kəndlərdə demək olar ki görüləsi çox yer yoxdur, əsas əyləncə elə gölün özüdür, və təbii ki su üstü və altı müxtəlif atraksionlar.Ən turistik yerində belə fikrimcə nə yemək, nə də atraksionlar baha deyil. Ortalama 4 nəfərlik axşam yeməyi sizə 50-60 AZN başa gələ bilər. Ölkəni maşın ilə səyahət etməyin çox yaxşı fikir olduğunu düşünürəm, çünki əsas gözəlliyi bəzən yolları/dağları/çəmənləridir. Qırğızlar da özbəklər və taciklər kimi çox qonaqpərvərdilər.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Ulkar Gurbanova

945 dəfə oxunub
Bizi izləyənlər siyahısına qoşulun!