954 dəfə oxunub

UCUZ-UCUZ SƏYAHƏT EDƏK?

1. TURŞİRKƏTDƏN VAZ KEÇİN, ÖZÜNÜZ SƏYAHƏT EDİN

Turşirkətlərin xidmətlərindən imtina edib, özünüz səyahət etsəz, bir xeylaq pula qənaət etmənizdən əlavə, həm də daha maraqlı səfər yaşaya bilərsiz.  Düzdür, bu halda səyahətdə hər hansı problemlə qarşılaşsaz, onu da özünüz həll etməli olacaqsız, amma turşirkət də bir çox hallarda yaranmış problemli situasiyadan aradan çıxmağa cəhd göstərir və ya problemin həll olunmasında gücsüz olur. Məsələn, turşirkətlə getdiyim son səyahətdə əlimdə Keniyaya giriş üçün onlayn vizam olduğu halda, sərhəddə Azərbaycan vətəndaşları üçün onlaynla alınmış deyil, yalnız səfirlikdən alınmış vizanın gərəkli olduğunu deyib deport etdilər. Üzdülüyümə salıb 2 saatlıq yol gedərək o biri səmtdəki girişdə də cəhd göstərdim. Orda 1-cidən də betər deport etdilər. Turşirkətin nümayəndəsi də, sərhəddə bir az dil tökdü oranın əməkdaşlarıyla, sonda da dedi ki: «Biz tay gedək». Dəstəni də yığdı getdi. Mənciyəz də qaldım yalqız. Və ya Yaponiya səfərində dostum qeybə çəkilmişdi, zənglərə cavab vermirdi, artıq yola düşmək zamanı idi, turşirkətin rəhbəri yenə çiyinlərini çəkdi. Yaxşı ki, sonda, nəhayət, tapıldı (hansısa oteldə yıxılıb yatmışdı).  Tanzaniyaya da turşirkətin xətti ilə getmişdim. O ki, bir çox səhifələrdə yazırlar e – Tanzaniyada vətəndaşlarımıza vizanı sərhəddə verilirlər, cibimizə də 5-10 dollar basırlar təşəkkür əvəzi ki «Çox sağ olun ki, bizim ölkəyə gəldiz» – o da boş söhbətdi. Tanzaniya gömrükçüləri sərhəddə o qədər halıma acıdılar ki, ürəyim ağrıdı lap onlara. Amma yenə deport elədilər ki, «vətəndaşlarınız dəvət ya vizayla gəlməlidirlər». Yəni sözüm ondadır ki, turşirkətlə də gedəsi olsaz, çox vaxt yaranmış problemlə elə özünüz baş-başa qalacaqsız.

Özünüzün etdiyiniz səyahətdə xəyallarınızın marşrutunu da özünüz cızırsız, uçuş üçün də pul kisənizə uyğun bilet, otel seçirsiz və s. Tələsdirən yox, vaxtı güdən də yox. Ən önəmlisi də, səyahətə xərclədiyiniz pul qat-qat ucuz başa gəlir.

© Ukrayna

2. PLANLAŞDIRIN

Səyahətinizi nə qədər qabaqcadan planlaşdırsaz – maliyyə baxımından bir o qədər çox qabaq düşəcəksiz. Təyyarə uçuşları, dəmiryolu qatarına bilet, otel rezervasiyası, müxtəlif tədbirlərə bilet, konsert, festivallar… Məndə bu hazırlıq 5-6 ay öncə start verir.  Avropada qatar biletlərinə satış bir neçə ay öncə başlanır. Satışın ilk günlərində də standart qiymətlərdən 2-3 dəfə daha ucuz bilet almaq olur. Həm də növbələrdə dayanmaqdan qurtula bilərsiz.

3. YOL XƏRCLƏRİNƏ QƏNAƏT EDİN

Yollarda xərclədiyiniz pullar səyahətin ən çox pul aparan hissəsidir. YANDROUKI.BY saytında təyyarə, dəmiryolu, avtobus biletlərinə, avtomobil icarəsi və qalmaq üçün yerlə bağlı olan çoxsaylı endirimlər olur. Sayt özlüyündə heç bir turist xidməti təşkil etmir, yalnız endirimlər barədə məlumat verərək, xidməti təqdim edən şirkətlərin saytlarına birbaşa keçidləri verir.

4. UCUZ BİLET AXTARIŞI İLƏ GOOGLE-Nİ DARMADAĞIN EDİN

Əslində, bunun üçün çox vaxt 1-2 səhifə də bəs edir. Məsələn, gül kimi KIWI. O ki, sual verirsiz e «Filan yerdən filan yerədək ucuz bileti necə ala bilərəm?» – cavabı elə bu səhifədədir. Ən mümkün istiqamətlərdə ən ucuz aviabiletləri sizin üçün hazır edəcək.

© Serengeti, Tanzaniya

5. AEROPORTDAN OTELİNİZƏDƏK MƏSAFƏDƏ QƏNAƏT EDİN

Demək olar ki, bütün aeroportlardan mərkəz hissəyə taksi ilə deyil, avtobusla da getmək olar. İnternetdə əvvəlcədən axtarıb tapın görün hansı şirkətlərin avtobusları bu və ya digər aeroportdan mərkəzə hərəkət edir.

Yox, dirəşib taksi ilə getmək istəsəz, taksini aeroportda axtarmayın, çünki oradakılar sizi, adətən, daha baha qiymətə aparmaq həsrətində olacaqlar.  Aeroportdan otelinizə beynəlxalq transfer şirkətlərinin təqdim etdiyi xidmətlərdən yararlanaraq da çata bilərsiz. Məsələn, KIWITAXIHolidayTaxi. Aeroportda həmin şirkətlərin əməkdaşları üzərində adınız yazılmış lövhəylə sizi qarşılayacaq. Ödənişi bank kartı ilə də edə biləcəksiz.

6. GÜL KİMİ HOSTELLƏR

Hostel həm ucuzdur, həm yeni insanlarla rahat tanış olmağınız üçün gözəl məkandır. Mən, məsələn, Barselonanın düz mərkəzində, yaxşı şəraitli, səhər yeməkli hosteldə qalırdım. Minimal məbləğə.

Ailə ilə səyahət edirsizsə, bu halda apartamentlərə üstünlük verin. Makedoniyada icarəyə götürdüyüm apartamentə otelə verəcəyim məbləğdən ikiqat ucuzunu verdim. Gül kimi də ev idi. Belə olan halda, lap supermarketdən ərzaq alıb özünüz evdə yemək də hazırlaya bilərsiz. Restoran filana da getmək olar 1-2 dəfə, amma gündəlik restoranları zəbt etsəz, əlbəttə, bir xeylaq xərcləməli olacaqsız. 

7. QALMAQ ÜÇÜN ALTERNATİV ŞƏRAİTDƏN BƏHRƏLƏNİN

Aqroturizm deyilən bir şey var. Havayı qalmaq üçün yer, yemək, əvəzində də ev yiyəsinə gün ərzində bir neçə saat kömək etmək.  Məsələn:

HELP EXCHANGE resursunda dünyanın müxtəlif yerlərindən olan adamlar fermada filanda bir neçə saat işin müqabilində turistlərə qalmağa yer və qida təklif edirlər.

WWOOF 70-dən çox ölkədə fəaliyyət göstərən beynəlxalq təşkilatdır ki, turistlərə orqanik ferma, bağçalarda işin müqabilində qalmağa yer və yemək-içmək təklif edir.

COUCHSURFİNG-i çoxlarınız eşitmisiz. Səhifədə qeydiyyatdan keçirsiz, gələn qonaqları evinizdə qəbul edə və ya özünüz səyahət zamanı həmin qəbuldan faydalana bilərsiniz.

HOUSECARERS isə uzun müddətə harasa getmiş ev yiyəsinin evinə nəzarət etmək imkanı verən səhifədir. Həm də qalmağa yeriniz olur.

© Tarangire, Tanzaniya

8. DƏYİŞ-DÜYÜŞLÜ MƏZUNİYYƏT

Çox adam səyahətə çıxma ərəfəsində AİRBNB saytı vasitəsilə öz evini icarəyə verir, özünüz gəzib-dolanırsız, evinizdə qalanın ödənişi də kartınıza oturur. Və ya evinizi pulsuz-parasız müvəqqəti dəyiş-düyüş edirsiz: məsələn, Almaniyadan filankəs gəlib sizin evdə qalır, Siz isə filankəsin Almaniyadakı evində. Bu cür xidmətlər təklif edənləri aşağıdakı saytlarda tapmaq olar:

HOMEEXCHANGE

HOMELINK

Rusdilli OBMENDOMAMI resursu keçmiş SSRİ üzrə bu cür təklifləri yerləşdirir.

9. PULSUZ-PARASIZ ƏYLƏNCƏLƏR

Yola düşməzdən əvvəl gedəcəyiniz yerdə hansı pulsuz əyləncə tədbirlərinin keçiriləcəyi ilə maraqlanın. Festivallar, konsert proqramları, açıq qapı günləri, ekskursiyalar… Bütün bunları çox vaxt böyüklü-kiçikli şəhərlərdə tapmaq mümkündür. Məsələn, elə Bakının özündə də tursitlərə pulsuz ekskursiya təklif edən qruplar var. FREETOUR saytında pulsuz piyada turlar barədə məlumat almaq olar.

10. BİR AZ ÇEVİK OLUN

Eksperimentlərdən, qəfil marşrutu dəyişməkdən çəkinməyin. Əvvəlki yazımda qeyd etmişdim, imkan varsa tam tur mövsümündə səyahətə çıxmayın, mövsümün sonuna və ya mövsümün başlanmasına 1-2 həftə qalmış həm turist axını az olur, həm də qiymətlər çox ucuzlaşır. Bu minvalla pula 50%-dək qənaət etmiş olarsız.

BƏS SİZ SƏYAHƏT ZAMANI HANSI QƏNAƏT ÜSULLARINDAN YARARLANIRSIZ?

© Zənzibar, Tanzaniya
  Paylaşdı: Ali Akbar (travelstory.az)

DİGƏR BLOQLAR

Wachau Valley - Avstriya

Çaxır sevərlər xüsusi yaxın əyləşin!Bugün sizlərlə əslində hər bir azərbaycanlının gedib gəzmədiyi, lakin Avstriyaya, xüsusən də Vyanaya getdiyi zaman düşünürəm ki, "must visit" siyahısına düşəcək bir məkan haqqında yazacam: "Wachau Valley - Kulturlandschaft Wachau (alman dilində)".Vaxau dərəsi Krems və Melk şəhərləri arasında yerləşir. Dərə paytaxt Vyanadan 90 dəqiqə məsafədədir.Krems şəhərində təhsilim müddətində universitet nəzdində bizi bu dərəyə səyahətə aparmışdılar. Vaxau dərəsi tarixi kəndləri, üzüm bağları (127-dən çox) və çaxır məkanı olaraq məşhurdur. Vaxau dərəsi üçün ideal səyahət zamanı Mart-May aylarıdır. Çünki bu dönəmdə Spitz və Dürşteyn kimi kəndlərdə müxtəlif çaxır dequstasiyaları və festivalları keçirilir.Vaxau dərəsi UNESCO-nun mədəni və irsi siyahısına düşmüş növbəti Avstriya tarixi məkanlarından biridir. Bu dərənin ən vacib məkanlarından biri isə min illərdir Benedikt keşişləri tərəfindən qorunan və idarə olunan Melk Monastrıdır. Bu monastr hər il müxtəlif musiqi festivalları və mədəniyyət tədbirlərinə ev sahibliyi edir.NECƏ GƏLMƏK OLAR:1. Vyana şəhərindən - ÖBB qatarları ilə 45 dəqiqəlik məsafədə yerləşən Krems şəhərinə gəlirsiniz, oradan isə avtobusla Vaxau dərəsinə gedirsiniz. Qatar biletinin qiyməti bir istiqamətə 14 eur.2. Salzburg şəhərindən - ÖBB qatarları ilə St. Pölten qəsəbəsinə (yeri gəlmişkən qəsəbədə türklər çoxluq təşkil etdiyinə görə Türklər şəhərciyi də adlanır) qədər gəlirsiniz, qatarınızı Krems şəhərinə gələn qatara dəyişirsiniz.NƏLƏR ETMƏK OLAR:- Ən vacib nüanslardan biri qızıla qərq olmuş Melk Monastrını gəzməkdir;- Dürşteyn Qalasının qalıqları və tarixi ilə tanış ola bilərsiniz;- Üzüm bağları və çaxır dequstasiyaları edə bilərsiniz;- Dunay sahili boyu Gəmi gəzintisi götürə bilərsiniz (20 eur ilə 100 eur arası dəyişir qiymət);- Velosiped yürüşü edə bilərsinizGECƏLƏMƏK ÜÇÜN XƏRCLƏR:Bildiyiniz kimi, ümumilikdə Avstriya digər Avropa ölkələri ilə müqayisədə baha ölkə olduğu üçün qiymətlər biraz yüksəkdir. Vaxau dərəsindəki otel qiymətləri təxminən 80 eur-dan başlayır.VİZA?Avstriya da Şengen ölkələri siyahısında olduğu üçün Şengen vizası mütləqdir. Viza rüsumu 35 eur, 7-10 iş günü ərzində viza verilir. Vizanı Avstriyanın Azərbaycandakı səfirliyi təqdim edir. Səfirlik Landmark Otelinin biznes mərkəzində yerləşir.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Eva Safarova 

499 dəfə oxunub

Couchsurfingdə asan host tapmaq üçün tövsiyyələr

Keçən yazılardan birində ucuz səyahət etmə haqqında yazmışdım və o yazıda Couchsurfingə toxunmuşdum. Bu dəfə istəyirəm ucuz səyahət təşkil etmək istəyənlərin ən yaxın dostu Couchsurfing haqqında daha detallı məlumat verim. Özüm bir 10 dəfəyə yaxın Couchsurfinglə qonaq qaldığımdan və qonaq qəbul etdiyimdən düşündüm ki, bu vaxta qədər öyrəndiklərimi sizinlə də bölüşüm bəlkə sizin də yardımınıza çatar.Couchsurfing və ya qısa adıyla CS, 2003-cü ildə yardılmış qonaqlama saytı və sosyal şəbəkədir. Saytı yaratmaqda əsas məqsəd səyahət edənləri bir məkana toplamaqdır. Bir şəhəri gəzib-görmənin, kəşf etməyin ən gözəl üsullarından birinin yerli əhali ilə yaşamaq olduğunu nəzərə aldıqda, CS-dən gözəl imkan yaradacaq 2ci bir platforma gəlmir ağlıma. CS-in 2 əsas funksiyası var, qonaqlama-qonaq qalma və görüşmə/bələdçilik. Saytda qeydiyyat ödənişsizdir, sadəcə bir maillə və ya Facebookun köməkliyi ilə qeydiyyatdan keçmək olar.CS əslində bəzi insanlar tərəfindən pulsuz gecələmə yeri kimi görsənsə də əslində bu qətiyyən belə deyil. CS-də adətən eyni ideyaları, dəyərləri, maraqları paylaşan insanlar görüşürlər, bir-birlərini qonaq edirlər. Yəni bu adamlar bizi pulsuz qonaq edirlər, bəs onların bu işdə marağı nədir ki? Sualının cavabı odur ki, sizi qonaqlayan şəxs, sizinlə vaxt keçirmək, müxtəlif ölkələrdən və mədəniyyətdən olan insanlar tanımaq, eyni dəyərləri bölüşmək istəyir ona görə də əgər CSə pulsuz qonaqlama yeri kimi baxırsınızsa, elə bəribaşdan qeydiyyatdan keçməyin və bu yazını da elə burdaca dayandırın :) amma mən bilirəm ki, bizim bloqumuzun oxucuları səyahəti sevən insanlardırlar ona görə də CSdən də qaydalar çərçivəsində istifadə edəcəklər.Səyahətdən xaric oxu 1: Praqa və skelet kilsə Kutna Hora bələdçisiQısa olduğu üçün ilk öncə görüşmə və ya bələdçilik funksiyası haqqında məlumat verim. Bu funksiyadan istifadə etməklə şəhərinizə gələn turistlərə bələdçilik edə və ya getdiyiniz şəhərdə orada yaşayanlardan sizə bələdçilik etməsini xahiş edə bilərsiniz. Bunun üçün şəkildəki kimi sadəcə “Find hosts” seçib axtarış yerinə getdiyiniz şəhərin adını yaza və o şəhərdən olan CS-çilər üçün axtarış edə bilərsiniz.Daha sonra açılan səhifədə “More Filters” seçərək “Wants meet up” seçiminə quş qoyursunuz, daha sonra isə yaş, cins və s. kimi seçimləri edərək yenidən axtarış verirsiniz. Bu dəfə getdiyiniz ölkədə sadəcə turistlərlə görüşmək istəyənlərin profilləri çıxacaqdır. Bəyəndiyiniz, sizə bələdçilik etməsini arzuladığınız profili seçərək 4-5 cümlədən ibarət bir mesaj yazaraq onunla görüşmək istədiyinizi və sizə bələdçilik etməsini xahiş edirsiniz. Sonrası isə məlumdur :)Yox əgər sizin şəhərə gələn turistlərlə görüşüb, şəhərinizi turistlərə göstərib, onları gəzdirmək istəyirsinizsə onda siz “wants to meet up” seçimini edirsiniz və şəhərinizə gələn turistlər axtarış edərək sizə yaza bilərlər.Səyahətdən xaric oxu 2: Addım-addım WizzAirlə bilet almaSaytın digər mən deyərdim ki, əsas funksiyası isə qonaqlama (hosting) və qonaq qalmadır (surfing). Məsələn evinizdə boş bir çarpayı, otaq və ya sadəcə matras/döşək varsa və evinizi, otağınızı bəzən yatağınızı turistlərlə bölüşmək istəyirinizsə CSdə qeydiyyatdan keçib, sizə aid olan bölmələri doldurursunuz və ətraflı məlumat verirsiniz. Bundan sonra turistlər axtarış edəndə siz onlar;n siyahısında çıxacaqsınız və eviniz və özünüz turistin xoşuna gələrsə sizə sorğu göndərəcək ki, filan tarixlərdə sənin şəhərində olacam, məni qonaqlaya bilərsənmi?!Digər tərəfdən səyahətə gedənlər adətən öz profillərində elan verirlər ki, bu tarixlərdə bu şəhərdə olacam. Siz də yuxarıdakı fotodakı kimi, Find travelers seçib şəhərin adını yazıb axtarış etməklə şəhərinizə gələcək  turistlərin siyahısından evinizdə qonaq etmək istədiyiniz turistə səni qonaqlaya bilərəm deyə bir mesaj atıb onun cavabını gözləyə bilərsiz.Qonaq qalma fuksiyasının digər xüsusiyyəti isə qonaq olmaqdır, məsələn siz deyək ki, Milana gedirsiniz və qalmağa yer axtarırsınız CSə girib profil açaraq, məkan hissəsində Milan yazaraq axtarış verirsiniz və çıxan siyahıdan bəyəndiyiniz istifadəçiyə sorğu göndərirsiz ki, bəs filan tarixlərdə Milanda olacam məni evində qonaqlaya bilərsənmi?! Digər tərəfdə (burada də ayrı :D )sizin qalmağınızı ya təsdiq edir, deyir o günlərdə uyğunam ya da profilinizi gözdən keçirib bir bəhanəylə deyir ki, həmin günlərdə boş deyiləm ya elə doğrudan da boş olmur.Səyahətdən xaric oxu 3: Budapeşt - Peşt hissə bələdçisiİndi yəqin ki, fikirləşirsiz ki,tanımadığın adamın evində qalmaq və ya tanımadığın adamı evində qonaq etmək necə olar ki?! Nə qədər təhlükəsizdir bu?! Məhz elə suallara görə də CS vaxt keçdikcə öz sistemini təkmilləşdirir və çalışır ki, istifadəçilərə daha təhlükəsiz bir sistem qursun. Ona görə də saytda feedback bölümünü itifadəyə verib. Turist ev sahibinin evində qalandan sonra onlar 1-1ləri haqqında olan fikirlərini saytda qeyd edirlər və bu feedbacklər hər kəs üçün açıq olur. Ona görə də hər zaman qonaq qalarkən də qonaq edərkən də bu feedbacklərə nəzər yetirin, çalışın azı 4-5 və pozitiv feedbackı olan istifadəçilərin evində qalasınız və ya qonaq edəsiniz.Qonaq qalma üçün sorğu göndərərkən çalışın bu nüanslara diqqət edəsiniz, bu nüanslara diqqət etsəniz yəqin ki, asanlıqla olmasa da sizi evində qonaqlayacaq birini tapacaqsınız:- İlk öncə çalışın profil yaradarkən orada olan bütün bölmələri doldurun, özünüz, maraqlarınız, hobbiniz, niyə CS istifadə etdiyiniz, sevdiyini kitablar, musiqi, filmlər, gəzdiyiniz ölkələr haqqında olan bölmələri doldurun,  çalışın azı 2-3 cümlə yazasınız. Profilinə 4-5 dənədən az olmamaq şərtilə foto yerləşdirin, çünki sizi qonaqlayacaq adam sizin necə göründüyünüzü təxmin etməlidir. Çalışın fotolardan 1-2-si dostlarınızla olan fotolar olsun ki, sizi qonaqlayacaq adam sizin asosyal biri olduğunuzu düşünməsin.Səyahətdən xaric oxu 4: Roma bələdçisi-  Sorğu göndərmək üçün ən ideal vaxt səfər tarixinizdən 10-15 gün öncədir, çünki çox erkən və çox gec olan sorğularda host tapmaq şansınız azalır- heç zaman copy-paste mesajlar göndərməyin, çünki copy-paste mesajlar  qarşı tərəfdən çox asanlıqla anlaşılır və potensial hostunuz başa düşür ki, siz ona sorğu göndərərkən çox da vaxt sərf etməmisiniz. Qonaqlama üçün sorğu göndərmək bir növ motivasiya məktubu yazmaq kimi bir şeydir, hostunuzə mesaj göndərib ona izah edirsiniz ki, niyə hostunuz məhz sizi evində qonaq etməlidir. Çalışın hostun adını mesajda qeyd edəsiniz.- CSdə sorğu göndərənlərin ən çox işlətdiyi yalnışlardan biri odur ki, sorğu göndərən mesajında qeyd edir ki, “mən o qədər sakit olacam ki, heç mənim sənin evində olmağım səni narahat etməyəcək, mənim varlığımı heç hiss etməyəcəksən”. Bu mesajda yalnış olan odur ki, sizi qonaqlayacaq adam sizi qonaqlayıb sizinlə vaxt keçirmək, sizi, ölkənizi və mədəniyyətinizi daha yaxından tanımaq istəyir.- mütləq sorğu göndərərkən hostunuzun profilini əməlli başlı ələk-vələk edin. Hostunuzun nələrdən xoşlandığını, nələri sevmədiyini porfilindən oxuyun. Bəzən hostlar info bölməsində xüsusi sözlər gizlədirlər və deyirlər mesajınızda bu sözü işlətməsəniz avtomatik yox cavabı alacasınız. Bu yazını yaza-yaza elə növbəti səfərim üçün Belçikanın Brügge şəhərində host axtarırdım, hostlardan biri pofilində yazmışdı ki, mesajınıza Nutella sözü ilə başlayın, əks halda rədd cavabı alacaqsınız. Odur ki, sorğu göndərməmişədn əvvəl həm hostunuzun özü, həm də evi haqqında ola infoları mültəq oxuyun- hostunuza gəlib çatacağınız və tərk edəcəyiniz vaxtları verməyə çalışın, hostunuz da insandır onun da özünə görə planları ola bilər :)Səyahətdən xaric oxu 5: Budapeşt - Buda hissəsi- Özünüzlə gedərkən hostunuz üçün getdiyiniz ölkədən kiçik suvenir, lokal bir şirniyyat və ya içki aparın, bu hostunuzda sizin haqqınızda xoş təəssüratlar yaradacaq- fors major hallara hazır olun, ola bilər ki, səfərinizə saatlar qala hostunuz sizi qəbul edə bilməyəcəyini söyləsin, çalışın öncədən buna uyğun bir B planınız olsun. Bundan başqa hər şəhərin özünün CS-də “Last minute Şəhərin adı” adlı qrupları olur, Last minute Paris, last minute Berlin və s. Kimi o qruplara girib hostunuzun son saniyədə sizi qarşılamaqdan boyun qaçırdığını yazıb kiminsə sizi qonaqlayacağına ümid edə bilərsiniz :)Yazını bəyəndinizsə aşağıda olan Facebook düyməsini seçərək blogpostu Facebookda paylaşın, dostlarınız da yazılarımızdan xəbərdar olsunlar. Yox əgər blogun yazılarından ilk xəbər tutmaq istəyirsinizsə sağ tərəf yuxarıda olan “abunə ol” düyməsinə klikləyin. Hələlik bu qədər, növbəti yazılara qədər :)

855 dəfə oxunub

Səyahətin kabusu - itmiş baqaj

Əziz səyyahlar. Səyahət sezonunun başlanması ilə əlaqədar olaraq belə bir yazının çoxlarına faydalı olacağını sanıram. Hər kəs səyahətini planlaşdırarkən onun ideal keçməsini və səyahətin ancaq pozitiv tərəflərini düşünür. Aylar öncədən planlaşdırdığımız səyahətin ən gözəl xatirlərlə yadda qalması hər kəsin arzusudur. Bütün səyahəti ən gözəl şəkildə yaşayırsan və sonda içərisi yaxınlarına aldığın hədiyyələrlə və xoş xatirələrinlə dolu baqajın itir! Bax bu zaman əsl kabus başlanır və...Bütün bunların yaşanmaması və qabaqlayıcı tədbirlərlə zərəri minimuma endirmək öz əlimizdədir. Çalışmışam ki, bildiyim bütün təcrübəmi ətraflı şəkildə izah edim ki, xatirələrimiz ziyan olmasın. Göstərilən problemlər, bir çox sərnişinlər tərəfindən vaxtaşırı rastlanan problemlərdir və tez-tez təcrübədə yaşandığı üçün tədbirli olmaqda fayda var. Hər kəsə öncədən bol-bol səyahətlər arzulayıram. Gənclərimizin daha çox yerlər gəzərək, gördükləri müsbət təcrübələri ölkəmizdə tətbiq etmələrini ümid edərək əsas məsələyə qayıdaq.1) Səyahətə başlamamışdan öncə ilk iş uçuş marşrutunu planlaşdırarkən, əgər bir və yaxud bir neçə transfer məntəqədən istifadə edəcəksinizsə əsas diqqət etməli məqamlardan biri “Connection time” yəni, transfer məntəqəyə enmə vaxtı ilə qalxma vaxtının 2 saatdan çox olmasına diqqət etmək lazımdır. Təcrübə göstərir ki, böyük aeroportlarda 2saatdan az vaxtda baqajların bir təyyarədən boşaldılması və bir sıra işləmdən keçərək digər borta yüklənməsi qeyri-mümkün ola bilər. Bu hadisə ən çox fərqli terminallardan uçuş yerinə yetirilən zaman daha da çox rastlana bilər. Məhz bu səbəbdən də bilet alarkən baqajınızın sizinlə birgə təyinat məntəqəsinə çatmasını istəyirsinizsə, bu hallara diqqət etmək lazımdır. Əgər uçduğunuz aviaşirkət o istiqamətdə hərgün uçuş yerinə yetirmirsə bu halı xüsusilə diqqətdə saxlamaq lazımdır, çünki baqajınız gəlməzsə onu həmin aviakompaniyanın növbəti uçuşu ilə göndərəcəklərini bilməlisiniz. Adətən aviakompaniyalar riski minimuma endirmək üçün öz baqajlarını başqa kompaniyalarla deyil öz reysləri ilə göndərməkdə maraqlı olurlar. Bileti alarkən uçduğunuz şirkətin növbəti reysinin nəvaxt olacağını dəqiqləşdirməkdə fayda var. Məsələn, Wizzair aviakompaniyasıyla London-Budapest-Bakı istiqamətində uçuş yerinə yetirisinizsə baqajınızın gəlməməsi halında nəzərə almaq lazımdır ki, sizin baqajınız əksər hallarda bu kompaniyanın 3gün sonrakı növbəti reysilə göndərilə bilər.2) Baqajınızın təyinat məntəqəsinə sizinlə birgə çatmaması (itmə) hallarında, gəliş zalını tərk etmədən Lost&Found ofisinə gedərək bildirməlisiniz. Zalı tərk etdikdən sonra olunan müraciətlər aviakompaniyalar tərəfindən qəbul edilməyə bilər. Bütün iddialar zalı tərk etmədən bildirilməli və sənədləşdirilməlidir. Sizə PİR adlanan sənəd tərtib olunacaq, çalışın baqajınızın xarici görünüşü (brendi, rəngi, üzərindəki nişanələri) və içərisindəki əşyalarınız haqqında ətraflı (brendi,rəngi, əlamətləri) məlumat verəsiniz. Yaxşı olar ki, səyahətdən öncə baqajınızı yığarkən belə detallara fikir verəsiniz və ehtiyyat üçün şəklini çəkəsiniz. Bu sizə uçuş sonrası yorğunluq və stres halında yaddan çıxan detalları xatırlamağa köməklik edəcəkdir. Baqajın xarici görüntüsünün şəklini çəkmək də sizin sənədinizi rəsmiləşdirən şəxsə yardımçı olacaqdır.3) Qeydiyyata verdiyiniz baqajın üzərinə vurulan birkanın bir sıra səbəblərdən (qulpun qopması, birkanın düzgün vurulmaması) düşməsi və baqajınızın tanınmaması hallarının qarşısını öncədən gördüyünüz tədbirlərlə alarsanız, baqajın itmə şansını minimuma endirmiş olarsınız ki, bunun da bir sıra effektiv yolları vardır. Baqaj aldıqda üzərində, (adətən arxa hissəsində) kontakt yazılan yarlık olan baqajlara üstünlük verməyiniz və həmin hissəyə ad, soyad, telefon nomrəsi (beynəlxalq kodla) və email adresinizi oxunaqlı səkildə yazmağınız bu işlə məşğul olan işçilərin sizi tezliklə tapmasına və baqajınızı əldə etməyinizə yardımçı olacaq.Əgər baqajınızda belə bir hissə yoxdursa, narahat olmağına dəyməz, bunu özünüz də bir çox aviakompaniyanın (məs THY) yarlıkını əldə etməklə aradan qaldıra bilərsiniz ( bunu həmçinin özünüzlə salona apardığınız əl baqajına da tətbiq edə bilərsiniz). Sadəcə bir şeyə diqqət edin ki, qeydiyyatçı agent normal birkanı siz yarlıkı vurduğunuz qulpa yox digərinə vursun ki, bir qulp zədələndikdə digərinin baqajda qalma şansı olsun. Daha çox ehtiyatlı sərnişinlər bütün hallardan sığortalanmaq üçün əlavə böyük bir A4 vərəqinə iri hərflərlə uzaqdan diqqəti cəlb edəcək şəkildə ad, soyad, reysinin nömrəsini və gedəcəyi marşrutu, kontaktlarını yazırlar və baqajın üzərinə qopmayacaq şəkildə skoçla bərkidirlər (eytiyat üçün bir kopyasını da baqajın ön cibinə qoymaq olar). Nəzərə almaq lazımdır ki, istifadə etdiyiniz transfer məntəqələrin baqaj saxlama otaqları təsəvvür etməyəcəyimiz şəkildə böyük ola bilər və sizin də birkasız baqajınız onların arasında sıradan bir baqaj kimi it-bat ola bilər. Onu bu işlə məşğul olan işçinin nəzərini cəlb edəcək şəklə gətirmək sizin fantaziyanızdan asılıdır. Ümumiyyətlə yeni baqaj aldıqda xarici görünüşü uzaqdan diqqət cəlb edə biləcək nişanələr olan baqajları seçmək faydalıdır. Məsələn üzərində fərqli şəkillər, adlar, şəhər simvolları olan baqajlar bu iş üçün əvəzolunmazdır.4) Baqajınızı plastiklə bağlatmağınız sizi bir sıra yaşana biləcək problemdən sığortalaya bilər. Bu prosedur çox aeroportda, xüsusən də avropada tətbiq olunmadığı üçün bunu əvvəlcədən alınmış selofanla özünüz evdə edə bilərsiniz. Bu xüsusən yağışlı havalarda baqajınızın islanmasının, təyyarənin yük bölməsindəki başqa baqajın partlayaraq, içərisindəki mayenin digər baqajları çirkləndirməsinin, baqajınız normadan artıq yüklənmişsə onun partlamasının və baqajınızın içərisinə müdaxilənin qarşısını almış olar. Ancaq bu halda baqajınızı yığarkən bir şeyə diqqətli olmanız, baqajınıza aviakompaniyanın qadağan etdiyi və ya tövsiyyə etmədiyi əşyaları qoymamağınız vacibdir. Çünki sonradan baqajınız yoxlamadan keçərkən açıla bilər və bu halda ödədiyiniz məbləği boşuna vermiş olacaqsınız. Baqajın içərisinə sizin üçün çox önəmli olan əşyaları (xüsusən də pulla alınmayacaq mənəvi dəyəri olan) və sənədləri qoymamağa çalışın ki, itgi hallarında buna görə daha çox peşmançılıq yaşamayasınız. Əgər sizin bir baqaj haqqınız varsa ancaq iki kiçik baqaj aparmaq məcburiyyətindəsinizsə, o zaman icazə verilən çəkini və ölçüləri keçməmək şərti ilə iki baqajı biryerdə plastik paketlə bağlatmaq effektiv üsulladan sayılır.5) Qeydiyyatçı baqajınıza birkanı vurmamışdan öncə onu nəzərdən keçirməyiniz, üzərindəki detalları (soyad, reys, marşrut) yoxlamağınız sizi, çox rastlanan baqajınıza səhv birkanın vurulması hallarından sığortalamış olacaqdır. Bəzi hallarda qrup şəklində qeydiyyata gələrkən bu hallar yaşana bilər. Başqasının birkasının sizin baqajınıza vurulması, sizin baqajın tamamən fərqli istiqamətdə hərəkətinə səbəb olacaqdır(bundan əlavə bəzi səbəblərdən uçuşa buraxılmadığı hallarda başqasının birkası sizin baqaja vurulmuşsa, bu zaman o uçuşdan kənarlaşdırıldıqda avtomatik olaraq onun adına olan sizin baqajınız da kənarlaşdırılacaqdır). Bundan əlavə qeydiyyatçıdan birkanın sizdə qalan hissəsini aldığınıza əmin olun, çünki bu sənəd baqajınızın itməsi halında sizdən tələb olunacaqdır. Həmin “əl birkasının” səklini çəkməyiniz onun itirilməsi halında sizin işinizi asanlaşdıracaqdır. Baqajın elektron tərəzidəki dəqiq çəkisi (qramla), itmə hallarında baqajı tapmaq üçün həlledici detallardandır və sizdən soruşula bilər, çünki birkanın üzərində yuvarlaq kg-la rəqəm yazılır. Əlavə olaraq, birkanın üzərində yalnız barkod və birka nömrənizdən ibarət kiçik “minitag-lar” olur ki, bunları da baqajınızın ən az 2 fərqli tərəfinə vurulmasına diqqət edin. Bu barkodlar lazer şüası tərəfindən oxunaraq, baqajın lentdə düzgün istiqamətə getməsini təmin edir və əsasən də birkanın düşməsi halında baqajınızın tapılması üçün çox önəmli rol oynayır.6) Səyahət zamanı pasportunuzun, bank kartlarınızın itirilməsi sizə böyük problemlər yarada biləcəyi üçün bu halları da, əvvəlcədən gördüyünüz tədbirlərlə aradan qaldıra bilərsiniz. Bunun üçün sənədlərinizin görünən hissəsinə, üzərinə nömrəniz qeyd olumuş kağız parçasını yapışdırmağınız kifayətdir. Ancaq bir şeyə diqqət etmək lazımdır ki bu, bank kartının maqnit lentinin üzərinə düşməsin. Bir çox aviakompaniya salonda itən əşyalara məsuliyyət daşımadığı üçün təyyarədən düşərkən sənədlərinizi və əşyalarınızı yenidən kontrol etməyiniz sizə faydalı olacaqdır. Nəzərə almaq lazımdır ki, sizin təyyarəniz terminaldan uzaq dayanacağa enə bilər və əşyalarınızın sizə geri gətirilməsi (əgər tapilarsa) sizi pasport kontrolunda və digər proseslərdə ləngidə bilər.Əgər yazını bəyəndinizsə aşağıda olan Facebook düyməsini seçərək blogpostu Facebookda paylaşın ki, dostlarınız da yazılarımızdan xəbərdar olsunlar. Yox əgər Gəzəyənlərin yazılarından ilk xəbər tutmaq istəyirsinizsə aşağıda “abunə ol” bölməsinə mailinizi yazaraq düyməyə klikləyin. Hələlik bu qədər, növbəti yazılara qədər…Paylaşdı: Elcin Meherremli 

853 dəfə oxunub
Bizi izləyənlər siyahısına qoşulun!